ROOMA 15 - KARÚK-PËRIM KAWALU Nouveau Testament

Përo acintsu uwar

¹ Nja ban ci biki baliincal, ngë ka puu miira ban daf bukunk, tsi bërafal bukul, nja ka wët puu ro u líl nja wi.

² Kara ñaan tsi nja na roan acintsul ko u lílul wi, a u wara pa pëliincanul.

³ Par, nul Këristu roots ko u lílul wi, maa, bi u picana bi aja: “Ikar ba nja biki ba roon bu kë karu, ayër tsi nji.”

⁴ Par un do wi picana ba bëlieng uwal ujon, apicandara pëjukan nja pa nja ka ka uwats, tsi undo umiira ni kaliinc-liincan uwaas ki Bëpican wël ki.

⁵ Nasien-batsi umiira, ni kaliinc-liincan uwaas, na wëlan ind uwejats uloole umënts wun, pa ind puu yëkëlar ipës pi Këristu Yeesu,

⁶ ndë baar tsi përim pëloole, nduu rëmban Nasien-batsi, nul Asin Yeesu Këristu, Ajug nja.

Upetsan-uwar pa ban cits biki Bajudeu

⁷ Bi u ci bank, nda jaan ban ci biki bu ka welan bacints bukul, bi Këristu welan nja bi, pa përëmb Nasien-batsi.

⁸ Inkri má n ja, Këristu tsua un pëci naleempar kambac undo ucär Nasien-batsi, pëpiban ngëwatsan ngi basin nja watsana ngi,

⁹ ni pëtsu ban cits biki Bajudeu përëmban Nasien-batsi, tsi undo kayëk-ipësul, bi u picana bi aja: “Wul ka wun, nji mán dëmbanu tsi pëncuaf ban cits biki Bajudeu, ka ya iya ubëndan pa katimu.”

¹⁰ A u jaka buts: “Ina! Ind ban cits biki Bajudeu, nda ciin tsi ulílan ni bañaanul.”

¹¹ A u kaka jaka: “Ind bëlieng ban cits biki Bajudeu, nda bëndani Ajug; bañaan ngëcaak bëlieng ba bëndaniul.”

¹² A Isaaya ja buts: “Kee ka nalon tsi kajër Jese, ni ka natsee pa pësien ban cits biki Bajudeu; ban cits biki Bajudeu ka tsu uwats bukul tsi nul.”

¹³ Nasien-batsi uwats, na cumani ind ulílan un ci wi-ba këci, ni pëfac, tsi uwak; pa ind pëka uwats uwiak tsi pëyëlan Uwejats-ujënts.

Pol naleempar ban cits biki Bajudeu

¹⁴ Batsaar ni nji, nji bërierin man niiran nda cum ni karo-uwar, a nda cum ni ume un ci wi-ba këci, pa ind puu tseendëlar ibats.

¹⁵ Maa, man picandëri ind ni bëyeentsal, pa pëlesan ind uleka ngëlon ngëko, undo bëtseend bi Nasien-batsi wëlin bi,

¹⁶ pa nji pëci naleempar Këristu Yeesu tsi pëncuaf ban cits biki Bajudeu, pa nji puu leents Upetsan-uwar Nasien-batsi, pa ban cits biki Bajudeu pëci bëtseend ba líl bi Nasien-batsi, bul ban jëntsanaana bi Uwejats-ujënts.

¹⁷ Bi u ci bank, man yëlan pëpíc tsi Këristu Yeesu, tsi uleka ngëko Nasien-batsi.

¹⁸ Par in di ka n yeents pëñakan ulon ko, ucits ba ngi Këristu roona ngi tsi nji, pa pëtsu ban cits biki Bajudeu ba niiran Nasien-batsi, tsi undo përim, ni undo ngandola ngi,

¹⁹ tsi pëyëlan ngëpibanaani ni ngëko ngan pikra n ngi undo pëyëlan Uwejats Nasien-batsi; unk, a n leents Upetsan-uwar Këristu a n jëkëlan, pëpën tsi Jerusalem ni ngëcaak ngan fay ngi dul, te di Iliriku.

²⁰ Unk, a n tambandër tsi pëleents Upetsan-uwar, di ngëleka ngi katim Këristu netse ngi leentsaa, pa përits niew tsi ruets ujuundi nalon;

²¹ maa bi u picana bi, aja: “Bandoots biki leentsa ulekaul, bu ka winul; a bandoots biki te ulekaul, bu ka me ulekaul uwar.”

Ko wi Pol wejats wi përo

²² Ko umënts wi laaŋin wun ngëyaas ngëcumal, pëbi pëwin ind.

²³ Maa inkri, in katse n ka tsëlon tsëko tsi n ka tsi pëleemp di ngëleka ngëmënts ngi, a ki ngëwaanu ngëcumal a ŋal pëbi pëwin ind;

²⁴ a ŋal përo ko wan, uwal wi n pën wi pëtsëp Españ; par man wejats upar nji pëtsëp, ka win ind, ka riusa ind a uu ba, ndë ñuatsanin tsi bëyaas.

²⁵ Maa inkri, nji n pë nink këpën pëtsëp Jerusalem, pii ru tsënk bayëman.

²⁶ Par Ngëriisia Masedoonia ni ngi Akaaya, bëbaaraan pëwël bëtseend, pëtsënkëna baranj tsi bayëman ban ci biki di Jerusalem.

²⁷ tsi bëwinar bukul, bi ba ro bank awara, te u ci ko wi ba ka wi përo; par uci ban cits biki Bajudeu bof tsi pëfaar ngëko Bajudeu ngi Uwejats Nasien-batsi, bu ka buts pëfaar ngëko-ngëro bukul ni Bajudeu.

²⁸ Maa uwal wi n ba wi pëwël bukul bëtseend bëmënts bi, ka pën pëtsëp Españ, ka pari di ind.

²⁹ A n me ne, ubi nji pëwin ind, mán cum ni ngëko ngëwar Këristu pëbi.

³⁰ Batsaar ni nji, man buara ind tsi Ajug nja Yeesu Këristu, ni tsi bëŋal Uwejats Nasien-batsi, pa nda kaman ni nji tsi bëñaan bi ind kë ñaan bi ba këñaan Nasien-batsi, pa nji;

³¹ pa nji pëbuer tsi iñan bapok-uwak ban ci biki di Judeeya, ni pa bëtsënk bi n tsëpand bi Jerusalem, bayëman pëniiran bul uwar.

³² Unk, ubi nji pëwin ind tsi uŋal Nasien-batsi, ka baandi tsi ind ni ulílan, ka yëlan pënaakësa ni ind.

³³ Nasien-batsi pëfac, na ciin ni ind bëlieng. Ameen!