Đơs Crih 105 - Sră Goh 2018

Ală broă crih crài Yàng Jehôwa dê neh lơh làng bol Israel in

¹ Ưnngài tĕ Yàng Jehôwa, hòi dan tĕ dê sơnđan Kơnràñ, Yal pơnro tĕ digùl ală làng bol bơh ală broă Kơnràñ dê.

² Đơs chò tĕ Yàng in, đơs chò tĕ jòng ro Kơnràñ, Yal tĕ bơh jơh ală broă crih crài Kơnràñ dê!

³ Jòng tĕ să he bơh sơnđan sàng goh Kơnràñ dê; Lòi nùs ală cau lơi jòi jat Yàng Jehôwa gen geh hòn chò!

⁴ Jòi jat tĕ Yàng Jehôwa mơ bơta pràn kơldang Kơnràñ dê, Jòi jat tĕ muh mat Kơnràñ dê sùm.

⁵ Ơ jơi bơtiàn Abraham dê, la cau duh broă Kơnràñ dê, Ơ kòn sau Jakôp dê la cau Kơnràñ sac rwah,

⁶ Kah tĕ ală broă crih crài Kơnràñ neh lơh, Ală bơta krơi Kơnràñ dê, mơ ală jơnau cahrña mơ bơr Kơnràñ neh đơs.

⁷ Kơnràñ la Jehôwa Yàng Tom Trồ bol he dê; Bơta cahrña Kơnràñ dê gơs làm jơh plai ù.

⁸ Kơnràñ kah bơta ho bal Kơnràñ dê sùm sùm, Ò hŭi jơnau nting sồr Kơnràñ dê jơl tus di dô rbô rài.

⁹ Hơ̆ la bơta ho bal mơ Kơnràñ neh bơtào gơs mơ Abraham, La jơnau Kơnràñ neh srat să ho pơgon mơ Isak.

¹⁰ La jơnau Kơnràñ neh lơh nền mơ Jakôp be dô jơnau sồr, Lơh nền mơ Israel be dô bơta ho bal gam sùm sùm.

¹¹ Mơ đơs lah: “Añ rơp ai mê in lơgar Kanaan Lơh gơs sre brê bol mê in.”

¹² Tŭ hơ̆ bol khai mìng la dô mpồl dềt lơm, Ò gơs dờng màng, mơ la cau nac crih tòm lơgar.

¹³ Bol khai lòt bơh làng bol do tus hơ làng bol ne, Bơh lơgar do tus hơ lơgar ndai.

¹⁴ Kơnràñ ò ai cau lơi rồn bơklơn bol khai; Kơnràñ lah pơrhơng ală cau bơtau tài bơh bol khai,

¹⁵ Mơ đơs lah: “Bañ ƀư di ală cau kong bong mơñà Añ jê, Bañ lơh iơh dê ală cau gơnoar hwơr Añ jê!”

¹⁶ Tòm tŭ Kơnràñ tơndùh bơta jơgloh rung tòm lơgar, Mơ ò ai phan sa bol khai in,

¹⁷ Gen Kơnràñ sồr dô nă cau lòt lài mơ bol khai, La Jôsep kòl tac lơh gơs dĭ gơna.

¹⁸ Jơng khai dê kong sồt bơh che sreng, Ngko khai dê kong đò gơsàng lòs.

¹⁹ Jơnau Yàng Jehôwa dê lòng khai, Jơl tus di tŭ bơta khai neh đơs geh gơlik di ngan.

²⁰ Cau bơtau sồr hồ toh khai, Bơtau at bồ ală làng bol ai khai in geh khat gơboh.

²¹ Cau bơtau pồ bơtào khai lơh gơs cau at bồ hìu nhă cau bơtau dê, Lơh gơs cau kwang at bồ jơh ală phan mơna khai dê,

²² Nàng sồr ală cau kwang dờng jat nùs khai dê, Mơ bơto bơta jak chài ală cau kwang kra in.

²³ Gen tŭ hơ̆ Israel mù hơ Ejiptơ; Jakôp ơm ing tòm lơgar Cam.

