Đơs Crih 10 - Sră Goh 2018

Hòi dan mơ Yàng dong tă bơh ală cau sò tơm

¹ Ơ Yàng Jehôwa, ñchi bơh tài Kơnràñ ntào ngài taih? Ñchi bơh tài Kơnràñ pồn să tòm tŭ bòl glar taih?

² Cau iơh bơsak, bơh nùs pơnhừ să lơh iơh di cau rƀah. Bol khai gơkòl tòm kai gơrmơ̆i bol khai neh bơtào gơs.

³ Bơh cau iơh bơsak jòng să bơh nùs hàm kòñ khai dê; Cau hàm hà phan mơna sang lòi Yàng Jehôwa, mơ lah sơrpah Kơnràñ.

⁴ Cau iơh bơsak lơh muh mat pơnhừ să đơs lah: “Yàng Tom Trồ rơp ò jòi bàn;” Jơh ală bơta kơlôi sơnơng khai dê la: “Ò gơs Yàng Tom Trồ.”

⁵ Ală gùng dà khai dê geh bơtoah bơtoài sùm; Bơta cahrña Yàng dê jòng ngan, mat khai ò rgơi sền gŏ; Khai sền òsơp di jơh ală cau sò tơm di khai.

⁶ Khai kơlôi lah: “Añ rơp ò wañ lơnggơh; Tòm jơh ală rài añ rơp ò gơtìp bơta bòl glar lơi.”

⁷ Bơr khai dê bềng bơta srat rma, bơta blac chừt, mơ rồn bơklơn; Hơđơm lơmpiat khai mìng gơs bơta lơh iơh mơ bơta tồi glài iơh bơsak.

⁸ Khai nggui tòm tiah kơp mòc tòm ƀòn, tơnchơt cau ò gơs glài tòm tiah ndơp ndơr. Mat khai sền òm di cau òsô.

⁹ Khai ơm kơp tòm tiah ndơp ndơr, be klìu triă tòm tiah ơm gơ dê; Khai kơp mòc nàng kup cau rƀah, Tòm tŭ khai hwài cau rƀah tơmut tòm bơtơng khai dê.

¹⁰ Khai pìn mơ kơp brồ, mơ cau òsô gơkòl kup tòm nđias khai dê.

¹¹ Khai kơlôi lah: “Yàng Tom Trồ neh hŭi rau, Kơnràñ neh pơndơp mat, rơp ò gơs tŭ lơi sền gŏ.”

¹² Ơ Yàng Jehôwa! Dan guh; Ơ Yàng Tom Trồ, dan pò tê Kơnràñ dê; Bañ hŭi cau kong gơlòng bòl glar.

¹³ Ñchi bơh tài cau iơh bơsak lah sơrpah Yàng Tom Trồ Mơ kơlôi lah: “Yàng rơp ò gơs tŭ lơi khào lùp taih?”

¹⁴ Yàng neh gŏ rau; ngan, Yàng sền sơwì bơta lơh iơh mơ bơta bòl glar jê sồt, Nàng ai tê tòm Kơnràñ dê mơ sal wơl. Ai cau òsô gen rơp jào să he Yàng in; Yàng la Bơtau dong kòl cau kòn đòi.

¹⁵ Dan Yàng dơrpă tê cau iơh bơsak mơ iơh rmơh; ting jat bơta iơh jơl tus di tŭ ò gŏ tai.

¹⁶ Yàng Jehôwa la Bơtau at bồ jơl sùm sùm ò git lồi; Ală làng bol rơp gơkòl tơnroh thit bơh di lơgar Kơnràñ dê.

¹⁷ Ơ Yàng Jehôwa, Kơnràñ rơp kơno jơnau kơp kòñ cau niam lơnhơn dê; Yàng rơp lơh nùs bol khai in kơ̆ cê, mơ kung rơp ai tồr iat,

¹⁸ Nàng cahrña dô bă song ngan broă cau kòn đòi dê, mơ cau gơkòl rồn bơklơn, Tồ kòn mơnus in, la cau neh bơh ù mơ lik, gen ò rgơi lơh cau in rngòt rngơt tai.