NGËRO 10 - KARÚK-PËRIM KAWALU Nouveau Testament

Korneeliu arui Per

¹ Aka nalon niints di Seesareeya, ka jaka Korneeliu; aci kapëton kandënd basondaari ki ka n jaka ki “ki Itaalia.”

² Aci niints nawar, na lënk Nasien-batsi, nul ni bañaan katoul bëlieng, a nu wël bañaan bëtseend mak, nu ñaan Nasien-batsi kara unu.

³ Ulon unu, ko pi ngëler ngëwaants bëtakala, tsi bëwinal, na win uwar ulon uwaanju Nasien-batsi bi tsi nul, a u jaul: “Korneeliu!”

⁴ A na kaŋan wul këkës, na lënk, a na ja: “Aci we, Ajug?” A uwaanju jaul: “Bëñaanu ni kawël-bëtseendu apaiya ee lesa tsi bërun Nasien-batsi.

⁵ Inkri, yëlan balon bañaan di Jope, ba rui Simon, ni ka n jakee buts Per.

⁶ Nul awelanaan di Simon ni ka leempëna unk itël, nan ciina unk tsi kambaŋ bërëk.”

⁷ Bi uwaanju u ñakanaanul wunk pën bi, a Korneeliu rui baleemp batëb biki katoul, ni nalon nasondaari na lënki Nasien-batsi tsi ban ci biki tsi uleempul;

⁸ a nu ba pëleents bukul ngëko bëlieng, na yël bukul Jope.

Bëwinal Per

⁹ Tsi unu u neki wi, a ba ci tsi bëga pëtsëp; bu kë wokan përaasa, a Per paya ruëts kato, tsi uson unu, pa pëñaan.

¹⁰ A na tsijar ni ubon, na ŋal përiala; maa bi ba wama bi ka kayecis bariala, na te na pën tsi nul.

¹¹ Din, na win batsi waantsar, a ko ulon kë welee anaami unk kaleenj kawiak, kan tana ki tsi imbiantëmb ibaakër, ka wela tsi utsia.

¹² Bametsu kul a tsij ngëkoraar ngë n jar bëlieng, ngi këtsiim këbaakër, ni ngi kan puula ngi tsi utsia, ni ngëko-ngëyits batsi.

¹³ A përim jaul: “Natsaan, Per! Fiŋan kë re.”

¹⁴ Maa Per jankma aja: “Nin a, Ajug! Par iji i netse n de u niiranaatsa wi përea, a u tsopand.”

¹⁵ A përim jaul uyaas utëbantsan: “Ko wi Nasien-batsi jëntsan wi, wi m di kë ja wul atsop.”

¹⁶ Kako kamënts kun ro unk te ngëyaas ngëwaants, a uyëk umënts wun, ka witsa batsi.

¹⁷ A Per kë yepar tsi uwejatsul ko wi bëwinal bi na win bi pac wi; a bayënts biki Korneeliu yëli biki nats di pëlëman, bu kë yepar kato Simon.

¹⁸ A ba ru, a ba yepar ne Simon ni ka n jakee buts Per atsooŋatsaan tsi kato ki.

¹⁹ A Per wama ka wejatsar uleka bëwinal, a Uwejats jaul: “Teenan-e, bayënts batëb biki, bu ka tsasu;

²⁰ natsaan, kë juŋa pëtsëp ni bukul, tsë tsij ngëwejats ngëtëb, par nji yëli un bukul.”

²¹ Per wela ee tsënk bayënts bamënts bukun, a na ja: “Nji ni! Nji ci-un ni nduu tsasi. We tsu wun a nda bi tsi?”

²² A ba ja: “Korneeliu, aci kapëton basondaari, niints namabal, na lënkand Nasien-batsi; a ucaak Bajudeu bëlieng kë jaarul ko u wara wi. Ulon uwaanju uyëma njaul wun na ruiu bi katoul, nii te irimu.”

²³ Din, a Per welan bukul. A tsi unu ucints, na natsa atsëp ni bukul, a balon batsaar tsi Këristu, ban pëni biki Jope, ci ni nul.

Per di kato Korneeliu

²⁴ A tsi unu ucints kak, ba band Seesareeya. Korneeliu ro rui ba bayëtsul ni ifetsarul, bee juk, a nuu lip bukul.

²⁵ Bi Per kë niaj bi, Korneeliu tsëp ee jëk ni nul, a na yër tsi itsiimul ajintëlaul.

