MATEU 5 - KARÚK-PËRIM KAWALU Nouveau Testament

Bëjukan Yeesu di ruets untunda Ba naak biki

¹ Bi Yeesu win bi indënd bañaan, a na paiya ruets untunda. A na tsoar, a bafetsul tsëp ee wokul.

² A na kur pëjukan bukul koo ja:

³ “Bu naak, ban ci biki baranj tsi uwejats, par pësien batsi aci piic bukul!

⁴ Bu naak, ban ci biki tsi rug, par bu kee raaca!

⁵ Bu naak, ban ci biki bajuab-ngëwaas, par bu kee rukanda umundu!

⁶ Bu naak, ban bonatsar biki bëmabal a ba lofëntsar bul, par bu kee suetsana!

⁷ Bu naak, ban ci biki bayëk-ipës, par bu kee yëkara ipës!

⁸ Bu naak, ban ci biki bajënts ngëwaas, par bu kee win Nasien-batsi!

⁹ Bë naak, ban ci biki batsu pëjoabuts tsi bañaan, par bu kee ru jakaa babuk Nasien-batsi!

¹⁰ Bë naak, ban ci biki tsi përeata undo bëmabal, par pësien batsi aci píic bukul!

¹¹ Nda naak, uwal wi bañaan këkar ind wi, a bu këreat ind, a bu këjaar ind ngëko pëkalam, tsi undo nji!

¹² Nda lílani, ndë kita, par bëluk ind a ci bëwiak di batsi; par unk di ba reat dun bayëlia ba yëri ind biki bërun.

Pënam, ni ufac

¹³ Ind ci bukun pënam umundu. Maa uci pënam katse tap, we ka kakanaan wun pul pa tap? Katse ka bëkat; aruka ci pul pëgutsara utsand, bañaan këpoos pul.

¹⁴ Ind ci bukun ufac umundu. Përaasa pan ci pi tsi untunda yilatsa pëci pan beka pi.

¹⁵ Ñaan di ka taban ulamp nëjej ko ka kundëna; maa ka tsu di tsëpafi, din u fiets tsëko pa ban ci biki bëlieng di kato.

¹⁶ Unk buts, ufac ind u fietsan tsi bañaan, pa bu ka win ngëwar ngi nduu ro ngi, bu këbëndan Asin ind nan cii di batsi.

Ko wi ulua ja wi, aroa aba

¹⁷ Ind tsë ja ne man bi pëgar ulua, oo pëgar bëjukan bayëlia; nji i biits pëbaan ngul maa përo ngul m ba.

¹⁸ Mán leents ind ucär: Tsini batsi ni utsia këpar, ŋal upic un pe wi pëtienkëts, nin ujopat upic tsi ulua, di ka niaman, te ngëko bëlieng ka roaa.

¹⁹ Nandoi ko un pokaa wi tsi ulon tsi ngëtsua ngan pe ngink pëtienkëts, a nuu jukan bañaan përo unk, kee tsua nan pei pëtienkëts di pësien batsi. Maa nan cii tsi përo ko wi ngëtsua ngëmënts ngi ja wi, a nuu jukan bañaan përo unk, kee tsua nawiak di pësien batsi.

²⁰ Par man ja ind: Uci bëmabal ind peets bi bapican-utsaua ni bi Bafariseu, nda ri ka niaj koon këniaj pësien batsi.

²¹ Nda te ko wi bajon jaka wi: ‘M di kë fiŋ ñaan; a nan fiŋi ñaan në wata pëleents.’

²² Maa nji, man ja ind: Nan diabatsari ni ba tsaari, në wata pëleents; a nanjai ni ba tsaari, raka, në wataa pëleents di kato kawat-pëleents kawiak; a na njai ni ba tsaari, nafuur, nii lacana pa nfeernu bërua.

²³ A uci kë wël bëtseendu tsi bëgij, a m les ni nda tsaari ka ko wi na tsijaru wi di uwaasul,

²⁴ júkani bëtseendu tsi bërun bëgij, kë tsëp kii teelar bërun ni ni nda tsaari; a kuu ba, kë witsee kë wël bëtseendu.

