Đơs Crih 18 - Sră Goh 2018

Jòng ro Yàng Jehôwa tài bơh geh pha rlau mơ cau sò tơm. Ai cau lam bồ đơs chò in ngui

Jơnau Đơs Crih cih bơh Dabit la dĭ gơna Yàng Jehôwa dê. Khai đơs ală jơnau do Yàng Jehôwa in tòm ngai Kơnràñ dong tă khai klàs bơh di tê jơh ală cau sò tơm, mơ bơh di tê Sol. Khai đơs lah:

¹ Ơ Yàng Jehôwa la bơta pràn kơldang añ jê, añ kòñ gơboh di Kơnràñ.

² Yàng Jehôwa la pơnai lŭ añ jê, tiah kìng crŭ añ jê, Bơtau dong tă añ, Yàng Tom Trồ añ, tòm Kơnràñ añ rơp kìng crŭ să añ, la bơta pràn kơldang añ. Kơnràñ kung la khèl añ jê, la gơnoar pràn bơta dong klàs añ jê, mơ la tiah kìng crŭ kơ̆ cê añ jê.

³ Añ hòi dan mơ Yàng Jehôwa la Bơtau pal jòng ro, Mơ añ geh dong klàs bơh di ală cau sò tơm di añ.

⁴ Ală che bơta chơt dê neh kơt gơrwàng añ, Dà tih bơta iơh bơsak dê gơhòr pràn ngan, lơh bòl glar añ in.

⁵ Ală che lơgar Làng ƀồc dê neh kơt gơrwàng añ, Ală dă bơta chơt dê gòc kup añ.

⁶ Tòm tŭ bòl glar kalke, añ neh hòi dan mơ Yàng Jehôwa; Añ hòi dan mơ Yàng Tom Trồ dong kòl añ. Tòm hìu duh khoai Kơnràñ dê, Kơnràñ kơno jơnau añ, Jơnau hòi dan añ jê tus tòm tồr Kơnràñ dê.

⁷ Tŭ hơ̆ ù lơnggơr mơ gơrơm, Mơnàng ală mơnơm kung gơwañ mơ lơnggơr, tài bơh Kơnràñ gơhào gơjrañ.

⁸ Ñhŭ par lik bơh di trồm muh Kơnràñ dê, Lơmpiat ồs sa loan lik bơh di bơr Kơnràñ dê, Mơ lơh chah in hơng.

⁹ Kơnràñ lơh sơrkềng ală tap trồ mơ mù, Hơđơm jơng Kơnràñ gơs bơta klam jơngo cik.

¹⁰ Kơnràñ hào ceruƀim mơ par, Kơnràñ par mhar hơđang pơnđar càl dê.

¹¹ Kơnràñ lơh bơta klam jơngo gơs phan jơm gòm Kơnràñ, Ngui ală mhwal jù gơs dà be kơrnìng cang Kơnràñ.

¹² Bơh di bơta àng gơklŏ ơm di đap Kơnràñ, gan di ală mhwal Kơnràñ dê, gơlik mìu piar mơ rnga ồs hơng.

¹³ Yàng Jehôwa kung lơh ntơr kơnàs hơđang ală tap trồ, Bơtau Hơđang Rlau Jơh lơh ntas nggồr Kơnràñ dê, Gơs mìu piar mơ rnga ồs hơng.

¹⁴ Kơnràñ pañ kam mơ lơh gơprah ală cau sò tơm di añ, tơlik oă puhlèp mơ lơh bol khai in rngòt mơ dô gơprah.

¹⁵ Ơ Yàng Jehôwa, bơh jơnau lah pơrhơng Kơnràñ dê, Bơh càl lik bơh di trồm muh Kơnràñ, Gen kơnàng dàlềng ràng tơlik, Mơ ală mơnàng dunnia gơtơlik gŏ jơh.

¹⁶ Bơh đang jòng Kơnràñ ai tê sơmbat añ, Tă añ lik klàs bơh di dà har.

¹⁷ Kơnràñ dong tă añ klàs bơh di cau sò tơm pràn kơldang, Klàs bơh di ală cau gơjrañ kơuềng di añ, bơh bol khai pràn rlau mơ añ.

¹⁸ Tòm ngai bòl glar kalke añ jê, bol khai brồ tus di añ; Mơya Yàng Jehôwa ơm đah mơ añ.

¹⁹ Kơnràñ cèng añ tus di tiah dờng ơnàng, Yàng dong tă añ tài bơh Kơnràñ gơboh di añ.

²⁰ Yàng Jehôwa neh ai phan ƀàn añ in jat be bơta song ring añ jê. Tơm wơl añ in jat be bơta sàng goh tê añ jê.

²¹ Bơh añ neh lơh jat nùs kòñ Yàng Jehôwa dê, ò lơh iơh bơsak mơ sang lòi Yàng Tom Trồ añ jê.

²² Bơh jơh ală jơnau gơnoar sồr Kơnràñ dê ơm di đap añ, Mơ jơnau sồr Kơnràñ dê añ ò sang lòi.

²³ Añ ò gơs tiah geh lah pơrhơng di đap Kơnràñ, Mơ añ kơrmap gàr să añ bơh di bơta tồi glài.

