Đơs Crih 116 - Sră Goh 2018

Jơnau ưnngài Yàng bơh neh geh dong klàs bơh bơta chơt

¹ Añ kòñ gơboh di Yàng Jehôwa, tài bơh Kơnràñ neh kơno añ Mơ jơnau rac dan añ jê.

² Tài bơh Kơnràñ neh wèt tồr iat añ, Gen tàng añ rơp hòi dan mơ Kơnràñ jơl jơh rài kis añ jê.

³ Bơta chơt be dă pơt gùt dar añ, añ gơtìp bơta jê sồt lơgar Làng ƀồc dê; Añ kong bơta bòl glar mơ bơta moat jrùng ò git lơh.

⁴ Gen añ hòi dan di sơnđan Yàng Jehôwa lah: “Ơ Yàng Jehôwa, añ hòi dan, dan dong klàs bơta kis añ jê.”

⁵ Yàng Jehôwa gơs nùs kòñ nđàc, mơ la song ring, Yàng Tom Trồ bol he dê gơs nùs nđàc sơngit.

⁶ Yàng Jehôwa sền gàr cau gơs nùs song ngan; Tòm tŭ añ lơbơn òsô, gen Kơnràñ dong klàs añ.

⁷ Ơ hwềng soàn añ jê, rê wơl tĕ di tiah rlô bol mê dê, Tài bơh Yàng Jehôwa neh gơwèt niam mơ mê.

⁸ Bơh Yàng neh dong hwềng soàn añ klàs chơt, Mat añ klàs gơhòr dà, jơng añ klàs gơtup pừ.

⁹ Añ lòt di đap Yàng Jehôwa Tòm lơgar cau kis dê.

¹⁰ Añ neh prap gàr bơta dòn añ jê, bulah behơ̆ añ kung đơs lah: “Añ kong bòl glar moat jrùng ò git lơh.”

¹¹ Tòm tŭ añ rngòt rngơt añ đơs lah: “Jơh tơl nă cau la blac pơrlồm lơm.”

¹² Ñchi phan añ rơp tơm wơl Yàng Jehôwa in taih? Bơh jơh ală bơta dờng ơnàng Kơnràñ neh lơh añ in.

¹³ Añ rơp yò mơngàn bơta dong klàs, Mơ hòi dan di sơnđan Yàng Jehôwa.

¹⁴ Di đap jơh làng bol Kơnràñ dê, Añ rơp tơm Yàng Jehôwa in ală bơta añ neh ho pơgon.

¹⁵ Bơta chơt ală cau sàng goh Yàng Jehôwa dê La dờng màng di đap Kơnràñ.

¹⁶ Ơ Yàng Jehôwa, añ la cau duh broă Kơnràñ dê; Añ la cau duh broă Kơnràñ dê, kòn ùr kòn klau cau ùr duh broă Kơnràñ dê. Kơnràñ neh hồ che cap añ.

¹⁷ Añ rơp ơn Yàng in phan ơn duh khoai nàng ưnngài Kơnràñ, Mơ hòi dan di sơnđan Yàng Jehôwa.

¹⁸ Di đap jơh làng bol Kơnràñ dê, Añ rơp tơm Yàng Jehôwa in ală bơta añ neh ho pơgon.

¹⁹ Tòm ƀlàng jơng hìu, hìu duh khoai Yàng Jehôwa dê, Ơm digùl mê, ơ Jerusalem. Jòng ro tĕ Yàng Jehôwa!