Đơs Crih 17 - Sră Goh 2018

Hòi dan mơ Yàng dong tă bơh cau rồn bơklơn

Bơta hòi dan Dabit dê

¹ Ơ Yàng Jehôwa, dan iat bơta song ngan, ơn nùs di jơnau hòi añ jê; Dan wèt tồr iat jơnau hòi dan gơlik bơh sơndồi ò ma blac añ jê.

² Dan Yàng yal tơlik añ la song ring; Dan mat Kơnràñ sền sơwì bơta song ngan.

³ Dilah Yàng lòng sơwì nùs añ, còp añ tòm trồ mang, Dilah Yàng lòng añ, gen jòi ò bàn bơta iơh bơsak lơi ò; Bơr añ ò tìs glài.

⁴ Ai đah mơ broă jơi kòn mơnus dê, Añ kơnòm di jơnau đơs bơh sơndồi Yàng mơ sền gàr añ klàs bơh di ală gùng dà cau iơh bơsak dê.

⁵ Cơnđòa añ gam kơ̆ tòm ală gùng Yàng dê, Jơng añ ò gơtòmsèng.

⁶ Ơ Yàng Tom Trồ, añ hòi dan mơ Yàng, bơh Kơnràñ rơp dòp jơnau añ; Dan Yàng wèt tồr mơ iat jơnau añ.

⁷ Ơ Bơtau dong klàs ală cau kìng crŭ să he hơđơm tê ma Kơnràñ dê, Nàng khai in geh klàs bơh di cau sò tơm, Dan ràng tơlik dô bă crih crài bơta kòñ gơboh kơ̆ dơn Kơnràñ dê.

⁸ Dan Yàng sền gàr añ be gar mat tòm mat Kơnràñ dê; Dan jơm añ tòm tiah mƀur pơnđar Yàng dê.

⁹ Nàng añ klàs bơh di cau iơh bơsak rồn bơklơn añ, klàs di cau sò tơm chơt gơrwàng gùt dar añ.

¹⁰ Bol khai sềt nùs bol khai dê nàng nđàc sơngit; Bơr bol khai đơs dô bă pơnhừ să.

¹¹ Bol khai cơnđòa jă di añ, tŭ do bol khai gơrwàng añ, Mat bol khai kơp sền òm nàng lơh tòmpừ añ tòm ù.

¹² Bol khai tòm toh be klìu triă ngac ngar kơp crè sa phan gơ neh kup, Be klìu triă brồ dam kơp mòc tòm tiah ndơp ndơr.

¹³ Ơ Yàng Jehôwa, dan guh, ơm tòm toh mat mơ bol khai mơ tuh tơlup bol khai; Dan ngui đào Kơnràñ dê mơ dong tă bơta kis añ klàs bơh di cau iơh bơsak.

¹⁴ Ơ Yàng Jehôwa, dan ngui tê Kơnràñ dong tă añ klàs bơh di kòn mơnus, klàs bơh di kòn mơnus la cau gơs pơnah mìng tòm bơta kis tòm dunnia do; dan kơndul bol khai geh bềng ală phan Kơnràñ neh prap lòi bol khai in; dan kòn sau bol khai in kung dòp geh tơngkah tơngkañ, mơ lòi wơl ală pơnah gam tơngkah rài tơnơ̆ in.

¹⁵ Ai añ, añ rơp sền gŏ mat Kơnràñ dê tòm bơta song ring. Tòm tŭ añ kah rngal, añ rơp hừh nùs mơ sền gŏ rùp să Yàng dê.