²⁴ Yàng Jehôwa lơh làng bol Kơnràñ dê sơlo gơbơtơl oă tai, Lơh bol khai in gơlik pràn kơldang rlau mơ ală cau sò tơm di bol khai.

²⁵ Kơnràñ tòmgơl nùs cau Ejiptơ nàng gơjrañ kơuềng di làng bol Kơnràñ dê, Mơ bơtào kai lơh iơh di ală cau duh broă Kơnràñ dê.

²⁶ Kơnràñ sồr Môise la cau duh broă Kơnràñ dê, Mơ Arôn la cau Kơnràñ neh sac rwah.

²⁷ Bol khai lơh ală tềl is Kơnràñ dê digùl lơgar Ejiptơ, Mơ lơh ală bơta krơi tòm lơgar Cam.

²⁸ Kơnràñ tơndùh bơta jơngo mơ lơh lơgar in klam jơngo, Mơ bol khai gam tòmdră mơ jơnau Kơnràñ dê.

²⁹ Kơnràñ pơrgơl dà bol khai dê gơlik gơs mhàm, Mơ tơnchơt jơh ka bol khai dê.

³⁰ Lơgar bol khai dê gơtơnggơs oă ngan kit làm jơh, Tus di ơdŭ cau bơtau dê kung gơs sơl.

³¹ Kơnràñ đơs, gen gơs sơmac lòt tus mơ mpồl, Mơ sơmềt gơs làm jơh tòm lơgar bol khai dê.

³² Kơnràñ tơndùh mìu piar ala mìu, Mơ sồr ồs sa jơh lơgar.

³³ Kơnràñ tơnroh suơn ño mơ chi ƀal, Lơh pă jơh chi che tòm kơnhwàl lơgar bol khai dê.

³⁴ Kơnràñ đơs, gen tus srah nting, Mơ srah par tus oă ngan ò git nđò;

³⁵ Gơ sa jơh ală chi ñhơt tòm lơgar, Mơ sa plai đo ù tiah bol khai dê.

³⁶ Kơnràñ tơnchơt jơh ală kòn klau tơnhoa tòm lơgar, Hơ̆ la jơh ală kòn deh sơnròp bol khai dê.

³⁷ Chòp Kơnràñ lam làng bol Israel lik lòt mơ cèng bal priă mơ màh; Ò gơs cau lơi tòm ală jơi bơtiàn làng bol Kơnràñ dê gơplơ̆.

³⁸ Lơgar Ejiptơ gơs bơta chò hòp tòm tŭ làng bol Israel lik lòt, Tài bơh bơta rngòt rngơt dê làng bol hơ̆ neh tơndùh hơđang bol khai.

³⁹ Kơnràñ ai mhwal jơm gòm bol khai, Mơ tòm trồ mang ai ồs nàng pơnđàng sòl.

⁴⁰ Bol khai dan, gen Kơnràñ sồr ală sềm rgut tus, Mơ ai piang lă bơh đang trồ bol khai in dô bă tơngkah tơngkañ.

⁴¹ Kơnràñ lơh bơcah pơnai lŭ, gen dà hòr lik pràn ngan; Gơhòr be dô nơm hiòng tòm ƀlàng bràs.

⁴² Kơnràñ kah wơl jơnau ho pơgon sàng goh Kơnràñ dê, Mơ kah Abraham la cau duh broă Kơnràñ dê.

⁴³ Kơnràñ tề lam làng bol Kơnràñ dê lik lòt dô bă hòn chò, Tề lam cau Kơnràñ sac rwah bal mơ bơta đơs chò.

⁴⁴ Kơnràñ ai gòi bol khai in ù tiah ală làng bol dê, Bol khai dòp geh cồng nha tơngai broă ală làng bol hơ̆ dê,

⁴⁵ Tồ bol khai in prap gàr ală jơnau sồr Kơnràñ dê, Mơ lơh jat ală bơta boh lam Kơnràñ dê. Jòng ro Yàng Jehôwa!