Đơs Crih 29 - Sră Goh 2018

Sap đơs Yàng Jehôwa dê

Jơnau Đơs Crih Dabit Cih

¹ Jòng ro tĕ Yàng Jehôwa, ơ ală cau ơm hơđang trồ, jòng ro tĕ Yàng Jehôwa bơh bơta gơklŏ mơ gơnoar pràn.

² Jòng ro tĕ Yàng Jehôwa bơh bơta gơklŏ sơnđan Kơnràñ dê; duh khoai tĕ Yàng Jehôwa tòm bơta sàng goh ryŭ ryơm.

³ Sap đơs Yàng Jehôwa dê gơs hơđang ală dà; Yàng Tom Trồ bơta gơklŏ dê lơh gơs ntơr kơnàs, Yàng Jehôwa gơs hơđang ală dà dờng.

⁴ Sap đơs Yàng Jehôwa dê gơs bềng gơnap gơnoar ngan; Sap đơs Yàng Jehôwa dê gơs bềng bơta ryŭ ryơm.

⁵ Sap đơs Yàng Jehôwa dê dơrpă ală chi pơnàng; Ngan, Yàng Jehôwa dơrpă ală chi pơnàng Liban dê.

⁶ Kơnràñ lơh Liban in sơnđoh be kơnrồ kòn dam, Siriôn sơnđoh be krŭ brồ dam.

⁷ Sap đơs Yàng Jehôwa dê lơh gơlik ală lơmpiat ồs.

⁸ Sap đơs Yàng Jehôwa dê lơh tiah ngềt ngơt in lơnggơr; Yàng Jehôwa lơh tiah ngềt ngơt Kades in lơnggơr.

⁹ Sap đơs Yàng Jehôwa dê lơh tòm cha in wañ lơnggơh, Mơ lơh rlồs jơh ală dơr brê; Tòm hìu duh khoai Kơnràñ dê jơh ală cau đơs lah: “Gơklŏ ngan!”

¹⁰ Yàng Jehôwa ơm di sơbàn hơđang dà kŏ; Ngan Yàng Jehôwa ơm di sơbàn bơtau jơl sùm sùm.

¹¹ Dan Yàng Jehôwa ai pràn kơldang làng bol Kơnràñ in; Dan Yàng Jehôwa ai bơta lơngap lơngai nàng ai lơngai làng bol Kơnràñ dê!