Đơs Crih 36 - Sră Goh 2018

Nùs iơh bơsak kòn mơnus dê mơ nùs kòñ nđàc Yàng Tom Trồ dê

Jơnau Đơs Crih Dabit la cau duh broă Yàng Jehôwa dê cih. Ai cau lam bồ đơs chò in ngui

¹ Bơta tồi glài đơs tòm nùs cau iơh bơsak dê; Ò gơs tŭ lơi khai duh rngòt di Yàng Tom Trồ.

² Bơh khai tơngguh is să he tòm mat tòm bol khai dê mơ kơlôi lah, Ò gơs cau lơi rgơi gŏ mơ gơjrañ kơuềng di tồi glài khai dê.

³ Khai đơs ală jơnau iơh bơsak mơ blac pơrlồm; Khai neh sang bơta lơh lòt jak chài mơ sang lơh bơta niam.

⁴ Khai kơlôi bơh bơta iơh tòm tŭ khai bic hơđang cơnòng; Khai jat gùng ò niam; khai ò sền òsơp mơ ò sang bơta iơh bơsak.

⁵ Ơ Yàng Jehôwa, bơta kòñ gơboh kơ̆ dơn Kơnràñ dê la dờng ơnàng jơl tus hơđang trồ, Bơta dòn song Kơnràñ dê tus di ală mhwal.

⁶ Bơta song ring Kơnràñ dê la dờng be ală mơnơm, Ală bơta cahrña Kơnràñ dê la jrô be cìr jrô ngan. Ơ Yàng Jehôwa, Kơnràñ dong tă jơi kòn mơnus mơ phan poan jơng.

⁷ Ơ Yàng Tom Trồ, bơta kòñ gơboh kơ̆ dơn Kơnràñ dê la dờng màng ò git nđò! Jơi kòn mơnus kìng crŭ tòm tiah pơnđar Kơnràñ dê.

⁸ Bol khai pơjum ñô sa dô bă tơngkah tơngkañ tòm hìu Yàng dê, Kơnràñ ai bol khai in bơta lơngai lìu làc kung be hùc dà hiòng.

⁹ Bơh croh dà bơta kis la bal mơ Kơnràñ; Kơnòm di bơta àng Kơnràñ dê, bol hi gŏ bơta àng.

¹⁰ Dan Yàng kư̆ kòñ gơboh kơ̆ dơn di ală cau dòp git Kơnràñ, Mơ kư̆ dong klàs ală cau gơs nùs song ring.

¹¹ Dan bañ lòi jơng cau pơnhừ să dê jat bàn añ, Kung bañ lòi tê cau iơh bơsak dê bơtrơh añ.

¹² Ne, ală cau iơh bơsak neh gơplơ̆ gơdùh, Bol khai kòl pừ tơlup, ò rgơi guh tai.