Đơs Crih 51 - Sră Goh 2018

Cau gơs nùs git gơjrañ sang glài hòi dan mơ Yàng gen rơp geh toh glài

Jơnau Đơs Crih Dabit cih Tòm Tŭ Cau gơnoar hwơr Nathan lòt tus hơ khai, tơnơ̆ mơ tŭ khai neh tìs glài mơ Batseba. Ai cau lam bồ đơs chò in ngui

¹ Ơ Yàng Tom Trồ, dan kòñ nđàc di añ jat nùs kòñ gơboh kơ̆ dơn Kơnràñ dê; Dan jùt jơh ală bơta tìs glài añ jê, jat bơta kòñ nđàc dờng ơnàng Yàng dê.

² Dan rào añ in goh jơh hir bơta iơh bơsak añ jê, Mơ lơh añ in gơs goh bơh di bơta tồi glài añ jê.

³ Tài bơh añ git ală bơta tìs glài añ jê, Tồi glài añ jê gơ ơm sùm di đap añ.

⁴ Añ neh tìs glài mơ Yàng, mìng mơ Yàng lơm, Mơ neh lơh bơta iơh bơsak di đap Yàng, Tồ Yàng geh kòp la song ring tòm tŭ Kơnràñ đơs, Mơ ò gơs tiah geh lah pơrhơng tòm tŭ Kơnràñ cahrña.

⁵ Ngan behơ̆, añ neh deh tòm bơta iơh bơsak, Mè añ jê neh bun añ tòm tồi glài.

⁶ Do, Yàng kòñ gơs jơnau song tòm dơlam nùs, Gen tàng, dan bơto añ in bơta jak chài tòm tiah ndơp ndơr tòm nùs añ jê.

⁷ Dan ai nsrum nha chi kin yơ̆i jùt goh tồi glài añ in, gen añ rơp gơs sàng goh; Dan rào añ gen añ rơp gơlik gơs bò rlau mơ piar

⁸ Dan ai añ in geh bềng bơta hòn chò hừh hơh, Lòi añ in kơno bơta hòn chò, lòi ală ntìng mơ Kơnràñ neh dơrpă geh hòn chò.

⁹ Dan Yàng pleh mat bơh di ală tồi glài añ jê, Mơ jùt jơh ală bơta iơh bơsak añ jê.

¹⁰ Ơ Yàng Tom Trồ, dan crơng gơs tòm añ dô nơm nùs sàng goh; Mơ ơn tòm añ dô nơm hwềng nùs pa mơ song ngan.

¹¹ Dan bañ sang lòi añ bơh di đap Yàng, Kung bañ tă Hwềng Goh Yàng dê bơh di añ.

¹² Dan ai wơl añ in bơta hòn chò bơh bơta dong klàs Kơnràñ dê, Mơ ai añ in hwềng nùs dờng ơnàng mơ yò đo añ.

¹³ Tŭ hơ̆ añ rơp bơto ală cau tìs glài in ală gùng dà Yàng dê, Mơ ală cau glài rơp rê wơl hơ Yàng.

¹⁴ Ơ Yàng Tom Trồ la Yàng Tom Trồ bơta dong klàs añ jê, Dan dong tă añ bơh di glài lơh gơtuh mhàm, Gen lơmpiat añ rơp đơs chò dờng jòng ro bơta dong tă Kơnràñ dê.

¹⁵ Ơ Yàng, dan pò sơndồi añ, Gen bơr añ rơp yal tơlik bơta jòng ro Yàng.

¹⁶ Bơh Yàng ò chò hòp di phan ơn duh khoai ò; Dilah añ ơn phan ơn chu pơrguc gen bơta hơ̆ ò niam nùs Kơnràñ.

¹⁷ Phan ơn duh khoai niam nùs Yàng Tom Trồ dê hơ̆ la hwềng nùs jê sồt; Ơ Yàng Tom Trồ, nùs jê sồt moat jrùng, Yàng ò di sền òsơp ò.

¹⁸ Dan Yàng lơh niam Siôn in jat be nùs kòñ niam Kơnràñ dê; Dan bơt bơtào wơl ală dơrñang Jerusalem dê.

¹⁹ Gen Yàng rơp niam nùs bơh ală phan ơn duh khoai dô bă di pal, Phan ơn chu mơ jơh ală phan ơn chu pơrguc; Gen cau rơp ơn kơnrồ dam hơđang cơnòng duh khoai Yàng dê.