²⁶ Maa Per katul, a na ja: “Natsaan, nji buts man ci ñaan-najin.”

²⁷ Bi na wama bi ka ñakan ni nul, na niaj ee tsënk bañaan bacumal juk,

²⁸ a na ja bukul: “Nda me u niiranaatsa niints Najudeu pëbofëlar oo pëya di natsooŋ; maa Nasien-batsi apibanin n kaats pëja nin ñaan jëntsats oo waraatsa.

²⁹ Wul ka wun, in pokats pëbi, bi nduee bi; maa inkri, ma ŋal pëme ko wi m duurin wi?”

³⁰ A Korneeliu yankës aja: “Aro ba ntsari ngënu ngëbaakër, tsi uler pi wi; a n do ci tsi bëñaan, ngëler ngëwaants ngi bëtakala di kato nji; tsi uyëk umënts wun, a nalon niints nats tsi bërun nji, atiema iŋi ijielal,

³¹ na ja: ‘Korneeliu! Bëñaanu ateaa, a kawël-bëtseendu lesaa di bërun Nasien-batsi.

³² Yëlan ñaan di Jope na rui Simon, ni ka n jakee buts Per; aci natsooŋ di kato Simon ni ka leempëni itël, tsi kambaŋ bërëk.’

³³ Din, a n yëli bañaan ba ruiu, a m do uwar bi m bi bink. Inkri, n ja ci bikink tsi bërun Nasien-batsi, pa pëte ngëko bëlieng ngi Ajug tsuu ngi pëja.”

Irim i Per ñakan yi di kato Korneeliu

³⁴ A Per jankmaul aja: “Tsi ucär, man yëkëran Nasien-batsi di ka kicës bañaan;

³⁵ maa tsi ucaak un ci wi-ba këci, na lënkuli a nuu ro ko u mab wi, në niiranul.

³⁶ Awëtani përimul pa babuk Israel, pa pëleents bukul Upetsan-uwar pëfac tsi Yeesu Këristu. Namëntsi ci-un Ajug bañaan bëlieng.

³⁷ Ind nda me përim pa leentsaa pi ajëk Judeeya bëlieng, akur-ni di Galileeya, bi Joŋ ba bi pëleents uleka bëmíja:

³⁸ bi Nasien-batsi tulari bi Yeesu Uwejats-ujënts ni pëyëlan, nul Kanpënë-ni-nasaret, a nuu yaana ngëleka bëlieng, nuu ro uwar, a nuu yësan bañaan bëlieng biki Ujabël tsu biki tsi pëluëk, par Nasien-batsi aci ni nul.

³⁹ A wund ci ba maatir biki ngëko ngi na ro ngi bëlieng tsi ucaak Bajudeu, ni di Jerusalem. Nul ni ba fiŋi tsi rialul di pëmul,

⁴⁰ maa tsi unu uwaajantsan Nasien-batsi natsaniul di pëcäts, a na tsuul na winaa;

⁴¹ cits bañaan bëlieng winul bukun, maa bamaatir, biki Nasien-batsi ro biki car arat, un ci wi, wund ban diala biki ni nul, a wund raan tsëloole, bi na natsee bi di bacäts.

⁴² A na tsu wund pëleents bañaan përim, ni pëpiban u ciul ci-un ni Nasien-batsi rati pëci nawat bayësal pëleents, ni bacäts.

⁴³ Ulekaul wi bayëlia bëlieng ñakandar wun aja: Na waki ba këwak tsi nul, në jampësaa ngëjuban tsi katimul.”

Ban cits biki Bajudeu, bë yank Uwejats-ujënts

⁴⁴ Bi Per wama bi ka ñakan irim yan, Uwejats-ujënts welee tsi ban ci biki bëlieng tsi pëcikëndën përim.

⁴⁵ A bafets Yeesu ban ci biki Bajudeu, ban do bukunk ci ni Per, win bi utseend Uwejats-ujënts koŋee bi buts tsi ban cits biki Bajudeu, a ba pikra bëlieng.

⁴⁶ Par, bë te bu kë ñakan mleents, a bu kë rëmban Nasien-batsi. Din a Per yjankema aja:

⁴⁷ “Ba yank bikink Uwejats-ujënts pinja ane ñaan yëlan pëlaaŋ bukul pëmijana tsi mlik-a?”

⁴⁸ Na tsu pa ba mijana tsi katim Yeesu Këristu. A ba ñaanul na ruka ni bukul ba ro ngënu.