MATEU 9 - KARÚK-PËRIM KAWALU Nouveau Testament

Yeesu ayësan nalab

¹ A Yeesu gija kanawa, a na lut bërëk a na band përaasaul.

² A ba tsijiul nalab nan piintsanee tsi pëyoongia. Bi Yeesu win bi uwak bukul, a na ja nalab: “Napäts, fiaari! Ngëjubanu ajampësaa.”

³ Din a balon tsi bapican-ulua jot pëja tsi ibats bukul: “Namëntsi kar Nasien-batsi!”

⁴ Maa a Yeesu me ngëwejats bukul, a na yank bukul aja: “We ka wun nda tsij ngëwejats ngëjuatsal di ngëwaas ind?

⁵ We pe wun përaf, tsi pëja: ‘M jampësaa ngëjubanu,’ oo pëja: ‘Natsaan kë yandaar?’

⁶ Inkri, pa ind pëme, Abuk ñaan-najin ka pëyëlan tsi umundu pa jampësa bañaan ngëjuban,” — din a na ja nalab: “Natsaan, jejan pëyoongiau kë tsëp katou.”

⁷ Din a nalab natsa atsíis katoul.

⁸ Bi indënd bañaan win bi ko umënts wun, a ba lënk mak a bu kë bëndan Nasien-batsi, nul na wëli bañaan pëyëlan pi pëmënts pi.

Yeesu arui Mateu

⁹ Bi Yeesu kë tsëp bi, a na win nalon niints, ka jaka Mateu, atsoar di tsëko bëluk-uraasa; a na jaul: “Fetsin.” A na natsa a na fetsul.

¹⁰ Bi Yeesu tsoar bi bariala ri kato, a bayep bëluk-uraasa bacumal, ni bajuban bi ee tsoar bariala ni nul, ni bafetsul.

¹¹ Bi Bafariseu win bi ko wan, a ba ja bafetsul: “We ka wun Najukan ind kë riala ni bayep bëluk-uraasa, ni bajuban?”

¹² Maa a Yeesu te, a na yank bukul, aja: “Bañaan bayësal fierats nacuunkan, maa ba maak biki fierul bukun.

¹³ Nda tsëpan ndii juk ko wi përim pan picana pink pac wi: ‘Kayëk-ipës ki n fier kun, maa cits bëjakan.’ Par cits bañaan ba mab biki, biki n bi bukun përu, maa bajuban.”

Uleka kabër-mlik

¹⁴ Bafets Joŋ bu bi tsi Yeesu a ba yeparul aja: “We ka wun a wund ni Bafariseu ja ucär wund ka bër-mlik, maa bafetsu di ka bër-mlik?”

¹⁵ A Yeesu ja bukul: “Bañaan banduee biki a ba bi bënim, bu yëlants pëjuatsan uwal wi nayank bunim wama wi ci ni bukul-a? Maa uwal ka baandi, wi nayank bunim kë pënana wi tsi bukul, din bu ka bër-mlik.

¹⁶ Ñaan di ka jej kafalësër kaŋí kawalu na babuna kul kaŋí kacätsar; par uci na jej kul ababëna kaŋí kacätsar, kafalësër kaŋí kawalu ka rës kaŋí kacätsar kun, din kajín ka pe pëwaan.

¹⁷ Te ñaan di ka tsu pëwat pëwalu di itël in tsaf yi. Na ro ank ba, pë mayan itël, pë tula ka baar utsia, din itël ka coka. Maa pëwat pëwalu aka pa roon pëtsua di itël iwalu, din itël ni pëwat di ka coka.”

Yeesu natsani abuk Jairus ŋaats di pëcäts, a na yësan ŋaats ni kan tulee pëñaak

¹⁸ Bi Yeesu kë leents bi bukul irim yan, a nalon nawiak tsi kato-kajúki baandi, a na jintëla tsi bërun Yeesu a na jaul: “Abuk nji ŋaats aru cäts inkri, maa bili kë paful kañanu, din në kak nayësal.”

¹⁹ A Yeesu natsa arunanul, a bafetsul tsëp ni nul.

²⁰ A u ka ŋaats ni kan tulee pëñaak, tsi ko undo wi ngëwaanu untaaja ni ngëtëb. A na ya tsi ufets Yeesu, a na këraraul kambiantëmb kaŋí ki na tiema ki.

²¹ Par aja tsi uwejatsul: “Uci n kërara ba ki na tiema ki, din ka yës.”

²² A Yeesu witsësa a na winul, a na jaul: “Ŋaats, kaan katsëb; uwaku abueranu.” Tsi uyëk umënts wun a ŋaats yës.

²³ Bi Yeesu band bi kato nawiak kato-kajúki, a na win bafuts incand, ni kandënd bañaan, a bu kë cap; a na ja bukul:

²⁴ “Nda pënan, napäts cätsats, aŋooy këŋooy.” A ba ci tsi përiatul.

²⁵ A bi kandënd bañaan cilanee bi utsand, a Yeesu niaj bametsu; a na mob napäts kañan, din a napäts natsee.

²⁶ A ko wi na ro wi leentsa ajëk ucaak bëlieng.

Yeesu ayësan bakuel batëb, ni nalon narika-ñakan

²⁷ A bi Yeesu kë pëni bi rul, a bakuel batëb rukaul tsi ufets, a bu këlië koo ja: “Abuk Dawid, yëkar wund ipës!”

²⁸ Bi Yeesu niaj bi bametsu kato, a bakuel tsëp awokul a na ja bukul: “Nda fiaar yëlan përo ko wan-a?” A ba jaul: “Ee-e, Ajug!”

²⁹ Din, a Yeesu kërara bukul këkës, a na ja: “U roaan ind bi nda wak bi.”

³⁰ A këkës bukul teenan. Din, a Yeesu ñakanaan bukul ni përim pëtamb, aja: “Nda rukan ibats! Ñaan tsë me!”

³¹ Maa a ba pën, a ba leents uleka Yeesu ajëkëlan kajara ucaak ki bëlieng.

³² Utsëp bukul, a bañaan balon tsiji Yeesu nalon ni ucaay niaji, a ri ka ñakan.

³³ Bi Yeesu ruak bi ucaay, a narika-ñakan, ñakan. A kandënd bañaan pikra bëlieng, a bu kë ja: “Ko u naam wi pi wi netse ro wina koon këwina tsi Israel!”

³⁴ Maa, a Bafariseu ja: “Aci uwiak ngëcaay wi nuu ruakëna wun ngëcaay.”

Bacët cumats

³⁵ A Yeesu yaana iraasa bëlieng ni ngëntab, a nuu jukan bañaan di ito-ijuki, nuu leents Upetsan-uwar uleka pësien batsi, nuu yësanaand bañaan mmoj bëlieng, ni mmaak man ci bi ba këci.

³⁶ A nu win kandënd bañaan, a na yëkar bukul ipës, par bu noor mak, a ba niam, pi ngënkaanel nga kaats ngi nayafan.

³⁷ Din, a na ja bafetsul: “Mleempëna arëmb, maa bacët cumats;

³⁸ nda ñaani Ajug mleempëna, pa na yël bacët, ba ya kacët tsi mleempënaul.”