UPIBAN 2 - KARÚK-PËRIM KAWALU Nouveau Testament

Uletar pa Ngëriisia ngan ci ngunk di Efeesu

¹ Picari uwaanju Ngëriisia ngan ci ngunk di Efeesu, ja: “Kantsijëna ngëpesaj paaj ngun ni ulon tsi kariirul, ni ka yandaar unk tsi pëncuaf ipafëni ngëlamp paaj yun ni kalon, i leempëna yunk uwëru, pi ci pun pi na ja pi:

² ‘Ma me ngi m ja ngi m doon kuu ro, man me uleempu ni mtambandaru; a me m yëlaants pëmiira baro-ngëjuatsal. M teenaman ba nja biki bërier bukul bë ci bapostolu te bë cits, a m win ba ci batsup.

³ M tambandar a m miira, undo katim nji, a m wëtats pëtambandar.

⁴ Maa mán leentsaru tsi uleka ko wi: M wëtan bëŋalu, bëcak.

⁵ Bi u ci bank, lesan tsi m pënë-ni tsi m yëri, yaari ibats, doan ngëcäk ngi m do ngi ka ro. Ucits ank ba, ka bi tsi wi, din ka pënan kapafëni-ulampu, tsi pëlas kul, uci m yaarats ibats.

⁶ Maa m ka ko wi, pa uwaru: M ŋalats koon këŋal ngi bafets Nikolas kë ro ngi; a te nji buts, nji n ŋalats koon këŋal ngul.

⁷ Nan kai kabats, na tean ko wi Uwejats ci wi tsi pëja iriisia. Nakuk, mán wëlul na re ko tsi bëko ubiira, bul ban ci bi di tsëko-ngëlílal Nasien-batsi.’”

Uletar pa Ngëriisia ngan ci ngunk di Sëmirna

⁸ Picari uwaanju Ngëriisia ngan ci ngunk di Sëmirna, ja: “Kanci Nacak ni Natuami, nul nandoi cats, maa a na kak aci nayësal, pi ci pun pi na ja pi:

⁹ ‘Ma me unooru, ni bëranju, — maa m ci koon narëmb, — a me uñakan uwutsëtsuel ba nja biki bërier bukul bë ci Bajudeu, te bë cits, maa bë ci kato-kajúki Useetaani.

¹⁰ Cats lal nin ko tsi ngi kë ciina ngi tsi unoor. Teenan-e! Ujabël ka guts balon tsi ind di ukalabus, pa ndë teenamana. Ndu noor-noorana te ngënu untaaja. Moban tsi uwak, te tsi pëcäts, din kee wëlu ucape-pësien, wi ubiira.

¹¹ Nan kai kabats, na tean ko wi Uwejats ci wi tsi pëja iriisia. Nakuk, yaas a pëcäts pëtëbantsan ka roul ko.’”

Uletar pa Ngëriisia ngan ci ngunk di Peergamu

¹² Picari uwaanju Ngëriisia ngan ci ngunk di Peergamu, ja: “Kantsij ulaac ujulal un tsij wi ngëre ngëtëb, pi ci pun pi na ja pi:

¹³ ‘Ma me tsi m ciina tsi: tsul tsi pëtsoari-pësien Useetaani ci tsun. Maa, m mob tsi katim nji m liincan, a m wëtaants uwak nji, ŋal uwal wi Antipas fiŋa wi, nul nan ci namaatir-ngëmiñ, na mobi tsi ngul; afiŋa tsi pëncuaf ind, tsul tsi Useetaani ciina tsi.

¹⁴ Maa, aka ngi ndu leentsaru ngi, aci ko uties: M ka tsul ba mob biki tsi bëjukan Balaam, nul nan jukani Balak pëkuer pëgungan pa babuk Israel puu re nga n jakana ngi tsi icap, ni bukul puu ro ngëko katuk-ufuts.

¹⁵ Unk, a m kaand ba mob biki tsi bëjukan bafets Nikolas.

¹⁶ Bi u ci bank, yaari ibats. Ucits ank ba, ka bi tsi wi tsi ko un car wi, din ka kaman bukul ni ulaac wi kan pëni wi di mtum nji.

¹⁷ Nan kai kabats, na tean ko wi Uwejats ci wi tsi pëja iriisia. Nakuk, mán wëlul na re manaa man beka mi. Máwëlandul pëlaak pëfaacal; katim kawalu apicanaa tsi pul, maa ñaan meets kul, aci koon na yanki pul.’”

Uletar pa Ngëriisia ngan ci ngunk di Tiatiira

¹⁸ Picari uwaanju Ngëriisia ngan ci ngunk di Tiatiira, ja: “Abuk Nasien-batsi, nul ni këkësul naam ki pi kandiamënt bërua, a itsiim naam unk kaŋí katsak kan ci ki tsi pëyëk; pi ci pun pi na ja pi:

¹⁹ ‘Ma me ngi m ja ngi m doon kuu ro; a me bëŋalu ni uwaku, ni uleempu wi m ciina wi, ni umiira wi kë miira wi. Ma me, ngëtuami ngi m ci ngi tsi përo ape ngëcäk pëcum.

²⁰ Maa, mán leentsaru tsi uleka ko wi: M wët ŋaats ni ka n jaka unk Jesabel, nul na njai bërierul aci nayëlia, a nuu jukan baleemp nji koo fal bukul a bu kë ro ngëko katuk-ufuts, a bu kë re nga n jakana ngi tsi icap.

²¹ Man wëlul uwal pa na yaar ibats, maa ŋalats pëwëtan katúk-ufuts ki na ciina ki.

²² Teenan-e! Mán gutsul tsi bëkaab unoor; a ba nja biki ba roon bu kë ro mjubi ni nul, mán tsu bukul tsi unoor uwiak, uci ba wëtaants përo ngi na ja ngi na roon nuu ro.

²³ Mán fiŋ upätsul. Din, iriisia bëlieng ka me nji n ci-un ni kan teeni ngëtsaag ni ngëwaas, uwar. A te, mán luk ind kara ñaan ngi na ro ngi.

²⁴ Maa ind di Tiatiira, ind bëlieng ban duka bukunk, ban fetsats biki bëjukan bumënts bun a nda meets ngi bu kë ja ngi, ngëwandal Useetaani, ma n ja ind: In di ka n tsu ind pëlon pëyunts.

²⁵ Maa nda moban nda liincan ko wi nda ka wi, te ka tsënkëna ka baandi.

²⁶ Nakuk, na mobi tsi puu ro ngëmiñ te tsi ubaani, mán wëlul pëka pëyëlan tsi ngëcaak—

²⁷ Nul ka yafanaan ngul pëndog pëfeeru, ka fam-faman ngul pi iŋi i niewuna yi uni—

²⁸ bi yank bi pëyëlan tsi Asin nji, a ndu wëlul upesaj kafa-unu.

²⁹ Nan kai kabats, na tean ko wi Uwejats ci wi tsi pëja iriisia.’”