TIITU 2 - KARÚK-PËRIM KAWALU Nouveau Testament

Katseend-ibats pa batsafal

¹ Maa wi, jaan ko u mab wi tsi bëjukan bëwar.

² Jaan bayënts batsafal ba ci baliingëlën-ko, bañaan-urispiitu, baka-ibats, baci-uwar tsi uwak ni tsi bëŋal ni tsi mantambandër.

³ Unk buts, jaan bakaats batsafal, ba ci bacär tsi ngi ba ciina ngi. Bukul tsë ci nin baja ngëwutsëtsuel tsi uleka ñaan, nin batsu ibats tsi karaan-pëwät mak, maa ba jukani ko u wara wi.

⁴ Unk bu kë jukan bakaats bandu nima, pëŋal bayën bukul ni upäts bukul.

⁵ Bu ka ci baliingëlën-ko, bamob ngëliaf bukul; nan ci nuu këmand katoul, bu ka ci bajuab-ngëwaas, nan ci në mob tsi përim ayënul, pa përim Nasien-batsi rits karaa.

Katseend-ibats pa batsasa

⁶ Unk buts, tseendan batsasa ibats, pa ba ci baliingëlën-ko.

⁷ Tsi ngëko bëlieng, pibani tsi wi bërieru m ci ñaan ni bañaan kë teenëni tsi karo ngëwar: tsi bëjukan, pibani bëjëntsal, ni urispiitu,

⁸ ni përim pëwar, pan yëlants pi pëka ulaci, u tsu babër ba kawa, par bu kaats uwutsëtsuel wi bu kë ja wi tsi uleka inja.

Katseend-ibats pa baluek

⁹ Tseendan baluek ibats, pëja tsi ko un ci wi-ba këci, bu kë mob tsi përim bajug bukul; ba ciin ba lílandëra biki, ban dits biki ka pok ko wi ba jaka wi,

¹⁰ ban dits biki ka jej ko wi ba wëlaatsa wi. Maa ba pibani ba ci ban fiaara biki uwar. Unk, tsi ko un ci wi-ba këci, bu kë piban uwarara bëjukan Nasien-batsi, Nabueran inja.

Bëtseend pëbuer apibandari pa bañaan bëlieng

¹¹ Par bëtseend Nasien-batsi, bul ban tsij bi pëbuer pa bañaan bëlieng, apibandari.

¹² A buu jukani njapëwëtan karika-lënk Nasien-batsi, ni pëwëtan kari-ngëko umundu, pa tsi uwal wi ngë ci wink, nja kë yandaar tsi butsëkal, tsi bëmabal, ni tsi kalënk-Nasien-batsi;

¹³ nja kë lip uwats unaakal, ni upibandari përëmb Nasien-batsi nja nawiak a na ciind Nabueran, nul Yeesu Këristu.

¹⁴ Awël ubiiraul bërierul panjapa pëweelësi nja tsi kamabats kan ci ki ba këci, ni pëjëntsan bañaan-ucaak pa nul baŋ, bu ka ci ban pats biki, bu kë yëkandar karo ngëwar.

¹⁵ Jaan ngëmënts ngun. Tseendan bañaan ibats. Ni ko un tsua wi bëlieng, leentsari ban ka biki pëleentsara. Cäts wët ñaan na beu.