Đơs Crih 137 - Sră Goh 2018

Bơta moat jrùng ală cau kòl kup cèng hơ lơgar Babilôn

¹ Bol hi ơm nggui di gah ală hiòng tòm lơgar Babilôn, Mơ ñìm tòm tŭ kah wơl Siôn.

² Bol hi yồng kơñi pĕ bol hi dê Hơđang chi nrài dà tềng hơ̆.

³ Ală cau neh kup bol hi sồr bol hi đơs chò tềng hơ̆, Ală cau lơh bòl glar di bol hi sồr bol hi lơh chò hòp, mơ đơs lah: “Đơs chò tĕ bol hi in dô bơta đơs chò Siôn dê!”

⁴ Mbe bol hi rgơi đơs chò bơh Yàng Jehôwa Tòm lơgar bơdìh taih?

⁵ Ơ Jerusalem, dilah añ hŭi mê, Dan tê ma añ hŭi bơta chài rgơi pĕ kơñi.

⁶ Dilah añ ò kah mê, dilah añ ò ơn Jerusalem hơđang bơta hòn chò jơnhoa rlau jơh añ jê, gen lòi lơmpiat añ jê gơđềt di tòm dò añ jê.

⁷ Ơ Yàng Jehôwa, dan kah tòmdră mơ ală cau Edôm, tòm ngai Jerusalem kòl tơrlơm, Bol khai đơs lah: “Phà tơrlah tĕ, phà tơrlah tĕ! Tơmù tus di ală mơnàng gơ dê!”

⁸ Ơ kòn ùr Babilôn, la cau neh lơh tơnroh, Lơngai cau lơi in sal tê di ai ală bơta ai neh lơh di bol hi!

⁹ Lơngai cau lơi in kup ală kòn dềt ai dê, Cèng glơm tơnlề bol khai di lŭ!