Đơs Crih 62 - Sră Goh 2018

Dòn kơnòm di Yàng Jehôwa

Jơnau Đơs Crih Dabit cih ai Jeduthun in la cau lam bồ đơs chò

¹ Hwềng soàn añ rlô lơngap lơngai mìng tòm Yàng Tom Trồ lơm; Bơta dong klàs añ jê tus bơh Kơnràñ.

² Mìng dô nă Yàng la lŭ klềr añ jê, mơ bơta dong klàs añ, la theng kơ̆ cê añ jê; añ rơp ò wañ lơnggơh.

³ Ală bol mê brồ tơm sùm di dô nă cau jơl tus di tŭ lơi taih? Jơh ală bol mê rơp tơnchơt bol khai, kung be dô nơm dơrñang neh sơrling, mơ dô nơm pơnggàr rơp gơplơ̆.

⁴ Bol khai mìng tòmbơyai nàng tơmù khai bơh di tiah jòng màng khai dê. Bol khai niam nùs di bơta blac chừt. Bơr bol khai đơs ai lơngai, Mơya tòm nùs bol khai gơs srat rma. (Selah)

⁵ Hwềng soàn añ rlô lơngap lơngai mìng tòm Yàng Tom Trồ lơm; Bơta gơn kơp añ jê tus bơh Kơnràñ.

⁶ Mìng Yàng la lŭ klềr añ jê, la bơta dong klàs añ, Mơ la theng kìng crŭ añ jê; añ rơp ò wañ lơnggơh.

⁷ Bơta dong klàs mơ bơta ryŭ ryơm añ jê la bơh Yàng Tom Trồ; Kơnràñ la lŭ klềr pràn kơldang añ jê, tiah kìng crŭ añ jê tòm Yàng Tom Trồ.

⁸ Ơ ală làng bol, kơnòm tĕ di Kơnràñ sùm sùm, Tuh tơlik jơh ală bơta bơh nùs bol mê di đap Yàng; Yàng Tom Trồ la tiah kìng crŭ bol he dê. (Selah)

⁹ Ală cau ò diă ò diơng mìng be dô dơ̆ tă nhơm, Ală cau dờng màng be jơnau blac pơrlồm; Ơn hơđang kơr gen bol khai gơyò nggòc, Bol khai dô bă bal nggòc rlau mơ nhơm tă.

¹⁰ Bañ kơnòm di bơta rồn bơklơn, Kung bañ ơn nùs kơnòm di bơta ntung kơñau; Dilah geh bơtơl oă phan mơna, bañ ơn nùs kơnòm tềng gơ.

¹¹ Yàng Tom Trồ neh đơs dô dơ̆, Añ neh kơno bơta do bàr dơ̆: Hơ̆ la gơnap gơnoar gơrê bal mơ Yàng Tom Trồ.

¹² Mơ tai, ơ Yàng Jehôwa, bơta kòñ gơboh kơ̆ dơn gơrê bal mơ Kơnràñ; Bơh Kơnràñ tơm wơl kòp nă cau in jat be broă lơh bol khai dê.