TIITU 3 - KARÚK-PËRIM KAWALU Nouveau Testament

Bi nafets Yeesu ka bi pëyandaar

¹ Lesani bukul ba ka pëmob tsi ngi bañaan-utsua tsu ngi ni bañaan-pësien, puu ro ko un jaka wi, pëci ban yecis biki pa puu ro ko u wara wi-ba këwara.

² Bukul tsë ja uwutsëtsuel tsi uleka ñaan, ba ciin barika-tsas ukam, bajuab-ngëwaas, bu kë piban kajuab-uwaas tsi uleka bañaan bëlieng.

³ Par nja buts, tsi uwal ujon, ngë ro ci uunk: bafuur, barika-ro ko un jaka wi, ba niamana biki, a ngëkoraar uŋal ni ngëkoraar ulílal ro tsu nja a ngë ci baluek. Ngë ro mob tsi kajuats-iyeen, ni tsi karí-ko. Ngë ñaasaa, a ngë ñaasëlër.

⁴ Maa uwal wi kawara-uwaas Nasien-batsi pibandari wi ni bëŋal bi na ŋal bi bañaan, nul Nabuerani nja

⁵ a na bueran inja; cits undo ngi ngë ro ngi bërier nja tsi bëmabal, maa aci-undo kayëk-ipësul. Abueranaani nja tsi pëñawa pan ci pi pi kabëka-kawalu, a pa ciind pi pëwitsa nawalu pi Uwejats-ujënts kë wíts pi ñaan.

⁶ Nul, tsi Yeesu Këristu, Nabuerani nja akoŋi Uwejats-ujënts tsi ruetsi nja arëmban.

⁷ Unk, tsi bëtseendul a na tsu nja a ngë ci bamabal, pa nja ka ruka ci barukanda, undo pëwats tsi ubiira un dits wi ka ba.

⁸ Përim pëmënts pi aci pan waka pi; a ŋal m doon kë mob mak tsi puu leents ngëmënts ngun, pa ba uwak biki tsi Nasien-batsi ka baar ibats tsi puu ro ngëwar. Ngëmënts ngun aci nga wara ngi mak, a nga ka bëkat pa bañaan.

⁹ Maa randan mantotëlër bufuur, ni kapini bañaan tsi pëbuka, ni pëŋom, ni katambulër-ulats tsi uleka ulua-Moises, par di ka roona ko, a kaats bëkat.

¹⁰ Ñaan nan ci nakicës, ñakanaaniul uyaas ucak ni utëbantsan, din cats bof përo ko ni nul.

¹¹ Me koon, ñaan pi namënts un aniam, a nuu juban; aci na lacani beenul.

Kawël-mboos katuamë-ni

¹² Uyëli nji Arteemas oo Tiikiku di wi, doan uyëlan kë bi tsi nji di Nikopolis. Par, man baaraan pëparanaan pëtí rul.

¹³ Doan ko wi m yëlan wi këtsënk Useenas najukan-ulua, ni Apolos, ko tsë kats bukul tsi bëyaas.

¹⁴ Ba yiic nja, bu ka pëjuk buts puu pe këpe përo ngëwar, pa pëfierësaraan ngan fiera ngi tsi uyëk wul. Unk, ba rits ci bakaats-bëkat.

¹⁵ Ban ci biki bëlieng ni nji, bu leeniu. Leendarin ba ŋal nja biki tsi uwak. Bëtseend ba ciin ni ind bëlieng.