Đơs Crih 81 - Sră Goh 2018

Bơta nđàc Yàng Tom Trồ dê mơ bơta kơldang nùs làng bol Israel dê

Jơnau Đơs Crih Asap cih ai cau lam bồ đơs chò In ngui mơ kơñi sơnđan la “Gitit”

¹ Đơs chò dờng tĕ Yàng Tom Trồ in la bơta pràn kơldang bol he dê; Ai tĕ jơnau driau chò Yàng Tom Trồ Jakôp in.

² Đơs chò tơngguh tĕ mơ pòng tĕ sơnggơr dềt, Ntas kơñi gòng bơkah tồr bal mơ kơñi pĕ.

³ Uh tĕ kơlwòk tòm tŭ mat kơnhai pa lik, Tòm tŭ mat kơnhai àng dar tòm ngai pơjum sa bol he dê.

⁴ Bơh hơ̆ la dô jơnau sồr Israel in, La dô jơnau gơnoar sồr bơh Yàng Tom Trồ Jakôp dê.

⁵ Kơnràñ lơh gơs gơnoar sồr lơh nền Jôsep in, Tòm tŭ Kơnràñ lik lòt tòmlơh mơ lơgar Ejiptơ. Añ kơno dô jơnau đơs mơ añ òhềt git, đơs lah:

⁶ “Añ neh tă phan àñ kơnjơ̆ bơh di pơnì mê dê, Tê mê dê ò càng at bài kơnjơ̆ tai.

⁷ Tòm tŭ bòl glar, mê hòi dan gen Añ rơp dong tă mê, Añ neh ho wơl mê in bơh tiah ndơp ndơr ntơr kơnàs, Añ neh lòng mê tòm dà Meriba. (Selah)

⁸ Ơ làng bol Añ jê, iat tĕ tòm tŭ Añ bơto tơngkah bol mê! Ơ Israel, kơp kòñ bol mê ơm iat Añ!

⁹ Digùl bol mê bañ gơs yàng krơi lơi, Mê bañ cùn khoai yàng cau bơdìh dê.

¹⁰ Añ la Jehôwa Yàng Tom Trồ bol mê dê, Bơtau neh cèng bol mê lik klàs bơh lơgar Ejiptơ. Pò tĕ ơnàng bơr mê dê, gen Añ rơp tơmbềng gơ.

¹¹ Mơya làng bol Añ jê ò iat jơnau Añ; Israel ò bài gơs pơnah lơi bal mơ Añ.

¹² Behơ̆ Añ lòi bol khai lòt jat bơta kơldang nùs bol khai dê, Tồ bol khai lòt jat jơnau bơyai is bol khai dê.

¹³ Ô! Kơp kòñ làng bol Añ jê iat jơnau Añ, Kơp kòñ Israel lòt tòm ală gùng dà Añ jê!

¹⁴ Gen Añ rơp mhar lơh ală cau sò tơm bol khai dê kong alah, Pơrlac tê Añ nàng tòmlơh mơ ală cau sòdră di bol khai.

¹⁵ Ală cau gơjrañ kơuềng di Yàng Jehôwa rơp rngòt rơm să di Kơnràñ, Mơ bơta lơh glài bol khai rơp gam sùm sùm.

¹⁶ Añ rơp ròng siam mê mơ kòi mi niam rlau jơh, Mơ lơh mê in geh hòm lai mơ dà lơwe bơh di pơnai lŭ.”