Đơs Crih 19 - Sră Goh 2018

Bơta gơklŏ Yàng Tom Trồ dê tòm trồ tiah mơ bơta boh lam

Jơnau Đơs Crih Dabit Cih. Ai Cau Lam Bồ Đơs Chò In Ngui

¹ Ală tap trồ yal tơlik bơta gơklŏ Yàng Tom Trồ dê, Bơta dờng ơnàng pah gòi dê ràng tơlik broă tê Kơnràñ lơh.

² Ngai do bơto yal ngai ne in, Mang do yal tơlik bơta git jak mang ne in.

³ Ò gơs jơnau yal, ò gơs jơnau đơs, Kung ò gơs cau lơi kơno sap đơs bol gơ sơl.

⁴ Bulah behơ̆, jơnau bơto yal ală tap trồ dê gơ lòt làm plai ù, Mơ jơnau đơs bol gơ dê gơ lòt làm jơh dunnia. Di tiah bol gơ Kơnràñ neh ơn mattơngai.

⁵ Mattơngai kung be cau bơrtơu pa tòmbau lik bơh ơdŭ khai dê, Mơ kung be cau pràn kơldang ntoat pơrlòng hòn chò.

⁶ Mattơngai lik bơh jơng trồ do, Lòt tus hơ jơng trồ ne; Ò gơs phan lơi geh pleh klàs bơh di bơta duh trơàl mattơngai dê.

⁷ Bơta boh lam Yàng Jehôwa dê la wil tơl, nàng bơtơl pràn tai hwềng soàn in; Jơnau sồr kràñ cê Yàng Jehôwa dê la kơ̆ nền, lơh cau ò hoan git in gơlik jak chài.

⁸ Ală jơnau sồr Yàng Jehôwa dê la sàng goh, lơh nùs in hòn chò; Bơta sồr lam Yàng Jehôwa dê la sàng goh, lơh mat in àng loh.

⁹ Bơta duh rngòt di Yàng Jehôwa la sàng goh, kòp rài gam sùm sùm; Ală jơnau gơnoar sồr Yàng Jehôwa dê la song ngan, mơ jơh ală la song ring lơm.

¹⁰ Ală bơta hơ̆ màng rlau mơ màh, ngan la màng rlau mơ oă màh ngan; Mơ kung lơngồt rlau mơ dà lơwe, rlau mơ dà bồ sing lơwe dê.

¹¹ Rlau mơ hơ̆, ală bơta hơ̆ kung bơto cau duh broă Yàng in git wă loh; Cau lơi prap gàr gen geh phan ƀàn dờng ngan.

¹² Mơya ñcau rgơi git ală bơta tìs nrah he dê taih? Dan Yàng toh ală bơta tìs añ ò git.

¹³ Dan kung sền gàr cau duh broă Yàng dê klàs bơh di bơta kòñ tìs tòm tồi glài; Dan bơta hơ̆ ò geh at bồ añ; Gen añ rơp ò gơs tiah geh lah pơrhơng, mơ ò tìs tòm glài dờng.

¹⁴ Ơ Yàng Jehôwa la lŭ klềr añ jê, mơ la Bơtau tơwài glài añ, Dan jơnau đơs bơr añ jê, Mơ bơta kơlôi sơnơng nùs añ jê kòñ geh niam nùs Kơnràñ.