ROOMA 11 - KARÚK-PËRIM KAWALU Nouveau Testament

Nasien-batsi bërats Israel

¹ Bi u ci bank, mán yepar: Ane Nasien-batsi abër bañaanul-a? Nin-a! Par nji buts man ci ñaan Israel nan pënë-ni tsi kajër Abraam, di pëbuka Be n jamin.

² Nasien-batsi bërats bañaanul, biki na me biki ki uwal ujon. Ane nda meets ko wi Bëpica n ja wi tsi uleka Eliyas, bi nu ñakanaan bi Nasien-batsi, a na natsara Israel a nuu ja:

³ “Ajug, bu fiŋ bayëliau, a ba gar-garan igiju, a nji rin duka un, a bu kë tsas pëpënan ubiira nji.”

⁴ Maa we wi Nasien-batsi yankul wun? Aja: “Man gaangar been nji bayënts ngëmiil paaj ni ulon (7.000), ban kuujats biki ijuul tsi bërun Baal.”

⁵ Unk buts, tsi uwal un tsari, awama ka bandukësa biki, a ba rataa tsi bëtseend Nasien-batsi.

⁶ Maa, uci u ci tsi bëtseend, inkri katse ci tsi ngandola ngi; ucits ank ba, bëtseend katse ci bëtseend.

⁷ We wnja kë ja wun? Ko wi Israel kë tsas wi, tsënkaants pëka wul; maa, ban data biki, bë tsënkan wul, a ban pe biki pëcum tambana ngëwaas,

⁸ bi u picana bi, aja: “Nasien-batsi awël bukul uwejats ngëbisaran, këkës pa përits win, ibats pa përits te, te pënak pëntsa.”

⁹ A Dawid ja: “Ngëfesta bukul nga rukaan ci pëgungan ni pëtseenk, ni ko wi kan tsu wi ñaan pëyër, pa bëluk bukul;

¹⁰ këkës bukul, ka rëmëntsi pa ba rits win tsëko, ngëfets bukul, nga rukaan kuujar unk, ngëwal bëlieng!”

¹¹ Inkri, mán yepar: Ane Bajudeu ajontas këjontas pa bukul pëyër-a? Nin-a! Maa, undo kaguus-ko bukul, a pëbuer bi tsi ban cits biki Bajudeu, pa pëtsu Israel pëpícëlër ni bukul.

¹² Maa uci kaguus-ko bukul tsiji përëmb pa umundu, a pëyër bukul tsiji përëmb pa ban cits biki Bajudeu, andes ubaar bukul pënatsa ba nats!

¹³ Inkri, man ci tsi pëñakanaan ind, ind ban cits biki Bajudeu; bi n ci bink Napostolu ban cits biki Bajudeu, ka wun n dëmban uleemp nji,

¹⁴ pa pëteen ne, mán yëlan ank pëtsu mampícëlër tsi bañaan nji, ni pëbueran balon tsi bukul.

¹⁵ Par, uci pëbëra pi Bajudeu bëraa pi tsiji manteelar tsi umundu, a we kee ci wun uniirana bukul? Ucits ba pëpën tsi pëcäts pa ubiira.

¹⁶ Uci kafa kacak ki ifar ci kayëman, yul ifar bëlieng aci iyëman; a uci kabuul bëko ci kayëman, ina aci buts iyëman.

¹⁷ Maa uci ilon ina cëtaa, a wi nan ci buoliwa bëreeŋ, a m kabana tsi pëlas iyul, a m duka m bof tsi ibuul bul ni tsi pëñaak bul,

¹⁸ cats rëmbandar tsi bërun ina in cëtaa yunk; maa uci m ci tsi përëmbandar, mean u cits wi ka rialan un kabuul, maa aci kabuul ka rialanu kun.

¹⁹ Man ni wak kë ja: “Ina acëtaa, pa nji pëkabana.”

²⁰ Awara! Undo kawakats bukul, ka wun ba cëtaa; maa wi, undo uwak ka wun m mob m liincan. Cats rëmbandar, maa lënkan.

²¹ Par, uci Nasien-batsi wëtats ina in fala yunk, di kee wëtu buts.

²² Wejatsi-e kawara-uwaas Nasien-batsi, ni bi na tamb bi buts: nul atamb, pa ba yër biki; maa awara uwaas pa wi, uci m mob m liincan tsi kawara-uwaas Nasien-batsi; ucits ank ba, wi buts kë falaa.

²³ Bukul Bajudeu buts, uci ba mobats tsi karika-wak, bu kee kabanaa; par Nasien-batsi aka pëyëlan pa pëkaban bukul kak.

²⁴ Par, uci m falaa këfalaa tsi buoliwa bëreeŋ bi m ci bi ubukeeu, a m kabana këkabana tsi buoliwa ba wayana bi, bi m cits bi ubukeeu, andes bamënts biki, bu kee kabanaa tsi buoliwa bukul bi ba ci bi, ubukee bukul.

Pëbuer Israel

²⁵ Batsaar ni nji, nji n ŋalats ind pëpaaŋ un doots wink mea, pa ind përits tsu iyeen ind pëci bameko: katamb-uwaas abi tsi balon bañaan Israel, te uwal wi ban cits biki Bajudeu niaji wi bëlieng aba.

²⁶ Unk, bañaan Israel bëlieng ka buer, bi u picana bi, aja: “Nabueran ka pënë-ni Sion, nii rand Jakob karika-lënk Nasien-batsi.

²⁷ Ko wi, aci karo-pëloole nji ni bukul, uwal wi n pënan wi ngëjuban bukul.”

²⁸ Tsi uleka Upetsan-uwar, bukul bë ci babër, pa uwar ind; maa tsi uleka bërat, a ba ci ba ŋala biki, tsi undo basin bukul.

²⁹ Par ngëtseend Nasien-batsi ni karuaul, di ka gara.

³⁰ Par ind, bi nda roots bunk niiran Nasien-batsi tsi uwal un par wi, maa inkri a nda tsënkan kayëk-ipës, undo bi Bajudeu roots bi ko un jaka wi,

³¹ inkri buts, unk di bamënts biki roots run ko un jaka wi, pa bukul pëtsënkan buts kayëk-ipës, undo kayëk-ipës ki nda tsënkan ki.

³² Par Nasien-batsi alacan bañaan bëlieng tsi karoots ko un jaka wi, pa në yëkar bañaan bëlieng ipës.

Kaya ubëndan

³³ Oo uwandar bëka Nasien-batsi, ni kamekoul, ni umeul! Ngi na baaraan ngi, ko wi nga yëlanaatsa wi pëteena pëjuŋaman! A igaul, ko wi i yëlaatsa wi pëmea ko wi i pac wi!

³⁴ Par, yën me un utsaag Ajug-i? Oo yën ci-un natseendul ibats-i?

³⁵ Oo yën cakës un awëlul, pa na ruree kakan namëntsan?

³⁶ Par ngëko bëlieng apënë-ni tsi nul, nul leemp un ngul, a nga ci pa nul. Përëmb, pa ciin pa nul pa sandëndën. Ameen!