Đơs Crih 72 - Sră Goh 2018

Bơta at bồ bơtau song ring dê

Jơnau Đơs Crih Salômôn cih

¹ Ơ Yàng Tom Trồ, dan ai bơtau in bơta song ngan Kơnràñ dê, Mơ ai kòn klau bơtau in bơta song ring Yàng dê.

² Dan ai khai in cahrña làng bol Kơnràñ dê dô bă song ring, Cahrña cau rƀah lơòi Kơnràñ dê dô bă song ngan.

³ Lòi ală mơnơm mơ ală mơnơm dềt Cèng bơta pas gơs lơngap lơngai làng bol in tòm bơta song ring.

⁴ Dan ai khai in dong tò cau rƀah lơòi tòm làng bol, Dong tă cau siơ̆u siar, mơ tơnroh lề lac cau rồn bơklơn.

⁵ Dilah mattơngai mơ kơnhai gam gơs kàr lơi, Dan ai khai in gam kis kàr hơ̆ sơl, jơl jơh ală rài.

⁶ Dan ai khai in gơlik be mìu dùh hơđang ñhơt pa pès, Be dà mìu tuh hơđang ù.

⁷ Tòm rài bơtau hơ̆ dê, dan ai bơta song ring sơlo geh pò ơnàng, Mơ bơta ring lơngai geh tơngkah tơngkañ, jơl tus di mat kơnhai ò gam tai.

⁸ Dan ai khai in at bồ bơh dàlềng do tus hơ dàlềng ne, Bơh di hiòng jơl tus di lồi plai ù.

⁹ Dan lòi ală cau tòmdră di khai cùn khoai di đap khai, Ai ală cau sò tơm di khai liap kơmbuh ù.

¹⁰ Dan lòi cau bơtau Tarsi mơ cau bơtau ală bồt pơlào dê boh dia khai in, Lòi bơtau Saba mơ Seba cèng phan ai gòi khai in.

¹¹ Dan lòi jơh ală cau bơtau tơmbic să di đap khai, Jơh ală lơgar duh broă khai in.

¹² Bơh khai dong tă cau siơ̆u siar tòm tŭ khai hòi dan, Mơ dong tă cau rƀah lơòi mơ cau ò gơs cau dong kòl.

¹³ Khai nđàc sơngit di cau lơbơn lơño mơ cau siơ̆u siar, Mơ dong klàs bơta kis cau siơ̆u siar dê.

¹⁴ Khai tơwài bơta kis bol khai dê klàs bơh bơta rồn bơklơn mơ bơta jàñ bơsak, Mơ sền mhàm bol khai dê la dờng màng.

¹⁵ Dan ai khai in geh kis jŏ, mơ geh cau ơn màh Saba khai in. Geh cau hòi dan sùm khai in, mơ kòp ngai rac dan khai in geh lơngai.

¹⁶ Dan ai kòi mbo geh tơngkah tơngkañ tòm lơgar tus di hơđang ală bồ mơnơm, Gơs plai đo oă be Liban; Dan lòi cau ơm tòm ală ƀòn dờng gơlik gơs oă be ñhơt tòm ƀlàng.

¹⁷ Dan sơnđan khai dê gam gơs sùm sùm, Dilah mattơngai gam gơs kàr lơi, dan bơta tiơng pơnro khai dê gam kàr hơ̆ sơl! Dan lòi cau kơnòm di khai geh lơngai, Mơ jơh ală lơgar sơnđan khai la cau geh lơngai.

¹⁸ Pal jòng ro Yàng Jehôwa la Yàng Tom Trồ Israel dê, mìng dô nă Kơnràñ lơm lơh ală broă crih crài.

¹⁹ Pal jòng ro sơnđan gơklŏ Kơnràñ dê jơl tus sùm sùm! Dan bơta gơklŏ Kơnràñ dê bềng lìu làm jơh plai ù! Amen, Amen!

²⁰ Jơh jơnau hòi dan Dabit dê la kòn klau Jese.