Đơs Crih 108 - Sră Goh 2018

Jơnau jòng ro mơ hòi dan mơ Yàng Tom Trồ ai bơta pha lin rlau

Jơnau Đơs Crih Dabit cih

¹ Ơ Yàng Tom Trồ, nùs añ kơ̆ cê, nùs añ kơ̆ cê! Añ rơp đơs chò, ngan, añ rơp đơs chò jòng ro! Ơ hwềng soàn añ jê, kah rngal tĕ!

² Ơ kơñi rơs mơ kơñi pĕ, kah rngal tĕ! Añ rơp pơrlai àng drim kah rngal!

³ Ơ Yàng Jehôwa, añ rơp ưnngài Kơnràñ digùl ală làng bol, Añ rơp đơs chò jòng ro Kơnràñ tòm ală lơgar.

⁴ Bơh bơta kòñ gơboh kơ̆ dơn Kơnràñ dê dờng mơ jơnhoa rlau mơ ală tap trồ, Bơta song ngan Kơnràñ dê tus hơ ală mhwal.

⁵ Ơ Yàng Tom Trồ, dan Yàng geh yò tơngguh jơnhoa rlau mơ ală tap trồ! Dan bơta gơklŏ Kơnràñ dê geh làm jơh plai ù!

⁶ Dan Yàng ai tê ma pha lin Kơnràñ dê mơ ho wơl añ in, Tồ cau kòñ gơboh Kơnràñ dê geh dong tă.

⁷ Yàng Tom Trồ neh ho pơgon tòm tiah sàng goh Kơnràñ dê lah: “Añ rơp hừh nùs mơ tòmpà ƀòn Sicem mơ was sơnoa pơnah thòng Sukôt.

⁸ Galaat la bal mơ Añ, Manase kung behơ̆ sơl; Epraim kung be la sơgơn lòs Añ jê; Juda be la gai gơnoar at bồ Añ jê.

⁹ Lơgar Môap be la thao ƀàk um rào Añ jê; Añ sơrbì gơltau jă Añ jê hơđang lơgar Edôm; Añ driau chò bơh pha lin rlau mơ lơgar Philistin.”

¹⁰ Ñcau rơp lam añ mut tòm ƀòn dờng kơ̆ cê? Ñcau rơp lam añ lòt tus hơ lơgar Edôm taih?

¹¹ Ơ Yàng Tom Trồ, Kơnràñ ò di neh sang lòi bol hi ò ơ? Ơ Yàng Tom Trồ, Kơnràñ ò tai lòt bal mơ ală mpồl ling bol hi dê nàng tòmlơh.

¹² Dan Yàng dong kòl bol hi tòmdră mơ cau sò tơm, Bơh bơta dong kòl kòn mơnus dê la ò kwơ.

¹³ Kơnòm dê Yàng Tom Trồ bol hi rơp tòmlơh dô bă khin cha, Bơh să tòm Kơnràñ rơp jă ală cau sò tơm di bol hi.