Đơs Crih 143 - Sră Goh 2018

Hòi dan mơ Yàng dong klàs bơh di cau sò tơm

Jơnau Đơs Crih Dabit cih

¹ Ơ Yàng Jehôwa, dan iat jơnau hòi dan añ jê, wèt tồr iat bơta rac dan añ jê. Tài bơh bơta dòn song mơ bơta song ring Yàng dê, dan ho wơl añ in.

² Dan bañ cahrña di cau duh broă Kơnràñ dê, Bơh ò gơs cau kis lơi la song ring di đap Yàng.

³ Cau sò tơm neh ting jat añ, Jă trơm bơta kis añ tòm ù; Khai lơh añ in ơm di tiah klam jơngo, be cau neh chơt jŏ rau.

⁴ Gen tàng hwềng soàn añ bòl glar tòm añ, nùs añ rngòt rngơt tòm añ.

⁵ Añ kah wơl ală ngai yau òr, Añ kơlôi bơh ală bơta Yàng neh lơh, Mơ kơlôi sơnơng bơh ală broă tê Yàng lơh.

⁶ Añ pò tê wèt hơ Yàng, Hwềng soàn añ tơhìr Yàng be tiah rañ ro. (Selah)

⁷ Ơ Yàng Jehôwa, dan mhar ho wơl jơnau añ jê! Hwềng soàn añ gơplơ̆! Dan bañ pồn mat Yàng dê bơh añ, Rngòt añ gơlik gơs be ală cau mù tòm bơtô.

⁸ Tòm àng drim, dan ai añ in kơno bơta kòñ gơboh kơ̆ dơn Yàng dê, Bơh añ dòn kơnòm di Yàng. Dan bơto añ in git gùng dà añ pal lòt, Bơh hwềng soàn añ tơnggòr sền Yàng.

⁹ Ơ Yàng Jehôwa, dan dong tă añ klàs bơh cau sò tơm añ jê; Bơh añ neh ntoat tus hơ Yàng nàng kìng crŭ.

¹⁰ Dan bơto añ lơh jat nùs kòñ Yàng dê, Bơh Kơnràñ la Yàng Tom Trồ añ jê; Dan Hwềng Goh Yàng dê tề lam añ tòm gùng ring drik.

¹¹ Ơ Yàng Jehôwa, tài bơh sơnđan Kơnràñ, dan sền gàr bơta kis añ jê; Bơh bơta song ring Kơnràñ dê, dan tă añ lik klàs bơh bơta gơlòng bòl glar.

¹² Bơh bơta kòñ gơboh kơ̆ dơn Yàng dê, dan tơnchơt ală cau sò tơm di añ, Mơ tơnroh jơh ală cau rồn bơklơn añ, Bơh añ la cau duh broă Kơnràñ dê.