ROOMA 9 - KARÚK-PËRIM KAWALU Nouveau Testament

Përata Israel, ujuban Israel

¹ Mán leents ucär tsi Këristu, in di ka n tsup. tsi Uwejats-ujënts, uwejats nji bërierin aleents ko wi n ci wi, aja:

² Man tsij unjuatsia uwiak ni urear uwaas un dits wi ka ba;

³ a n do ŋal nji bërierin pëci ujuatsal, ka patsësar ni Këristu undo bëŋal biki wund tsaar biki, bayëts nji tsi pëñaak,

⁴ bukul ban ci biki bañaan Israel, bawëla biki pëci babuk Nasien-batsi, a ba wëla përëmb, ni karo-pëloole kan ci ki-ba këci, ni ngëtsua, ni puu jintëla Nasien-batsi, ni ngëwatsan;

⁵ tsi bukul tsi basin pënë-ni tsun, a tsi bukul buts tsi pëñaak, tsi Këristu pënë-ni tsun; a tsi ruets ngëko bëlieng, nul ci-un Nasien-batsi na n jaaree ngëwar pa sandëndën. Ameen!

⁶ A cits pëjaa përim Nasien-batsi wamandats bëkat, par cits ba n jabëni biki bëlieng Israel, ci bukun baisrael bacar.

⁷ Te cits undo bë ci kajër Abraam, ka wun ba ci bëlieng upäts Abraam; maa ajaka: “tsi Isaak tsi kajëru kë ruunaa tsun.”

⁸ Un ci wi, cits ban bëka biki pëñaak ci bukun upäts Nasien-batsi, maa upäts uwatsan, tsua bukun pëci kajër.

⁹ Par përim uwatsan ci pun pi: “Kafa tsi uwal wi, mán bi, Saara ka ka napäts niints.”

¹⁰ Te cits umënts wi rin, maa Rebeeka buts amobuna pëpës tsi niints naloole rin, un ci wi Isaak, asin nja.

¹¹ Par batantëmb bukun netse ro bukee, te bu roots nin ko u wara wi, nin u waraatsa wi, pa utsaag Nasien-batsi tsi uleka bërat pëci u liinc wi;

¹² cits undo ko undola wi, maa undo ni kandui; aro jaul ba: “Nawiak nun, ka ci naluek naties nun.”

¹³ Bi u picana bi, aja: “Man ŋal Jakob, a n ñaas Esau.”

¹⁴ We wnja kë ja wun-i? Kamabats aci tsi Nasien-batsi-a? Nin-a!

¹⁵ Par nul aja Moises: “Mán yëkar ni n ŋali pëyëkar ipës, ka jampësa ni n ŋali pëjampësa.”

¹⁶ Unk, biinits tsi ko wi ñaan ŋal wi nin tsi pëyëlanul, maa aci tsi kayëk-ipës Nasien-batsi.

¹⁷ Par Bëpican aja Farao: “Undo ko umënts wi ka wun n natsanu, pa nji pëpiban pëyëlan nji tsi wi, ni pa katim nji pëleentsaa tsi ucaak bëlieng.”

¹⁸ Bi u ci bank, Nasien-batsi ka yëkar ni na ŋali pëyëkar ipës, në tamban uwaas ni na ŋali pëtamban.

Unoor, ni kayëk-ipës Nasien-batsi

¹⁹ Maa, wi kë jain: “We ka wun a na wama ka lacan bañaan? Par yën tambandar un tsi pëpok uŋalul-i?”

²⁰ Maa yën ni m ci-un, ñaan-najin, pa pëci tsi mantotëlër irim ni Nasien-batsi? Ane ko u leempa wi ayëlan pëja na leempi wul: “We ka wun a m leempin iink-a?”

²¹ Ane naniew iliiki kaats na roon, në jej bëni bëloole bun, na niewuna pëlon pëliiki pa ko un ka wi bëkat, ni pëcints pa ko un kaats wi bëkat-a?

²² Wee kë ja wun uci Nasien-batsi ŋal pëpiban uriabul, ni pëtsu bañaan ba me pëyëlanul? Nul ajon mak ki na ci ki tsi pëmiira ban ka biki pëtsua tsi unoor, a ba yecisa pa pëniam,

²³ pa në tsu buts bañaan, bu ka me përëmb pan ci pi di përëmbul, tsi biki na yëkar biki ipës, a na yecis bukul ki këlum pa përëmb,

²⁴ un ci wi, nja biki na rui biki buts, te cits tsi pëncuaf Bajudeu rin, maa tsi pëncuaf bañaan ban cits biki Bajudeu buts.

²⁵ Bi na ja bi buts di ulibëru Oseeya: “Ban doots biki ci bañaan nji, mán du bukul a n ja, ‘bañaan nji;’ a ucaak un doots wi ŋalaa, mán du wul a n ja, ‘kaŋalaa;’

²⁶ a tsi tsëko tsi ba jaka tsi: ‘Nda cits bañaan nji,’ tsul tsi bu kë jaanaa tsun, ‘babuk Nasien-batsi nayësal.’”

²⁷ Isaaya akat përim tsi uleka Israel, aja: “Ŋal ucumar babuk Israel ka ruka ci pi mboos bërëk, bandukësa biki rin ka buer bukun.

²⁸ Par tsi ko un car wi, Ajug ka bandan përimul bëlieng, tsi umundu.”

²⁹ Bi Isaaya ro bi ja ba: “Uci Ajug bakaman doots rukar nja ka jër, ngë bi ka ruka ci pi Sodooma, ngë bi ka ro naam ni Gomoora.”

³⁰ We wnja kë ja wun-i? Ban cits biki Bajudeu, bukul ban tsasats biki bëmabal, bu tsënkan bëmabal, bëmabal ban pënë-ni bi tsi uwak;

³¹ maa bañaan Israel, bukul ban tsas biki ngëtsua bëmabal, bu tsënkaants wul.

³² We ka wun? Par bu tsasënats tsi uwak, maa bu tsasëna tsi ngëko ngi bu kë ro ngi. A ba jontas tsi pëlaak pi kan tsu pi ñaan na jontas,

³³ bi u picana bi, aja: “Teenan-e, mán tsu di Sion pëlaak pi kan tsu pi ñaan na jontas, ni bulaak bi kan tsu bi ñaan na yër; a ñaan na waki ba këwak tsi bul, di ka kawarana.”