Đơs Crih 149 - Sră Goh 2018

Bơto tơngkah làng bol Israel pal jòng ro Yàng Jehôwa

¹ Jòng ro Yàng Jehôwa! Đơs chò tĕ Yàng Jehôwa in dô bơta đơs chò pa! Jòng ro Kơnràñ tòm mpồl jơnum cau dòn song dê!

² Lòi Israel in hòn chò di Bơtau crơng gơs khai, Lòi kòn sau Siôn dê chò hòp di Bơtau at bồ bol khai dê!

³ Lòi bol khai tòmya mơ jòng ro sơnđan Kơnràñ dê, Ngui sơnggơr dềt mơ kơñi pĕ nàng jòng ro Kơnràñ!

⁴ Bơh Yàng Jehôwa niam nùs di làng bol Kơnràñ dê; Kơnràñ bơka cau pơndêt să in mơ bơta pha lin.

⁵ Lòi ală cau dòn song hòn chò tòm bơta gơklŏ, Lòi bol khai đơs chò hòn chò hơđang cơnòng bic bol khai dê.

⁶ Lòi bơta jòng ro niam rlau jơh Yàng Tom Trồ dê gơ ơm tòm ngko bol khai dê, Mơ gơs đào bàr đah mat tòm tê bol khai dê,

⁷ Nàng sal tê di ală lơgar Mơ lơh glài tơmàl ală làng bol,

⁸ Nàng tơndò ală cau bơtau bol khai dê mơ ơnuh gơsàng, Cap ală cau ryŭ ryơm bol khai dê mơ che sreng lòs,

⁹ Tồ lơh gơlik gơs bol khai in jat bơta lơh nền tòm bơta cahrña. Do la bơta gơklŏ jơh ală cau dòn song Kơnràñ dê. Jòng ro Yàng Jehôwa!