Đơs Crih 132 - Sră Goh 2018

Dan Yàng Jehôwa ai lơngai lơngò tiah sàng goh in

Bơta đơs chò tơngguh hơđang

¹ Ơ Yàng Jehôwa, dan kòñ nđàc mơ kah wơl Dabit, Bal mơ jơh ală bơta bòl glar khai neh kong.

² Mbe lơi khai srat să mơ Yàng Jehôwa, Mơ ho nền mơ Bơtau Gơnap Gơnoar Dờng Jakôp dê lah:

³ “Añ ò mut tòm hìu añ jê, Hala guh di cơnòng bic añ jê;

⁴ Añ rơp ò ai mat añ in bic, Hala ai sơmbir mat añ jê geh lơhă bic,

⁵ Jơl tus di tŭ añ jòi geh dô bă tiah Yàng Jehôwa in, Dô bă tiah ơm Bơtau Gơnap Gơnoar Dờng Jakôp dê!”

⁶ Ne, bol he neh kơno bơh Đài Bơta Ho Bal tòm Ephrat, bol he neh bàn gơtòm ƀlàng sre Jaar.

⁷ “Bol he lòt lă tus hơ tiah ơm Kơnràñ dê; Bol he duh khoai tĕ di kơrnòl jơng Kơnràñ dê!”

⁸ Ơ Yàng Jehôwa, dan guh mơ lòt tus hơ tiah rlô Kơnràñ dê, Kơnràñ bal mơ Đài Ho Bal gơnoar pràn Kơnràñ dê.

⁹ Lòi ală cau gơnoar ơn phan duh khoai Yàng dê geh soh mơ bơta song ring, Mơ lòi ală cau dòn song Kơnràñ dê driau bơh hòn chò.

¹⁰ Tài bơh Dabit, la cau duh broă Yàng dê, Dan bañ wèt mat Yàng ngài bơh cau geh bong mơñà Kơnràñ dê.

¹¹ Yàng Jehôwa neh srat să ho nền mơ Dabit, Kơnràñ rơp ò tŭ lơi tòmgơl, mơ đơs lah: “Añ rơp ơn hơđang sơbàn mê dê dô nă kòn tòm mê dê.

¹² Dilah kòn sau mê dê prap gàr bơta ho bal Añ jê, Mơ ală jơnau sồr kràñ cê mơ Añ rơp bơto bol khai, Gen kòn sau bol khai dê kung rơp nggui hơđang sơbàn mê dê jơl sùm sùm.”

¹³ Bơh Yàng Jehôwa neh sac rwah Siôn, Kơnràñ kòñ Siôn lơh gơs tiah ơm Kơnràñ dê, mơ lah:

¹⁴ “Do la tiah rlô Añ jê jơl sùm sùm; Añ rơp ơm tềng do, bơh Añ kòñ behơ̆.

¹⁵ Añ rơp ai lơngai lơngò Siôn in geh phan ngui sa tơngkah tơngkañ, Añ rơp ai ală cau rƀah lơòi gơ in geh piang sa hòm lai.

¹⁶ Añ rơp ai bơta dong klàs mơ tơnsoh ală cau gơnoar ơn phan duh khoai gơ in, Mơ ală cau dòn song gơ dê rơp driau bơh hòn chò.

¹⁷ Tềng hơ̆ Añ rơp lơh ngke Dabit dê gơhòn dờng; Añ neh rcang dô nơm ồs đèng cau geh bong mơñà Añ jê.

¹⁸ Añ rơp ai bơta ƀàssìl tơnsoh cau sò tơm di khai, mơya hơđang bồ khai, sơgơn bơtau khai dê rơp geh àng gơcrà.”