Đơs Crih 85 - Sră Goh 2018

Hòi dan mơ Yàng Tom Trồ ai bơta kòñ nđàc làng bol in

Jơnau Đơs Crih Kòn Sau Kôra Cih ai cau lam bồ đơs chò in ngui

¹ Ơ Yàng Jehôwa, Kơnràñ neh ai bơta nđàc lơgar Kơnràñ in, Ai wơl Jakôp in bơta bơtoah bơtoài.

² Yàng neh toh bơta tồi glài iơh bơsak làng bol Yàng dê, Toh jơh ală tồi glài bol khai dê. (Selah)

³ Yàng neh tơnruc jơh bơta gơhào gơjrañ Kơnràñ dê, Neh pơrlac wơl bơta gơjrañ dờng Yàng dê.

⁴ Ơ Yàng Tom Trồ la Bơtau dong klàs bol hi, dan bơtào wơl bol hi, Mơ tă sang bơta gơhào nùs Kơnràñ dê gơwèt mơ bol hi.

⁵ Yàng rơp gơjrañ di bol hi sùm sùm sơl ơ? Bơta gơjrañ dờng Yàng dê rơp gam jŏ jòng tòm jơh ală rài sơl ơ?

⁶ Yàng rơp ò lơh bol hi in kis wơl, Tồ làng bol Yàng dê geh hòn chò tòm Yàng sơl ơ?

⁷ Ơ Yàng Jehôwa, dan ai bol hi in gŏ bơta kòñ gơboh kơ̆ dơn Kơnràñ dê, Mơ ai bol hi in bơta dong klàs Kơnràñ dê.

⁸ Lòi añ in kơno jơnau Jehôwa Yàng Tom Trồ rơp đơs, Bơh Kơnràñ rơp đơs jơnau lơngap lơngai mơ làng bol Kơnràñ dê, mơ cau dòn song Kơnràñ dê, bal mơ cau gơs nùs rê wơl mơ Kơnràñ.

⁹ Ngan bơta dong klàs Kơnràñ dê ơm rềp di ală cau duh rngòt di Kơnràñ, tồ bơta gơklŏ rgơi ơm tòm lơgar bol he.

¹⁰ Bơta kòñ gơboh kơ̆ dơn mơ bơta dòn song rơp tìp bal; Bơta song ring mơ bơta lơngap lơngai rơp cum bal.

¹¹ Bơta dòn song rơp cat sơmbut bơh tòm ù, Bơta song ring rơp tơmềt sền bơh đang trồ.

¹² Ngan Yàng Jehôwa rơp ai ală phan niam, Mơ lơgar bol he dê rơp gơlik gơs cồng nha.

¹³ Bơta song ring rơp lòt di đap Kơnràñ, Mơ rơp lơh dô nơm gùng ală cơnđòa jơng Kơnràñ in.