MATEU 23 - KARÚK-PËRIM KAWALU Nouveau Testament

Yeesu aleentsar Bafariseu, ni bapican-ulua

¹ Din, a Yeesu ja indënd bañaan ni bafetsul:

² “Bapican-ulua ni Bafariseu, bu tsoar tsi pëtsoari Moises.

³ Nda roon ngëko ngi bu kë ja ind ngi bëlieng, nda roon ngul, ndë mob tsi ngul, maa ind tsúuts ro ngi bu kë ro ngi. Par bu ka ja, te bë ri ka ro.

⁴ Bu ja ba tan itan iritsal, iñats yi pëyunts, bu ka lapan yul bañaan, maa bukul bërier bukul, bu ri ka ŋal pëkërara yul, ŋal ni pëkuanj.

⁵ Bu ka ro ngëko bukul bëlieng pa pëwinaa tsi bañaan. Unk, bu kë waanës igaangëni ngëtsua bukul, bu kë rëmban imbiantëmb iŋi-bëtiem bukul.

⁶ Bu ŋal ilas icäk tsi ngëfesta; a di ito-ijuki, bu ka ŋal itsoari icäk;

⁷ a ba ŋal puu wëlaa mboos tsi pëncum, ni bañaan puu ru bukul pëja: Rabi!

⁸ Maa ind, ind tsuuts rua Rabi, naloole rin ci-un Najukan ind, par ind bëlieng nda tsaar këtsaar.

⁹ Te ind tsë ru ñaan tsi umundu asin ind, par naloole rin ci-un Asin ind, nul nan cii di batsi.

¹⁰ A ne rua bawiak, par naloole rin ci-un Nawiak ind, Këristu.

¹¹ Nan pei pëci nawiak tsi ind, ka ci ni kan këmand indi.

¹² Nan diangi beenul, në welanaa; a na welani beenul, në riangaa.

Yeesu ja, pëkat ibats tsi ngëko ngëcumal

¹³ Cay bapican-ulua ni Bafariseu, ind banguungu! Par nda ja nda roon nduu ríc bañaan Pësien batsi tsi këkës bukul. Maa ind bërërind nda ri ka niaj, nin pëwëtan biki kan këmand biki pëniaj ba niaj.

¹⁴ [Cay bapican-ulua ni Bafariseu, ind banguungu! Par nda ja nda roon nduu yankëna bacätsëndan-bayën bukul ngëko ito bukul; a nda ja nda roon nduu yampan bëñaan, pa pëpibandar. Wul ka wun ndu tsua ulaci-un pe wi pëjuats.]

¹⁵ Cay bapican-utsus ni Bafariseu, ind banguungu! Par nda ja nda roon nduu yaana irëk ni utsia, pa pëtsu ñaan na ci nafets-bëga nawalu; a nu ba pëci ank, ndë tsuul na pe ind pëci ñaan nfeernu, ngëyaas ngëtëb.

¹⁶ Cay ind ban tsua biki bawiak a nda ciind bakuel! Par nda ja nda roon nduu ja: ‘Uci ñaan baaja pa tsëko-tsëyëman, umënts wan cits un ci wi ko; maa uci ñaan baaja pa uwëru tsëko-tsëyëman, aka përo ko wi na baaja wi.’

¹⁷ Ind baranj-ibats a nda ciind bakuel! Woom pe wun pëci uwiak: uwëru, oo tsëko-tsëyëman tsi kan jëntsan tsi uwëru?

¹⁸ A nda ja nda roon nduu ja kak: ‘Uci ñaan baaj na tsi bëgij, umënts wan cits un ci wi ko; maa uci ñaan baaj na tsi bëtseend ban ci bi tsi bëgij, aka përo ko wi na baaja wi.’

¹⁹ Bakuel bamënts biki! Woom pe wun pëci uwiak, bëtseend oo bëgij bi kan jëntsan bi bëtseend?

²⁰ Wul ka wun, nan baajnee tsi bëgij, abaajna tsi bëgij, ni tsi ko un ci wi bëlieng tsi bul.

