Đơs Crih 31 - Sră Goh 2018

Dòn kơnòm di Yàng Jehôwa mơ hòi dan mơ Kơnràñ dong kòl

Jơnau Đơs Crih Dabit cih. Ai cau lam bồ đơs chò in ngui

¹ Ơ Yàng Jehôwa, añ jòi tiah kìng crŭ tòm Kơnràñ; Dan bañ tŭ lơi lòi añ gơkòl ƀàssìl; Dan ai bơta song ring Kơnràñ dê mơ dong tă añ.

² Dan wèt tồr di añ, mhar mhar dong tă añ. Dan Kơnràñ lơh gơs dô nơm lŭ klềr nàng añ in kìng crŭ, Mơ lơh gơs dô nơm theng kơ̆ cê nàng dong klàs añ.

³ Ngan, Kơnràñ la lŭ klềr mơ la theng kơ̆ cê añ jê; Dan tề lam añ bơh sơnđan Kơnràñ dê.

⁴ Dan Yàng hồ añ klàs bơh di bơtơng mơ bol khai dang òm di añ, Bơh Yàng la tiah kìng crŭ añ jê.

⁵ Añ jào hwềng añ tòm tê Yàng; Ơ Jehôwa la Yàng Tom Trồ dòn song, Kơnràñ neh tơwài añ.

⁶ Kơnràñ gơjrañ kơuềng di ală cau sền rmê di ală rùp ràk roh lơm, Mơya añ dòn kơnòm dê Yàng Jehôwa.

⁷ Añ rơp chò hòp mơ hừh hơh bơh bơta kòñ gơboh kơ̆ dơn Yàng dê, Tài bơh Kơnràñ neh gŏ bơta jê sồt bòl glar añ jê, mơ git ală bơta jê sồt moat jrùng añ jê.

⁸ Yàng ò bơtào añ tòm tê cau sò tơm, Kơnràñ ơn jơng añ jê di tiah ơnàng.

⁹ Ơ Yàng Jehôwa, dan nđàc di añ, bơh añ bòl glar, Mat añ siar lơgah tài bơh moat jrùng, Hwềng soàn añ mơ să jan añ kung behơ̆ sơl.

¹⁰ Bơta kis añ siar roh tài bơh moat jrùng, Ală sơnam añ gơ lồi be nhơm tă; Tài bơh bơta tồi glài iơh bơsak añ jê, Gen bơta pràn kơldang añ jê gơhuc lơbơn, mơ ntìng añ lề lac.

¹¹ Añ gơlik gơs be bơta ngkòr ngkàc gơwèt mơ jơh ală cau sò tơm di añ, Ngan la dô bơta ngkòr ngkàc di đap ală cau gơp ƀòn añ jê, Mơ la dô bơta rngòt rngơt di đap ală cau mòng git añ; Cau lơi gŏ añ tòm gùng gen dô bơh di añ.

¹² Nùs cau ò tai kah añ, hŭi añ be cau neh chơt; Añ tòm toh be dô nơm gri bơcah lề.

¹³ Ngan, añ kơno jơnau đơs joh lah oă cau dê; Làm jơh gùt dar gơs bơta rngòt rngơt, Tòm tŭ bol khai tòmbơyai sò tơm di añ, kòñ tơnroh bơta kis añ jê.

¹⁴ Mơya, ơ Yàng Jehôwa, añ dòn kơnòm di Kơnràñ, Añ đơs lah: “Kơnràñ la Yàng Tom Trồ añ jê.”

¹⁵ Tŭ tơngai rài kis añ jê gơ ơm tòm tê Kơnràñ; Dan dong añ klàs bơh di tê cau sò tơm mơ cau kup kơryan añ.

¹⁶ Dan lòi muh mat Yàng dê pơnđàng sòl hơđang cau duh broă Kơnràñ dê; Ai bơta kòñ gơboh kơ̆ dơn Yàng dê mơ dong klàs añ.

¹⁷ Ơ Yàng Jehôwa, dan bañ lòi añ gơkòl ƀàssìl, bơh añ hòi dan mơ Kơnràñ; Dan lòi cau iơh bơsak gơkòl ƀàssìl, mơ lòi bol khai gơlik be cau kloat tòm tŭ mù tòm lơgar Làng ƀồc.

¹⁸ Dan lòi ală sơndồi blac chừt gơkòl kloat, La ală sơndồi jak ai jơnau sơrdă sơrdơu, pơnhừ să Mơ sền òsơp nàng đơs sòdră di cau song ring.

¹⁹ Nùs niam Yàng dê la dờng ngan ò git lơh, La nùs niam mơ Yàng neh prap lòi ală cau in duh rngòt di Yàng, Mơ Kơnràñ bơtào kơ̆ ală cau in kìng crŭ să he tòm Yàng, di đap mat jơh tơl nă cau.

²⁰ Yàng pồn bol khai tòm tiah ndơp ndơr di đap mat Yàng, la tiah klàs bơh ală kai gơrmơ̆i kòn mơnus dê; Yàng sền gàr bol khai tòm rsơm Kơnràñ dê ngài bơh bơta tòmpìt tòmhà lơmpiat dê.

²¹ Pal jòng ro Yàng Jehôwa, Bơh Kơnràñ neh yal tơlik añ in bơta kòñ gơboh kơ̆ dơn Kơnràñ dê. Tòm tŭ añ kòl yan kung be dô nơm ƀòn dờng gơkòl gơrwàng.

²² Tòm tŭ dơrcul añ neh đơs lah: “Añ neh kong bơtrơh ngài bơh di đap Yàng.” Mơya tòm tŭ añ hòi dan mơ Yàng dong añ, Gen Kơnràñ kơno jơnau rac dan añ jê.

²³ Ơ ală cau sàng goh Yàng Jehôwa dê, kòñ gơboh tĕ di Kơnràñ! Yàng Jehôwa wèt sền ală cau dòn song, Mơya Kơnràñ sal wơl dô bă kơnjơ̆ di cau lơh lòt pơnhừ să.

²⁴ Ơ jơh ală cau gơn kơnòm di Yàng Jehôwa, Lơh tĕ pràn kơldang mơ kơ̆ nùs wền dơngoh.