ROOMA 12 - KARÚK-PËRIM KAWALU Nouveau Testament

Ind tsë ro bi bañaan umundu kë ro bi

¹ Maa, mán buara ind batsaar ni nji, tsi kayëk-ipës Nasien-batsi, pa ind pëwël ngëliaf ind, nga ci bëjakan buyësal, bëyëman, ban líl bi Nasien-batsi; ko wi ka wun pëci ubëndan wi nduu ro wi.

² Ind tsë ro bi bañaan umundu wi kë ro bi, maa, nda wëtan uwejats uwalu un ci wi di ind, u butan ind bëci; unk, ndë yëkëran un ci wi uŋal Nasien-batsi, wël u wara wi, a u líl, a u kës.

³ Par, tsi bëtseend bi wëla bi, má nja ka ra ñaan nan ci tsi ind, nul tsë wejatsar beenul bërierul na par-paran; maa na wejatsi na liingëlan tsi kaniibi uwak wi Nasien-batsi wël wi kara ñaan.

⁴ Par, bi ngë ka bunk incimëntsu icumal tsi uliaf uloole rin, a te incimëntsu imënts yun bëlieng bofats uleemp,

⁵ unk buts, nja ngë cum, a ngë ci uliaf uloole rin tsi Këristu; a uja kara ñaan në ci incimëntsu pa acintsul.

⁶ A nja, ngë ka ngëtseend ngan patsëlar ngi, bi u ci bi tsi bëtseend bi Nasien-batsi wël nja bi. Uci ñaawëla utseend pa puu leents nga meaatsa ngi, na leempëni wul na liingan tsi uwak;

⁷ uci pa puu leempëna, na leempëni wul; uci pa puu jukanaan, na jukanaani wul;

⁸ uci pa puu liinc-liincan ngëwaas bañaan, na liinc-liincani ngëwaas bañaan; uci pa puu tsënk, na tsëkan ni uwaas un fac wi; uci pa puu mandaar, na mandaari ni uŋal; uci pa puu yëkar bañaan ipës, na roan ank ni ulílan.

Katseend-ibats uleka bëŋal, ni kawelan-been

⁹ Bëŋal, ba ciin ban tsijats bi kanguungu. Nda bëran ko u waraatsa wi, ndë mob u wara wi.

¹⁰ Nda ŋalëlari di ngëwaas ind ni bëŋal mantsaalar, ndë ja ñaan, në rëmban acintsul.

¹¹ Ind tsë ci babisaran, maa nda ciin ba yëkan biki tsi uwejats, nduu leempar Ajug.

¹² Nda lílani tsi uwats, ndë ci baja ngëwar tsi unoor, ndë mob tsi bëñaan nda liincan.

¹³ Nda tsënkan bayëman tsi ngëfier bukul, ndë túkar puu welan batsooŋ.

¹⁴ Nda jan ngëwar pa ba n ja bukunk ba roon bu kë noor-nooran ind; nda jan ngëwar, ind tsë jaar bukul ngëjuatsal.

¹⁵ Nda lílani ni ban ci biki tsi ulílan, ndë rug ni ban ci biki tsi irug.

¹⁶ Nda ciin baloole tsi nda ci tsi; ind tsuuts rëmbandar, maa nda túkari un ci wunk uties; ind tsë ja tsi iyeen ind nda ci bameko.

¹⁷ Ind tsë lukan ñaan uwutsëtsuel, ni uwutsëtsuel; nda tambandari tsi përo uwar tsi bërun bañaan bëlieng;

¹⁸ uci u yëla bëro, nda ciin tsi pëfac ni bañaan bëlieng; aruka rukëna tsi ind.

¹⁹ Ind ba ŋala biki, ind tsë lukan-pëkaw ind bërier ind; maa nda wëtan uriab Nasien-batsi u ro ko. Par iink ri upicana run: Ajug aja: “Kalukan-pëkaw, aci kamiñ; aci nji ka lukan un.”

²⁰ Bi u ci bank, uci bëñaasaru bonats, wëlanul bariala. A uci na lofënts, wëlanul përaan; par uci m do ank, kë yuuntsanul ijuas bërua tsi been.

²¹ Cats wët uwutsëtsuel u uka kape tse wi; maa kan kape tse ruts wul ni uwar.