²⁴ Tài behơ̆ Yàng Jehôwa neh tơm wơl añ in jat be bơta song ring añ jê, Jat be bơta sàng goh tê añ jê di đap mat Kơnràñ.

²⁵ Gơwèt hơ cau dòn song, gen Yàng ràng tơlik Kơnràñ la dòn song; Gơwèt hơ cau wil tơl, gen Yàng ràng tơlik Kơnràñ la wil tơl.

²⁶ Gơwèt hơ cau sàng goh, gen Yàng ràng tơlik Kơnràñ la sàng goh; Ai gơwèt hơ cau sòdră, gen Yàng ràng tơlik Kơnràñ la kràñ cê.

²⁷ Bơh Yàng dong tă làng bol pơndêt să, Mơya tơmù mat cau pơnhừ să.

²⁸ Ngan, Yàng chu ồs di đèng añ jê; Jehôwa Yàng Tom Trồ añ jê sòl pơnđàng tòm bơta klam jơngo añ jê.

²⁹ Ngan, kơnòm dê Kơnràñ añ rgơi geh pha lin rlau mơ mpồl ling, Kơnòm dê Yàng Tom Trồ añ jê, añ rgơi lòt gan rlau di dơrñang ƀòn.

³⁰ Ai Yàng Tom Trồ, gùng dà Kơnràñ dê la wil tơl; Jơnau ho pơgon Yàng Jehôwa dê neh geh lòng la song ngan; Kơnràñ la khèl đo jơh ală cau lơi in kìng crŭ să he tòm Kơnràñ.

³¹ Rlau mơ Yàng Jehôwa, gen ñcau la Yàng Tom Trồ taih? Rlau mơ Yàng Tom Trồ bol he dê, gen ñcau la pơnai lŭ taih?

³² Yàng Tom Trồ kơt but añ mơ gơnoar pràn, mơ lơh gùng añ in gơs ring lơngai.

³³ Kơnràñ lơh jơng añ in sơrbac be jơng jùn me dê, Mơ ai añ in ntào kơ̆ hơđang ală tiah jơnhoa.

³⁴ Kơnràñ bơto tê añ tòmlơh, Tian gơs tơwòr tê añ rgơi wàr àtak mơ kòng.

³⁵ Yàng kung neh ai añ in khèl bơta dong klàs Kơnràñ dê, Tê ma Yàng dê đơng añ, Mơ bơta dong kòl Yàng dê neh lơh añ in gơlik màng ryŭ.

³⁶ Yàng neh pò ơnàng gùng tòm tiah cơnđòa añ jê, Jơng añ ò gơtòmsèng.

³⁷ Añ ting jat cau sò tơm di añ, mơ añ jat bàn; Añ ò rê wơl jơl tus di tŭ neh tơnroh bol khai.

³⁸ Añ srơp bluh bol khai, tian gơs bol khai ò rgơi guh tai; Bol khai gơpừ hơđơm jơng añ.

³⁹ Bơh Yàng neh kơt but añ in mơ bơta pràn kơldang nàng tòmlơh, Mơ lơh cau sòdră di añ, bol khai rngòt mhòt mhèt di đap añ.

⁴⁰ Yàng kung lơh cau sò tơm wèt ngkòi di añ, Mơ añ tơnroh ală cau gơjrañ kơuềng di añ.

⁴¹ Bol khai hòi, mơya ò gơs cau lơi dong tă bol khai; Bol khai hòi dan mơ Yàng Jehôwa, mơya Kơnràñ ò ho wơl.

⁴² Añ lơh bol khai lề be kơmbuh càl khồm pơrdô; Añ sơrbì bol khai be bŏ tòm gùng.

⁴³ Yàng neh dong tă añ bơh di bơta tòmpìt tòmhà mơ ală làng bol, Bơtào añ lam bồ ală lơgar; Dô làng bol añ ò mòng git neh duh broă añ.

⁴⁴ Tòm tŭ bol khai kơno đơs bơh añ gen bol khai dòn bơr añ; Ală cau làng bơdìh dòn duh añ dô bă rngòt.

⁴⁵ Ală cau làng bơdìh gơs nùs kìr rngòt, Rơm să lik bơh di tiah pồn să he dê.

⁴⁶ Yàng Jehôwa gam kis sùm; Pơnai Lŭ pal geh jòng ro añ jê. Dan Yàng Tom Trồ bơta dong klàs añ jê geh yò tơngguh.

⁴⁷ Hơ̆ la Yàng Tom Trồ Bơtau sal tê añ in, Mơ lơh ală làng bol in dòn duh añ.

⁴⁸ Kơnràñ dong tă añ klàs bơh di cau sò tơm di añ; Ngan Yàng neh yò tơngguh añ jòng rlau mơ ală cau sòdră di añ, Mơ dong tă añ bơh di cau jàñ bơsak.

⁴⁹ Tài behơ̆, ơ Yàng Jehôwa, añ rơp jòng ro Kơnràñ digùl ală làng bol, mơ đơs chò jòng ro sơnđan Kơnràñ dê.

⁵⁰ Yàng Jehôwa ai bơtau Kơnràñ in bơta pha lin rlau dờng ngan, Mơ ai bơta kòñ gơboh kơ̆ dơn bơtau geh bong mơñà Kơnràñ dê, Hơ̆ la ai Dabit in, mơ jơi bơtiàn khai in jơl tus sùm sùm.