²¹ A nan baaj nee tsi tsëko-tsëyëman, abaaj na tsi tsëko-tsëyëman, ni tsi nan ciinee tsul.

²² A nan baaj nee tsi batsi, abaaj na tsi pëtsoari Nasien-batsi, ni tsi nan tsoari tsi pul.

²³ Cay bapican-ulua ni Bafariseu, ind banguungu! Par nda ja tsi kara ifa untaaja ngëko pi umbaantu, ni iru, ni msaboola, ndë wël kaloole, ndë bër ko un pe wi pëka bëkat tsi ulua, un ci wi bëmabal, ni kayëk-ipës, ni kamob-tsi-ko. Ngëmënts ngí aka përoaa, te nda rits wët përo nganduka ngunk.

²⁴ Ind ban tsua biki bawiak a nda ciind bakuel! Nda ja nda roon nduu cíjan ubarëm, ndë yoor ungilëm!

²⁵ Cay bapican-ulua ni Bafariseu, ind banguungu! Par nda ja nda roon nduu jëntsan bafetsu karaani ni përialaani; maa ri bametsu, i cum ni kaca ngëko bañaan ni karí-ko.

²⁶ Nafariseu, nakuel namëntsi! Jëntsani bërun bametsu karaani, din bafetsu ka jënts buts.

²⁷ Cay bapican-ulua ni Bafariseu, ind banguungu! Par nda naam pi ibuk in faacana yi, a i wina i wara di utsand; maa di bametsu, i cum imua bacäts ni ngëkoraar mtsopi bëlieng.

²⁸ Ind buts, nda ja bañaan teen ind, ndë ci bamabal tsi këkës bukul; maa di bametsu, nda cum kanguungu ni ngëko-kamabats.

²⁹ Cay bapican-ulua ni Bafariseu, ind banguungu! Par nda ja nda roon nduu niew ibuk bayëlia, nduu warandan ibuk bamabal;

³⁰ a nduu ja: ‘Uci ngë ro maatir uwal basin nja ngë bitse ka ro ro pëloole ni bukul, tsi katul pëñaak bayëlia.’

³¹ Unk, nda ci tsi pëpiban bërier ind nda ci babuk bañaan ban fiŋ biki bayëlia.

³² Bi u ci bank, nda moban tsi përo ank aa ndë pean ngi basin ind!

³³ Ko wi nda ci wi ngëko-pëtsats, uraasa ngëkarar! Um bi ndu buer bun tsi pëlacana pa nfeernu?

³⁴ Wul ka wun, a wëtani ind bayëlia, ni bameko, ni bapican-ulua. Nduu fiŋ balon, ndë rieŋ balon di kruus; uja tsi kato-kajúki ind, ndë tucan balon; uja tsi përaasa, ndë natsara bukul koo noor-nooran.

³⁵ Unk, pëñaak bandoots biki ko ka kakar ind, pul pan tula pi tsi utsia, pëkur-ni tsi pëñaak Abel, namabal, te tsi pëñaak Sakaria, abuk Barakia, ni nda fiŋi pëpën tsi tsëko-tsëyëman pëya tsi bëgij.

³⁶ Mán leents ind ucär: Ngëmënts ngan bëlieng kee nga baandë-ni bañaan ntsari.

Yeesu akaandër Jerusalem

³⁷ Jerusalem, Jerusalem, wi na njai m doon ku fiŋ bayëlia, a kë tap ba yëlee biki tsi wi, ni ilaak aa bu ka cäts! Ngëyaas um, ngnja ngun n doon ka ŋal pëjukëlën upätsu, pi ugúk kë jukëlën pi ngëbuk tsi utsia ibaakëla; maa nda ŋalats!

³⁸ Nda teenan-e! Kato ind abërara ind kajënts!

³⁹ Par, ma n ja ind, tsi inkri, nda katse ka winin, te ndë yaa ndë ja: ‘Mbeenira tsi nul na mbii tsi katim Ajug!’”