Đơs Crih 146 - Sră Goh 2018

Jòng ro Yàng Jehôwa bơh Kơnràñ dong kòl

¹ Jòng ro Yàng Jehôwa! Ơ hwềng soàn añ jê, jòng ro tĕ Yàng Jehôwa!

² Añ rơp jòng ro Yàng Jehôwa kàr lơi añ gam kis; Añ rơp đơs chò jòng ro Yàng Tom Trồ añ jê jơl jơh rài kis añ jê.

³ Bañ dòn kơnòm di ală kwang bàng, bañ dòn kơnòm di kòn mơnus, la cau ò rgơi dong kòl.

⁴ Tòm tŭ nhơm tă ò gam, gen khai rê wơl hơ kơmbuh ù; tòm ală ngai hơ̆ bơta kơlôi rcang bol khai dê roh thit.

⁵ Lơngai cau lơi in gơs Yàng Tom Trồ Jakôp dê dong kòl khai, La cau gơn kơnòm di Jehôwa Yàng Tom Trồ khai dê.

⁶ Kơnràñ la Bơtau crơng gơs trồ mơ tiah, Dàlềng, mơ jơh ală phan tòm hơ̆; Kơnràñ dòn song sùm sùm.

⁷ Kơnràñ cahrña song ring ală cau kòl rồn bơklơn in, Mơ ai phan sa cau jơgloh in. Yàng Jehôwa hồ toh cau kòl ơm jàm.

⁸ Yàng Jehôwa pò mat cau jơngo in, Yàng Jehôwa pò tơngguh ală cau kun tơnliah, Yàng Jehôwa kòñ gơboh di cau song ring.

⁹ Yàng Jehôwa sền gàr cau nac crih, Yò đo cau ùr bơnrau mơ cau kòn đòi, Mơya Kơnràñ rơp tơnroh gùng dà cau iơh bơsak dê.

¹⁰ Yàng Jehôwa rơp at bồ sùm sùm; Ơ Siôn, Yàng Tom Trồ mê dê la Bơtau jơl jơh ală rài. Jòng ro Yàng Jehôwa!