Đơs Crih 115 - Sră Goh 2018

Tòm pơndròm rùp ràk mơ Yàng Tom Trồ

¹ Ơ Yàng Jehôwa, ò di gơrê mơ bol hi, mơya bơta gơklŏ gơrê mơ sơnđan Kơnràñ dê. Bơh bơta kòñ gơboh kơ̆ dơn mơ bơta dòn song Kơnràñ dê, Pal gơrê mơ sơnđan Kơnràñ.

² Ñchi bơh tài ală làng bol đơs lah: “Ntềng đah Yàng Tom Trồ bol khai dê taih?”

³ Yàng Tom Trồ bol hi dê ơm hơđang ală tap trồ; Kơnràñ lơh bơta lơi di nùs Kơnràñ.

⁴ Rùp ràk bol khai lơh mơ priă mơ màh, La broă bơh tê cau lơh gơs.

⁵ Rùp ràk gơs bơr mơ ò đơs, Gơs mat mơ ò gŏ,

⁶ Gơs tồr mơ ò kơno, Gơs muh mơ ò git ƀô,

⁷ Gơs tê mơ ò git ƀư, Gơs jơng mơ ò git lòt, Rnồng dò gơ dê ò gơs ntas lơi.

⁸ Cau lơi lơh gơs rùp ràk mơ jơh ală cau dòn kơnòm di gơ, Gen gơlik gơs ndròm be gơ sơl.

⁹ Ơ cau Israel, dòn kơnòm tĕ di Yàng Jehôwa! Kơnràñ la Bơtau dong kòl mơ kung be la khèl đo bol khai dê.

¹⁰ Ơ hìu nhă Arôn, dòn kơnòm tĕ di Yàng Jehôwa! Kơnràñ la Bơtau dong kòl mơ kung be la khèl đo bol khai dê.

¹¹ Ơ ală cau duh rngòt di Yàng Jehôwa, dòn kơnòm tĕ di Yàng Jehôwa! Kơnràñ la Bơtau dong kòl mơ kung la khèl đo bol khai dê.

¹² Yàng Jehôwa neh kah bol hi; Kơnràñ rơp ai lơngai lơngò bol hi in, Ai lơngai lơngò hìu nhă Israel in, Kung rơp ai lơngai lơngò hìu nhă Arôn in sơl.

¹³ Kơnràñ rơp ai lơngai lơngò ală cau lơi in duh rngòt di Yàng Jehôwa, Cau dềt hala cau dờng kung behơ̆ sơl.

¹⁴ Dan Yàng Jehôwa bơtơl bơta lơngai mê in, bol mê in mơ ală kòn sau mê in sơl!

¹⁵ Dan Yàng Jehôwa la Bơtau crơng gơs trồ tiah, ai lơngai lơngò mê in!

¹⁶ Ală tap trồ gơrê mơ Yàng Jehôwa, Mơya plai ù gen Kơnràñ neh ai kòn sau jơi kòn mơnus in.

¹⁷ Ală cau chơt ò jòng ro Yàng Jehôwa, ală cau mù tòm lơgar ngềt ngơt kung behơ̆ sơl.

¹⁸ Mơya bol hi rơp jòng ro Yàng Jehôwa, Bơh tŭ do jơl tus sùm sùm. Jòng ro Yàng Jehôwa!