Đơs Crih 80 - Sră Goh 2018

Jơnau rac dan Yàng dong tă làng bol Kơnràñ dê klàs bơh bơta rung rài bòl glar

Jơnau Đơs Crih Asap cih nàng lơh cơng, ai cau lam bồ đơs chò in ngui. Jat Sap đơs chò sơnđan la “Bơkào Lili Bơta Cơng Tàng”

¹ Ơ Bơtau ê gàr Israel, la Bơtau tề lam Jakôp be mpồl belàt, Dan ai tồr iat! Ơ Bơtau ơm hơđang sơbàn, digùl ală ceruƀim, dan Kơnràñ pơnđàng sòl.

² Di đap Epraim, Benjamin mơ Manase. Dan ràng tơlik bơta pràn kơldang Kơnràñ dê, mơ lòt tus dong klàs bol hi!

³ Ơ Yàng Tom Trồ, dan bơtào tơngguh wơl bol hi, Dan lơh àng gơcrà muh mat Yàng dê, gen bol hi rgơi geh dong klàs.

⁴ Ơ Jehôwa Yàng Tom Trồ Gơnap Gơnoar Dờng Làm Jơh dê, Nđò jŏ Yàng gơhào gơjrañ wèt hơ jơnau hòi dan làng bol Kơnràñ dê taih?

⁵ Yàng neh ròng siam bol khai mơ dà mat be piang lă, Mơ ai bol khai in hùc dà mat dô bă bềng tơl.

⁶ Yàng lơh bol hi in gơlik gơs bơta dơñŏ tơnhial di cau ơm rềp mơ bol hi, Mơ ală cau sò tơm di bol hi dơñŏ digùl bol khai.

⁷ Ơ Yàng Tom Trồ Gơnap Gơnoar Làm Jơh dê, dan bơtào tơngguh bol hi wơl, Lòi àng gơcrà muh mat Yàng dê, nàng bol hi in geh dong klàs.

⁸ Yàng neh cèng dô đòm chi ño lik bơh lơgar Ejiptơ; Kơnràñ bơtrơh tơlik ală làng bol, gen tam chi hơ̆.

⁹ Kơnràñ rcang niam ù gơ in, Gen gơ sro ryas jrô mơ gơ wìn làm jơh ù tiah.

¹⁰ Mƀur gơ jơm gòm ală mơnơm, Mơ ală ntê gơ jơm ndơp ală chi pơnàng dờng;

¹¹ Ală ntê gơ sro tus hơ dàlềng, Mơ ală cat sơmbut gơtras tus di hiòng dờng.

¹² Behơ̆ ñchi bơh tài Yàng lơh tơrlah pơnggàr gơ, Nàng ală cau lòt gan rgơi sơmbrơt plai gơ dê taih?

¹³ Jơrke lik bơh brê kap tơnroh gơ, Mơ jơh ală phan poan jơng tòm ƀlàng sa gơ.

¹⁴ Ơ Yàng Tom Trồ Gơnap Gơnoar Dờng Làm Jơh dê; dan Yàng bơh đang trồ tơmềt mơ sền, dan wèt sền tòm chi ño do,

¹⁵ La tòm chi mơ tê ma Yàng neh tam.

¹⁶ Cau neh chu gơ mơ ồs, bol khai neh kơl gơ; lòi bol khai kong roh rui tòm bơta lah pơrhơng bơh mat Yàng dê.

¹⁷ Mơya dan tê Yàng ơn hơđang cau đah ma Kơnràñ, Hơ̆ la kòn mơnus mơ Yàng neh lơh pràn kơldang Kơnràñ in.

¹⁸ Behơ̆ bol hi rơp ò gơs tŭ lơi sang lòi Yàng tai; Dan ai bol hi in bơta kis, gen bol hi rơp hòi dan di sơnđan Yàng.

¹⁹ Ơ Jehôwa Yàng Tom Trồ Gơnap Gơnoar Dờng Làm Jơh dê, dan bơtào tơngguh wơl bol hi, Dan lơh àng gơcrà mat Yàng dê, nàng bol hi in geh dong klàs.