MARKU 11 - KARÚK-PËRIM KAWALU Nouveau Testament

Yeesu aniaj Jerusalem

¹ Bi ba wokan bi Jerusalem, ni untab wi ka n jaka wi Betfage, ni wi ka n jaka wi Betaania, di kajara untunda Mëoliwa, a Yeesu yël bafetsul batëb,

² na ja bukul: “Nda tsëpan untab un ci wink tsi bërun ind. Uniaj ind rul, ndë tsënk ubuk-ubúuru tana, wi ñaan netse wi rija; nda paci, ndë tsiji.

³ A uci ñaa n ja ind: ‘We ka wun ndë ro ko wi?’ Ndë jaul, Ajug afier; ka kakani tsi, inkri.”

⁴ A ba tsënk ubuk-ubúuru tana tsi kawok pëlëman pëbuem, tsi bëga; a ba paci.

⁵ A balon bañaan tsi ban ci biki tsul ja bukul: “Wee ndu pacar wun ubuk-ubúuru wi?”

⁶ A ba yank bukul bi Yeesu ro bi ja bukul ba ja; a ba wët bukul.

⁷ Ba tsëpand ubuk-ubúuru umënts wun abandand di Yeesu, a ba paf iŋi-bëtiem bukul tsi ruets, a Yeesu rija.

⁸ A bañaan bacumal liap iŋi-bëtiem bukul tsi bëga; a balon liap ina mko yi ba fali yi di bëreeŋ.

⁹ Ba yër biki bërun, ni ban dukee biki ufets, kë lië koo ja: “Osana! Ni kan bi ink tsi katim Ajug, abeenira!

¹⁰ Pësien asini nja Dawid pi kan bi pink, abeenira! Osana di tsëko tsan pe tsi pëci di ruets!”

¹¹ Bi Yeesu niaj bi Jerusalem, di kato-kayëman, a na teen ngëko bëlieng ajëkëlan. Bi u ruka bi ci bëtakala, na pën ni bafetsul untaaja bukun ni batëb atsëp Betaania.

Bëfíigu ban bukats bi

¹² Tsi unu ucints, upën bukul di Betaania a Yeesu bonats.

¹³ Bi na win bi bufíigu ban tsij bi ito a ba lawanul, a na tsëp pëteen ne ka win ank mbuk tsi bul. Maa bi na band bi tsi bul winats ko, aci koon ito, par roots ci uwal mbuk mfíigu.

¹⁴ Din, a Yeesu ja bul: “Yaas a ñaan ka kaka re pëbuk tsi wi!” A bafetsul te ko wan.

Yeesu aruak bawaap di Kato-kayëman

¹⁵ A ba band Jerusalem. Bi Yeesu niaj bi kato-kayëman, a na kur përuaki biki ka waap biki, ni biki ka weel biki rul; a na kuutës ngëntabul batsëtsëlan uncaam, ni itsoari bawaap ngëtuuba.

¹⁶ A niiraants ñaan pëparand ko tsi kato-kayëman.

¹⁷ A na jukan bukul aja: “Jakaatsa iink: ‘Kato nji koo rua kato bëñaan pa bañaan ban cits biki Bajudeu bëlieng?’ Maa ind, nda ro kul tsëko kambeku bakiej.”

¹⁸ A bawiak-bajakan, ni bapican-ngëtsua te ngëko ngan, a bu kë tsas bi bu kë ro bi a bu ka fiŋul. Maa ba lalul, par kandënd bañaan bëlieng apikra tsi bëjukanul.

¹⁹ Uyër pëcaal, a Yeesu pën ni bafetsul tsi përaasa.

Bëfíigu ban kay bi

²⁰ A bëfa, upar bukul, a ba win bufíigu kay te di ibuul.

²¹ Din a Per les ko un par wi, na ja Yeesu: “Rabi! Teenan-e! Bëfíigu bi m jaar bunk ujuatsal, akay.”

²² Yeesu yank bukul aja: “Nda kaan u Uwak tsi Nasien-batsi.

²³ Mán leents ind ucär: Uci ñaa n ja untunda wi: ‘Pënan tsi! Tsëpan kii yër di bërëk;’ a uci na tsijënats ngëwejats ngëtëb di uwaasul, maa na fiaar tsi ko wi na ja wi, u rolaa pa nul.

²⁴ Wul ka wun n du n ja ind: Kara ko wi nda yep wi tsi bëñaan, nda waak nda yank! Din ndë ka.

²⁵ Uwal wi nda natsa wi nats koo ñaan, a uci nda tsijar ñaan tsi uwaas, nda jampësaanul, pa Asin ind nan ci di batsi pii jampësa ind buts ngëjuban ind.” [

²⁶ Maa uci nda jampësaats, Asin ind nan cii di batsi di kee jampësa ind ngëjuban ind buts.]

Yeesu ayepara ko wi na tsënkanaan wi përo ngëko

²⁷ A ba witsa Jerusalem. Bi Yeesu kë yandaar bi di kato-kayëman, a bawiak-bajakan, ni bapican-ngëtsua, ni bawiak Bajudeu baandi tsi nul.

²⁸ A ba yeparul aja: “Wee m tsënkanaan wun përo ngëmënts ngi? Oo, yën u un pëtsënkan përo ngul?”

²⁹ A Yeesu ja: “Mán yepar ind përim pëloole; nda yankin, din ka leents ind ko wi n tsënkanaan wi përo ngëmënts ngi.

³⁰ Bëmijan Joŋ, apënë-ni di Nasien-batsi oo tsi bañaan-bajin-a?”

³¹ A ba tseendëlar ibats, a ba ja: “Uci ngë ja: ‘Di Nasien-batsi,’ në ja: ‘A we ka wun nda Uwakatsul?’

³² Maa uci ngë ja: ‘Tsi bañaan-bajin, ha...’” Bë lal kandënd bañaan; par bañaan bëlieng bu Uwak, Joŋ, tsi ucär, aci nayëlia.

³³ Din, a ba yank Yeesu aja: “Wund meets.” A Yeesu ja bukul: “Nji buts, in di ka leents ko wi n tsënkanaan wi përo ngëmënts ngi.”