UPIBAN 10 - KARÚK-PËRIM KAWALU Nouveau Testament

Joŋ are ulibëru uties

¹ Din a n win ulon uwaanju, un ka wi pëyëlan; apëni di batsi pëwelee, a kasa kund wul, a pëfaal-batsi ci di ruets been wul. Urostu wul aci pi unu, a itsiim wul ci pi imëts bërua.

² tsi kañan wul a u tsij ulibëru uties, u waantsa wi. A u paf kayots wul kariir tsi bërëk, kayots kamay tsi utsia.

³ A u lië mak pi ulioŋ liandar wun. Uwal wi u lië wi, a impalambamb paaj yun ni kalon leentsi.

⁴ Uwal wi impalambamb paaj yun ni kalon leentsi wi, a uyecis nji wun pëpican, a n te përim pëni di batsi a pa ja: “Ngi impalambamb paaj yun ni kalon ja ngunk, nuekani ngul nga rits meaa; cats pican ngul.”

⁵ A uwaanju wi ndo wunk win u nats tsi bërëk ni tsi utsia, katar kañan kariir wul batsi,

⁶ a u baaja nan ci nayësal pa sandëndën, nul na leempi batsi ni ngan ci ngi di bul, utsia ni ngan ci ngi tsi wul, bërëk ni ngan ci ngi di bul; abaaja, aja: “Ko katse ka jon!”

⁷ Maa tsi ngënu ngi uwaanju upaajantsan ni ulon kë tea wi, uyecis wul wun pëfuts uluur, din wi Nasien-batsi undoots wunk mea ka rolaa, bi na ro bi leents baleempul Upetsan-uwar, bukul bayëlia.

⁸ A përim pi ndo punk n te, upëni pul wun batsi, ñakanaanin kak aja: “tsëpan, jejan ulibëru u waantsa wunk, un ci wunk di kañan uwaanju u nats wunk tsi bërëk ni tsi utsia.”

⁹ A n tsëp a n band di uwaanju, a nja wul u wëlin ulibëru uties umënts wun. A u jain: “Jejan wul kë re. Wul, ka waayanu ipës, maa di mtumu, ka juabuts pi pëwaaj.”

¹⁰ A n jej ulibëru uties umënts wun tsi kañan uwaanju, a n de wul. Di mtum nji, a u ci pi paaj, ajuabuts; maa uwal wi yoor wi wul, a u waayanin ipës.

¹¹ Din, a njaka: “M ka m doon kë kaka car leents ko wi Nasien-batsi ja wi tsi uleka bañaan bacumal, ni ngëcaak ngëcumal, ni mëleets mcumal, ni basien bacumal.”