Đơs Crih 30 - Sră Goh 2018

Ưnngài Yàng Jehôwa bơh Kơnràñ neh dong klàs bơh bơta chơt

Jơnau Đơs Crih Dabit cih nàng đơs chò tòm tŭ mut gơlang pa bơtau dê

¹ Ơ Yàng Jehôwa, añ jòng ro Kơnràñ, bơh Kơnràñ neh yò tơngguh añ, Mơ ò ai gơnoar ală cau sò tơm in hòn chò bơh di añ.

² Ơ Jehôwa Yàng Tom Trồ añ jê, añ rac dan mơ Yàng dong kòl, Mơ Kơnràñ neh sơmbòi añ.

³ Ơ Yàng Jehôwa, Kơnràñ neh cèng hwềng soàn añ guh bơh lơgar Làng ƀồc, Neh prap lòi bơta kis wơl añ bơh digùl ală cau neh mù tòm bơtô.

⁴ Ơ ală cau dòn song Yàng Jehôwa dê, đơs chò tĕ jòng ro Kơnràñ, Ưnngài tĕ sơnđan sàng goh Kơnràñ dê.

⁵ Bơh bơta gơjrañ Kơnràñ dê gơs tòm dô ơthoa; ai bơta kòñ nđàc Kơnràñ dê jơh dô rài. Bơta ñìm rac tus ơm ing dô mơnang, Mơya àng drim gen gơs bơta hòn chò.

⁶ Ai añ, tòm tŭ pas sơm lơngai lơngò gen añ đơs lah: “Añ ò gơs tŭ lơi wañ lơnggơr.”

⁷ Ơ Yàng Jehôwa, bơh bơta nđàc Kơnràñ dê, Kơnràñ neh bơtào añ kơ̆ be mơnơm dờng; Kơnràñ pồn mat gen añ ò suk ơm.

⁸ Ơ Yàng Jehôwa, añ neh hòi dan mơ Kơnràñ, Mơ rac dan mơ Yàng Jehôwa lah:

⁹ “Dilah añ mù tòm bơtô, gen tòm bơta chơt añ jê gơs kwơ lơi sơl ơ? Kơmbuh ù rơp jòng ro Kơnràñ ơ? Gơ rơp yal bơta dòn song Kơnràñ dê ơ?

¹⁰ Ơ Yàng Jehôwa, dan iat mơ kòñ nđàc di añ! Ơ Yàng Jehôwa, la Bơtau dong kòl añ!”

¹¹ Kơnràñ neh tòmgơl bơta moat jrùng añ jê gơlik gơs chò hòp; Kơnràñ neh hồ ào bài sơnò kiat añ jê, mơ tơnsoh añ mơ bơta hòn chò,

¹² Tồ hwềng soàn añ đơs chò jòng ro Yàng ò dơh. Ơ Jehôwa Yàng Tom Trồ añ jê, añ rơp ưnngài Kơnràñ jơl sùm sùm.