Đơs Crih 68 - Sră Goh 2018

Jehôwa la Yàng Tom Trồ Sinai dê mơ tiah sàng goh Dê

Bơta đơs chò. Jơnau Đơs Crih Dabit cih ai cau lam bồ đơs chò in ngui

¹ Dan Yàng Tom Trồ guh, lơh nrah nring ală cau sò tơm di Kơnràñ, Mơ lơh ală cau gơjrañ kơuềng di Yàng pal dô bơh di đap Kơnràñ.

² Be ñhŭ gơ dô, dan Kơnràñ lơh gơprah bol khai kung behơ̆ sơl; Be jrềng lề di đap ồs, Dan lòi ală cau iơh bơsak kòl tơnroh di đap Yàng Tom Trồ.

³ Mơya dan lòi cau song ring in chò hòp, lòi bol khai in hừh hơh di đap Yàng Tom Trồ, lòi bol khai in hòn chò oă ngan.

⁴ Đơs chò tĕ Yàng Tom Trồ in, đơs chò jòng ro tĕ sơnđan Kơnràñ; Đơs chò tĕ Kơnràñ in la Bơtau hào hơđang ală mhwal; Sơnđan Kơnràñ la Yàng Jehôwa, chò hòp tĕ di đap Kơnràñ!

⁵ Yàng Tom Trồ ơm tòm tiah sàng goh Kơnràñ dê, La Bèp ală cau kòn đòi dê, mơ la Cau cahrña song ring ală cau ùr bơnrau in.

⁶ Yàng Tom Trồ lơh cau gơkòl sang lòi in gơs hìu ơm, Kơnràñ cèng tơlik cau kòl jàm mơ ai khai in geh bơtoah bơtoài, Mơya ală cau tòmdră gen ơm tòm tiah ù rañ rsơh.

⁷ Ơ Yàng Tom Trồ, tòm tŭ Kơnràñ neh lik lòt di đap làng bol Kơnràñ dê, Tòm tŭ Kơnràñ lòt gan tiah ngềt ngơt, (Selah)

⁸ Gen ù lơnggơr, ală tap trồ dùh mìu dờng di đap Yàng Tom Trồ; la Yàng Tom Trồ Sinai dê, di đap Yàng Tom Trồ, la Yàng Tom Trồ Israel dê.

⁹ Ơ Yàng Tom Trồ, Kơnràñ dùh mìu lìu làc, hơđang sre brê Kơnràñ dê, tòm tŭ gơ ro rañ, Yàng ròng siam gơ wơl.

¹⁰ Ơ Yàng Tom Trồ; mpồl belàt Kơnràñ dê jòi dô bă tiah ơm tềng hơ̆; Bơh nùs niam Kơnràñ neh rcang phan ngui sa cau siơ̆u siar in.

¹¹ Yàng ai gơnoar sồr; Ală cau neh yal wơl jơnau sồr hơ̆ la dô mpồl oă.

¹² Bol khai yal lah: “Ală cau bơtau at bồ ală mpồl ling ntoat dô, bol khai ntoat dô!” Ai ală cau ùr ơm tòm hìu tòmpà phan neh tòmpìt geh.

¹³ Bulah bol khai ơm wơl digùl ală wàng belàt, Pơnđar ntòp ƀềp mơ priă, Mơ sơnò gơ ƀềp mơ màh tơlir.

¹⁴ Tòm tŭ Bơtau Gơnap Gơnoar Làm Jơh lơh nrah nring ală cau bơtau tềng hơ̆, Gen ù gơlik bò be tòm tŭ mìu piar hơđang mơnơm Jalmôn.

¹⁵ Ơ mơnơm pràn kơldang, la mơnơm Basan dê; Ơ mơnơm gơs oă bồ, la mơnơm Basan dê!

¹⁶ Ơ mơnơm gơs oă bồ, ñchi bơh tài mê sền ƀoah di mơnơm mơ Yàng Tom Trồ neh sac rwah lơh gơs tiah ơm Kơnràñ dê taih? Yàng Jehôwa rơp ơm tềng hơ̆ gam sùm sùm.

¹⁷ Rơndeh ơseh Yàng Tom Trồ dê la bàr jơt rbô nơm, rbô rbô nơm; Yàng lòt bal mơ ală rơndeh hơ̆ bơh Sinai tus hơ tiah sàng goh.

