ROOMA 16 - KARÚK-PËRIM KAWALU Nouveau Testament

Kawël-mboos

¹ Man tergaar ind Febe, natsaar ni nja ŋaats, nul nan ci natsënk di Ngëriisia Senkreeya;

² nda welaniul tsi katim Ajug, bi bayëman ka bi përolaa; nda tsënkanul tsi ko wi na fier wi ba këfier ndë tsënkul; par nul atsënk bañaan bacumal, a ŋal nji buts atsënkin.

³ Nda leendarin Priskila ni Akiilas, baleemp ni nji tsi Këristu Yeesu,

⁴ bukul ba niajan biki iyeen bukul tsi bëjuats, undo ubiira nji; a ndu n baran bukul tsi ko wan, te cits nji rin n baran un bukul, maa iriisia bëlieng yi ban cits biki Bajudeu, abaran buts bukul.

⁵ Nda leendarin buts Ngëriisia ngan ci ngi di kato bukul. Nda leendarin Epainetu, ni n ŋali, nul nan ci nacak na niirani Këristu di Aasia.

⁶ Nda leendarin Maaria, nul na noorar indi mak.

⁷ Nda leendarin Androoniku ni Júnias, bayëts nji, a ba ciind bacints nji di ukalabus; bukul bë ci ba rispitaara biki mak tsi bapostolu, a ba cakësin pëci tsi Këristu.

⁸ Nda leendarin Ampëliatus, natsaar ni nji ni n ŋali tsi Ajug.

⁹ Nda leendarin Urbaanu, nul nan ci acints nja tsi uleemp Këristu, nul ni Estaakis, natsaar ni nji ni n ŋali.

¹⁰ Nda leendarin Apeles, nul nan pibani na wak tsi Këristu. Nda leendarin bañaan kato Aristoobulus.

¹¹ Nda leendarin ayëts nji Eroodion. Nda leendarin bañaan kato Narsisu, ban ci biki tsi Ajug.

¹² Nda leendarin Trifeena ni Trifoosa, bukul ba leemp biki ulemp uñatsal tsi Ajug. Nda leendarin Persis, na ŋalee, nul na noori mak tsi uleemp Ajug.

¹³ Nda leendarin Rufus, nul nan datee tsi Ajug, ndë leendarin buts aninul, nul nan ci këci anin nji.

¹⁴ Nda leendarin Asinkritu, ni Flegon, ni Ermes, ni Patrobas, ni Ermas, ni batsaar ni nja ban ci bukunk ni bukul.

¹⁵ Nda leendarin Filologu, ni Júulia, ni Nereeu, ni nan tsaari ni nul, ŋaats, ni Olimpas, ni bayëman bëlieng ban ci bukunk ni bukul.

¹⁶ Nda leenëlëri tsi nda ci tsi, ni mawunkëlër myëman. Iriisia Këristu bëlieng aleeni ind.

Katseend-ibats katuami

¹⁷ Batsaar ni nji, man buara ind pa nda ruk ibats tsi uleka ba nja biki ba roon bu kë tsiji ngëkicës ni pëtsu bañaan ba yër, ba ja ba roon bu kë pok bëjukan bi nda jukana bi; nda lawani bukul,

¹⁸ par bamënts biki cits tsi pëleempar Këristu Ajug nja maa bë ci tsi pëleempar ipës bukul; a ni irim ilílal ni kafal, bu kë niaman ban kaats biki ko ni ñaan.

¹⁹ Bañaan bëlieng ame nda mob tsi përim; ko umënts wi ka wun n lílan tsi uleka ind, a ŋal ind pëci bameko tsi uleka ko u wara wi, ndë ci ban kaats biki ko ni ko u waraatsa wi.

²⁰ Nasien-batsi pëfac, ka fam-faman Useetaani tsi utsia iyots ind, tsi ko un car wi. Bëtseend Yeesu Ajug nja ba ciin ni ind.

²¹ Timoteu acints nji tsi uleemp, ni Luusiu, ni Jason, ni Sosiipatros, bukul bayëts nji, bë leeni ind.

²² Nji Teersiu, nan picani uletar wi, ma leeni ind tsi Ajug.

²³ Gaayu, na njai na roon në welanin a na ciind nawelan Ngëriisia bëlieng, aleeni ind. Eraastu nagaang uncaam përaasa, nul ni natsaar ninja Kuartus, bë leeni ind. [

²⁴ Bëtseend Yeesu Këristu Ajug nja ba ciin ni ind bëlieng. Ameen!]

Përëmban Nasien-batsi

²⁵ Përëmb pa wëlaan nan ka unk pëyëlan pa pënatsan ind, bi n leents ind bi Upetsan-uwar, ni përim pi Yeesu Këristu leents pi, bi na piban bunk undoots wunk meaa, a u ro gaangaa ki ngëwal ngan par ngi;

²⁶ maa inkri, a u pibanaa, a bañaan bëlieng me wul, undo Bëpican bayëlia, bi Nasien-batsi narika-ba tsu bi, pa ban cits biki Bajudeu bëlieng pëniiran përimul, undo uwak.

²⁷ Nasien-batsi naloole baŋ, nul nameko, na wëlaan përëmb pa sandëndën, tsi Yeesu Këristu. Ameen!