NGËRO 4 - KARÚK-PËRIM KAWALU Nouveau Testament

Per ni Joŋ di kato kawat-pëleents kawiak

¹ Bi Per ni Joŋ wama bi ka ñakanaan bañaan, a bajakan, ni nawiak bawaay kato-kayëman, ni Basaduseu baandi tsi bukul.

² Bu riabats undo bi bu kë jukan bi bañaan, koo leents uleka kanatsee-di-pëcätsts Yeesu.

³ A ba mob Per ni Joŋ aríc di ukalabus te unu ucints, par bërëm awokan pëjëk.

⁴ Maa bacumal tsi ban te biki përim wak tsi Yeesu, a upinara bayënts ba uwak biki watsësar aruakan ngëmiil kañan (5.000).

⁵ Tsi unu ucints, bawiak, ni bawiak Bajudeu, ni bapican-ulua juk di Jerusalem;

⁶ Anas, nan pei pëci nawiak-bajakan ci rul, ni Kayafas, ni Joŋ, ni Aleksandër, ni ban bof biki bëlieng tsi pëbuka bajakan.

⁷ A ba natsan Per ni Joŋ tsi pëncuaf bukul, a ba yepar bukul aja: “Ni pëyëlan pëom oo ni katim kaom ki nda roona kun ko wi?”

⁸ A Per, nan cumi Uwejats-ujënts, ja bukul: “Bawiak bañaan-ucaak, ni bawiak Bajudeu,

⁹ bi wund yepara bink ntsari uleka ko uwar undoa wi tsi niints nalab, ni bi na yësana bi aja,

¹⁰ ind bëlieng, ni bañaan Israel bëlieng, nda mean uwar, niints na nats ink tsi bërun ind, ayësanaana tsi katim Yeesu Këristu, Kanpënë-ni-nasaret, nul ni nda rieŋi di kruus, a Nasien-batsi natsaniul di bacäts.

¹¹ Nul ci-un pëlaak pi nda bër pi, ind baniew, a pul bi witsa aci pëlaak pëtsaak.

¹² Pëbëër ciinats tsi nalon; par tsi utsia batsi, kaats kalon katim ka wëla ki tsi bañaan-bajin, ki ngë ka ki pëbuërëna.”

¹³ Bi ba win bi bërëdëm Per ni Joŋ, din a ba pikra, par bë win ba ci bañaan ban jukats biki, te bë kaats ume. A ba yëkëran bukul, par bë ro ci ni Yeesu.

¹⁴ A ba win niints na yësanee nats ni bukul, a bë kaats ko wi bu kë ja wi, un pats wi.

¹⁵ A ba tsu bukul ba pën di kato kawat-pëleents kawiak; a ba baar pëloole tsi ba ci tsi,

¹⁶ a ba ja: “We winja kë ro wun bañaan biki? Par bawitsa bi ba ro bink ameaa uwar tsi bañaan Jerusalem bëlieng, a ngë yëlants pëpok bukul.

¹⁷ Maa, pa ko wan yilaats pe këpe pëleentsaa tsi bañaan, ngë leentsar bukul, pa ba rits kaka ñakanaan ñaan tsi katim kan.”

¹⁸ A ba kaka rui bukul, a ba tsu bukul përits kaka ñakanaan ñaan, nin pëjukan tsi katim Yeesu.

¹⁹ Maa Per ni Joŋ yankës bukul aja: “Nda wejatsari-e bërier ind, ne aci ko u mab wi tsi bërun Nasien-batsi, wund pëcikëndën ind, oo pëcikëndën Nasien-batsi?

²⁰ Par wund yëlants pëwët pëñakanaan bañaan tsi ko wi wund win wi, a wund teend.”

²¹ Maa, ba ru pe këpe pëleentsar Per ni Joŋ, a ba wëtan bukul ba tsëp; a bë kaats tsi bu kë mobuna tsi bukul ba pikaar, undo bañaan, par bañaan bëlieng aci tsi përëmban Nasien-batsi tsi ko un par wi.

²² Par, niints na yësana unk tsi bawitsa, aka ngëwaanu ngan pe ngi ngëntaaja ngëbaakër.

Ngëriisia ajuk aci tsi bëñaan

²³ Bi Per ni Joŋ wëtana bi, din a ba witsa di bacints bukul ee leents bukul ngëko ngi bawiak-bajakan, ni bawiak Bajudeu ja ngi bukul bëlieng.

²⁴ A ute bukul ko wan, a ba kat irim bëlieng aja Nasien-batsi: “Ajug! Wi leemp un batsi, ni utsia, ni bërëk, ni ngëko ngan ci ngi bëlieng tsi tul,

²⁵ a m ñakan tsi Uwejats-ujënts tsi mtum asin wund Dawid naleempu, m ja: ‘We ka wun a ban cits biki Bajudeu cum ni uriab, a bañaan kë wejats ngëko ngan kaats ngi bëkat?

²⁶ Basien tsi umundu yecis, a bawiak bofëlar aro pëloole, ba natsara Ajug, ba natsara Këristuul.

²⁷ Tsi ucär, Eroodis ni Ponsiu Pilaatus, ni ban cits biki Bajudeu, ni bañaan Israel, bë bofëlar tsi përaasa pi, a ba natsara naleempu nayëman, Yeesu, ni m dati.

²⁸ Bë ro ngëko bëlieng, ngi kañanu ni uŋalu ro ngi yecis ba.

²⁹ A inkri Ajug, cikëndëni-e bi bu kë píc bi; tsuun baleempu ba leents përimu ni bëyeentsal,

³⁰ kë colan kañan pa puu yësan bañaan, puu ro ngëpibanaani ni ngëko ngan pikërën ngi, tsi katim Yeesu, naleempu nayëman.’”

³¹ Bi ba ba bi bëñaan, a tsëko tsi ba jukëna tsi siintsar, a ba cum bëlieng Uwejats-ujënts, bu kë leents përim Nasien-batsi ni bëyeentsal.

Bawak tsi Yeesu bacak, bë bofara bëka

³² A kandënd bañaan ba uwak biki ci uwaas uloole ni uwejats uloole; njn ñaan di ka ja tsi ibatsul, ko ulon tsi bëkaul aci wiicul bërierul; maa bë bofara ngëko bëlieng.

³³ Ni pëyëlan pëwiak, a bapostolu kë leents bi Yeesu, Ajug, natsee bi di pëcäts; a bëtseend bëwiak ro ci tsi bukul bëlieng.

³⁴ Kaats naranj tsi bukul, par ban ka biki irig oo ito, bë ja ba waap yul, bu ka tsiji uncaam wi ba waapar wi yul

³⁵ kee jukan tsi bërun bapostolu. Din u faa, kara ñaan bi na fier bi.

³⁶ A Juse, nul ni bapostolu tsui katim, Barnabas, uci wi, (abuk kawël katëb). Nul abofëna tsi pëbuka Lewi a na pënë-ni Cipëri,

³⁷ awaap bërigul, a na tsiji uncaam wi na waapar wi ee jukan tsi bërun bapostolu.