¹⁸ Ơ Yàng, Kơnràñ neh guh hơđang mơnơm jòng, tề lam ală cau neh kòl jàm tòm rơndeh ồs Kơnràñ dê; Kơnràñ neh dòp phan ơn bơh digùl ală cau, tian gơs kung bơh digùl cau tòmdră di Yàng Jehôwa sơl, Jehôwa Yàng Tom Trồ rgơi ơm tềng hơ̆.

¹⁹ Pal jòng ro Yàng, la Bơtau kòp ngai yò đo bol hi; Yàng Tom Trồ la Bơtau ai bơta dong klàs bol hi in.

²⁰ Yàng Tom Trồ bol hi dê la Yàng Tom Trồ dong klàs bol hi, kơnòm di Jehôwa Yàng Tom Trồ mơ jơi kòn mơnus pleh klàs bơh di bơta chơt.

²¹ Mơya Yàng Tom Trồ rơp pòng bơcah bồ ală cau sò tơm di Kơnràñ, Hơ̆ la bồ cau kư̆ lòt jat gùng iơh bơsak khai dê.

²² Yàng đơs lah: “Añ rơp cèng wơl bol khai bơh di mơnơm Basan, Añ rơp cèng wơl bol khai bơh di tiah dàlềng jrô,

²³ Nàng mê rào jơng mê tòm mhàm, Mơ lơmpiat so mê dê kung gơs pơnah liap mhàm cau sò tơm di mê.”

²⁴ Ơ Yàng Tom Trồ, cau gŏ mpồl bol oă lòt bal mơ Kơnràñ, Hơ̆ la mpồl bol oă bal mơ Yàng Tom Trồ añ jê, la Bơtau añ jê, lòt mut tòm tiah sàng goh.

²⁵ Ală cau đơs chò lòt lài, cau pĕ kơñi jat bơh tơnơ̆, Digùl gơs ală cau ơruh jan sơnggơr dềt,

²⁶ Mơ đơs lah: “Ơ ală cau tơnggơs bơh Israel, tòm mpồl jơnum dờng jòng ro tĕ Yàng Tom Trồ, la Yàng Jehôwa.”

²⁷ Ne, Benjamin la jơi bơtiàn dềt rlau jơh, la cau lam gùng bol khai, Gen ală kwang bơtau Juda mơ mpồl bol khai dê, Ală kwang bơtau Jebulun dê, mơ ală kwang bơtau Neptali dê.

²⁸ Ơ Yàng Tom Trồ, dan ai jơh gơnoar pràn Kơnràñ dê, Dan ràng tơlik bơta pràn kơldang Kơnràñ dê, Ơ Yàng Tom Trồ, la Bơtau neh lơh broă nàng dong bol hi.

²⁹ Tài bơh hìu duh khoai Kơnràñ dê tòm Jerusalem, Ală cau bơtau cèng phan ơn Kơnràñ in.

³⁰ Dan lah pơrhơng ală phan poan jơng tòm brê ơm digùl ală proh tràng, mpồl kơnrồ dam bal mơ ală kơnrồ kòn ală làng bol dê. Jă trơm hơđơm jơng ală cau hàm kòñ tơnơ̆ mơ tŭ ơn ală phan cèng ơn duh lơgar ndai in; Dan lơh nrah nring ală làng bol kòñ gơboh di bơta lơh kơlìn.

³¹ Lòi ală phan mơ kòng geh cèng bơh Ejiptơ; Lòi lơgar Ethiôpi sơrbac sơrbang pò tê hơ Yàng Tom Trồ.

³² Ơ ală lơgar tòm plai ù, đơs chò tĕ Yàng Tom Trồ in; Đơs chò tĕ jòng ro Yàng. (Selah)

³³ Hơ̆ la Bơtau lòt hơđang ală tap trồ la ală tap trồ neh gơs bơh yau; Ne, Kơnràñ tơlik jơnau đơs, la jơnau ntas dờng Kơnràñ dê.

³⁴ Git đal tĕ gơnap gơnoar Yàng Tom Trồ dê, Bơta ryŭ ryơm Kơnràñ dê ơm hơđang Israel, mơ gơnap gơnoar Kơnràñ dê ơm tòm ală tap trồ.

³⁵ Cau pal rngòt di Yàng Tom Trồ tòm tiah sàng goh Kơnràñ dê; Yàng Tom Trồ Israel dê la Bơtau ai gơnap gơnoar mơ pràn kơldang làng bol Kơnràñ in. Pal jòng ro Yàng Tom Trồ!