Đơs Crih 56 - Sră Goh 2018

Bơta hòi dan mơ Yàng dong tă he, mơ ưnngài bơh bơta dong tă Kơnràñ dê

Jơnau Đơs Crih Dabit cih tòm tŭ làng bol Philistin kup khai tòm ƀòn Gat. Ai cau lam bồ đơs chò in ngui. Jat sap đơs chò Sềm Ntòp Tòm Chi Nho Tòm Tiah Ngài

¹ Ơ Yàng Tom Trồ, dan nđàc di añ, bơh cau jă trơm añ; Jơh ngai mho cau sò tơm rồn bơklơn añ.

² Jơh ngai mho cau sò tơm jă trơm hơđang añ, Ơ Bơtau Hơđang Rlau Jơh, bơh gơs oă cau tòmlơh tòmdră mơ añ.

³ Tòm tŭ añ rngòt, añ dòn kơnòm di Yàng.

⁴ Tòm Yàng Tom Trồ mơ añ jòng ro jơnau Kơnràñ dê. Añ dòn kơnòm di Yàng Tom Trồ, añ ò gơs rngòt. Ñchi cau poac să rgơi lơh di añ taih?

⁵ Jơh ngai mho bol khai jòi lơh iơh tòm jơh ală bơta gơtơntus di añ; Ală bơta kơlôi sơnơng bol khai la tòmdră lơh iơh di añ.

⁶ Bol khai pơjum bal, kơp òm sền nền ală cơnđòa añ jê. Kung be bol khai kơp kòñ geh bơta kis añ jê,

⁷ Behơ̆ tơm wơl bol khai in jat be bơta tồi glài iơh bơsak bol khai dê. Ơ Yàng Tom Trồ, dan ai bơta gơjrañ dờng mơ tuh tơlup ală làng bol!

⁸ Yàng neh kòp ală cơnđòa añ jê; Dan ơn dà mat añ jê tòm gri Kơnràñ dê! Dà mat añ jê ò di neh geh cih tòm sră Kơnràñ dê ò ơ?

⁹ Ngai lơi añ hòi dan, ală cau sò tơm di añ rơp kong tơnruc wơl. Dô bơta añ git, hơ̆ la Yàng Tom Trồ ơm dô đah bal mơ añ.

¹⁰ Añ kơnòm di Yàng Tom Trồ mơ jòng ro jơnau Kơnràñ dê; Añ kơnòm di Yàng Jehôwa mơ jòng ro jơnau Kơnràñ dê.

¹¹ Añ dòn kơnòm di Yàng Tom Trồ, añ ò gơs rngòt. Ñchi kòn mơnus rgơi lơh di añ taih?

¹² Ơ Yàng Tom Trồ, añ pal lơh jat jơnau añ neh ho pơgon mơ Yàng; Añ rơp tơm wơl phan ơn duh khoai ưnngài Yàng in.

¹³ Bơh Yàng neh dong tă hwềng soàn añ klàs bơh bơta chơt, Jơng añ klàs di bơta gơtup pừ, Tồ añ in lòt di đap Yàng Tom Trồ tòm bơta àng bơta kis dê.