²⁵ Caran teelar ni bëñaasaru, bi m wama bi m ci ni nul tsi bëga pëtsëp kato kawat-pëleents; ucits ank ba, buñaasaru ka tikanu nawat-pëleents, nawat-pëleents ka tikanu napulis, din kë gutsara ukalabus.

²⁶ Mán leentsu ucär: M di kë pëni rul, te m yaa m tuam pëluk bëluk bi m tsua bi.

²⁷ Nda te bi u jaka bi: ‘M di kë ro mjubi.’

²⁸ Maa nji, ma n ja ind: Uci ñaan teen ŋaats a na ríul, a jub ba ni nul di uwaasul.

²⁹ Uci pëkësu përíl kë tsuu a kë juban, kuatësi pul kë guts pul pa lawanu; par amat pëjakaa m ranj kaŋí uliafu kaloole, ni pëjakaa uliafu bëlieng agutsa di nfeernu.

³⁰ Uci kañanu kariir kë tsuu a kë juban, falan kul kë guts kul ka lawanu, par amat pëjakaa m ranj kaŋí uliafu kaloole, ni pëjakaa uliafu bëlieng atsëp nfeernu.

Kagar-bënim

³¹ A u jaka buts: ‘Ni kan gari bënim aarul, na anul kakaarta kagar-bënim.’

³² Maa nji, man ja ind: Nan gari bënim aarul, te cits uleka ko katuk-ufuts, ka tsuul pëjub. A na nimi ŋaats nan gare bënim, a jubi.

³³ A nda te buts ko wi bajon jaka wi: ‘M di kë garëndan përo ko wi m baaja wi, maa kë ro ko wi m baaja wi Ajug.’

³⁴ Maa nji, man ja ind: Ind tsë baaja ko; tsi batsi par aci pëtsoari Nasien-batsi,

³⁵ nin tsi utsia par aci tsëpafi iyotsul, nin tsi Jerusalem par aci përaasa Nasien nawiak.

³⁶ A te tsë baaja tsi beenu, par m yëlanëts ts pëtsu kaweelu ka faac oo ka jín.

³⁷ Uci ee-e kë ja ee-e uci aa-a kë ja aa-a, u laka wi tsul apënë-ni tsi na pëkaalam.

³⁸ Nda te u jaka: ‘Pëkës ka lukëna pëkës, a përumaj kë lukëna përumaj.’

³⁹ Maa nji, man ja ind: Ind tsë lukan pëkaalam; uci ñaan kobu tsi kambakats kariir, kaŋaniul kacints kun buts;

⁴⁰ a uci ñaan ŋal pëtsëpandu kawat-pëleents pa pëyankënu kamíisau, wëtariul buts kapantu;

⁴¹ a uci ñaan peeru pëtsëp aa kë ro unkilometar uloole, doan ngëtëb ni nul.

⁴² Na ñaanui ko, tseendanul; a na ŋali pëtsiatsu ko, tsë laaŋul.

⁴³ Nda te u jaka: ‘Kë ŋal acintsu, kë bër nabëru.’

⁴⁴ Maa nji, man ja ind: Nda ŋalan babër ind, ndë ñaandar ban ci biki tsi përiat-riatan ind,

⁴⁵ pa ndë ci babuk Asin ind nan cii di batsi; par atsu unuul a u ja u roon u mayi pa ba kaalam ni bawar; a na tsu usubal a uu subi pa bamabal ni bamabats.

⁴⁶ Par, uci nda ŋal ba ŋal ind biki rin, buom bëluk bi ndii ka bun? Bayep bë bëluk-uraasa, bë ri ka ro ank buts-a?

⁴⁷ A uci nduu leena bayëts ind Bajudeu rin, wee nda ro wun un pe wi? Bameets-nasien-batsi, bu ri ka ro ank buts-a?

⁴⁸ Bi u ci bank, nda ciin ban ba biki pëci bawar, bi Asin ind nan cii di batsi ci bi nan bai pëci nawar.