LÚKAS 4 - KARÚK-PËRIM KAWALU Nouveau Testament

Ujabël ateen-teenan Yeesu

¹ Yeesu, bi na cum bi Uwejats-ujënts, na pëni di kajara bërëk Jordan pëwitsee. Uwejats tsëpandul ulaalats;

² Ujabël kë teen-teenanul rul, ko undo wi ngënu ngëntaaja ngëbaakër. Yeesu reets ko, ngënu ngan bëlieng. A nguu ba, a na bonats.

³ Ujabël jaul: “Uci bi m ci bank Abuk Nasien-batsi, jaan-e pëlaak pi, pa witsa pëpom.”

⁴ Yeesu ja : “Ko wi, picana wun: Cits pëpom din ka pun ñaan kë yafënts.”

⁵ Ujabël tsëpandul ruëts. Ucar umënts wun, u pibanul msien bëlieng tsi umundu.

⁶ U jaul: “Mán wëlu uyëlan wi bëlieng, ni përëmb msien mi. Par mawëla pul, a ndu n wël pul ni n ŋali.

⁷ Uci m jintëlain, pë ci piicu bëlieng.”

⁸ Yeesu ja : “Ko wi, picana wun: Jintëlaan Ajug, nul nan cii Nasien-batsiu, kuu leemparul, nul koorul.”

⁹ A Ujabël tsëpandul Jerusalem. U jutanul di ruëts kato-kayëman, u jaul: “Uci bi m ci bank Abuk Nasien-batsi, jucan-e tsi utsia.

¹⁰ Par ko wi, picana wun: ‘Ka ja ngëwaanjuul përim, ulekau, pa nga waayu;’

¹¹ ni ko wi bëts: ‘Ngul, ka tsiju tsi iñan ngul, pa pëtsiimu rits júnk pëlaak.’”

¹² Yeesu ja : “Ko wi, picana wun: Cats teen-teenan Ajug, nul Nasien-batsiu.”

¹³ Bi Ujabël teen-teenan bi Yeesu aa u ba, u pën alawanul te bëlon bëyaas.

Yeesu akur uleempul di Galileeya

¹⁴ Yeesu witsee Galileeya ni uyëlan Uwejats, katimul kë ñakanaana tsi ngëjara bëlieng ngan fay ngunk tsul.

¹⁵ Nuu jukan di ito-ijúki bëkul, a bañaan bëlieng kë bëndanul.

Yeesu niiranaatsa di Nasaret

¹⁶ Bi na tsëp bi Nasaret, di na kusëna ri, tsi Unu-pënaakësa a na niaj kato-kajúki, bi na ja bi na roon nuu ro, a na natsa bëlayir.

¹⁷ Na wëla ulibëru Isaaya, nayëlia. Na waants, a na win tsëko tsi përim pi picana tsi:

¹⁸ “Uwejats Ajug aci tsi nji, par aratin pa pëleents baranj, Upetsan-uwar; ayëliin pa pëleents bamoba pëfacana, ni bakuel pëkak pëwin, ni pëwëtan ban tsua biki tsi unoor ba fac,

¹⁹ ni pëleents uwal Ajug, u wara wi.”

²⁰ Yeesu lëm ulibëru, na kakan wul naleemp, na tsoar. Bañaan bëlieng di kato-kajúki kaŋanul këkës.

²¹ Din, na ja bëkul: “Ind te bakank; përim pan abaar pëci ntsari.”

²² Bañaan bëlieng ci tsi pëñakan uwar tsi ulekaul. Ba pikra, undo irim iwar i kan pëni yi di mtumul. A bu kë ja: “Cits iink abuk Juse ci-un namëntsi?”

²³ Yeesu ja bëkul: “Ane ndu tibin ank përim pi: Nacuunkan, cuunkandari-e! Doon tsi ucaaku tsi, ko wi wund te wi m do bëlieng di Kafarnaum.”

²⁴ Na ja bëkul kak: “Mán leents ind ucär: Kaats nayëlia na niiranee tsi ucaakul.

²⁵ Tsi ucär, ma n ja ind: tsi uwal Eliyas, nayëlia, a usubal subats ngëwaanu ngëwaants ni këlí paaj, a ubon uwiak yëri tsi ucaak bëlieng, bakaats ban cätsëndan biki bayën bëkul cum tsi Israel.

²⁶ Maa Eliyas yëlaatsa di nin nalon tsi bëkul, ucits ba di ŋaats nan catsëndani ayënul, nan ciinee untab Sarepta, tsi pëboos Sidon.

²⁷ Tsi uwal Elisaaya, nayëlia, ba maak biki kantsewul-kajankal cum tsi Israel. Maa kaats na yësanee tsi bëkul, ucits ba Naaman, nan pënë-nii Siiria.”

²⁸ Bi ba te bi ko wan, ba cum bëlieng ni uriab di kato-kajúki.

²⁹ Ba natsa, ba pënanul tsi përaasa. Ba payandaul untunda wi përaasa bëkul ro pi ciina, pa pëpambarul utsia.

³⁰ Maa na par tsi pëncuaf bëkul, na tsëp bëgaul.

Nalon ñaan ni ucaay niaji

³¹ A Yeesu juŋa pëtsëp Kafarnaum, un ci wi pëlon përaasa di Galileeya. A nuu jukan bañaan tsi Unu-pënaakësa.

³² Ba pikra tsi uleka bëjukanul, par përimul aka uyëlan.

³³ Aka nalon ñaan di kato-kajúki, ni ucaay ujuatsal niaji. Na lië mak, aja:

³⁴ “Wi ko-e! Wee m ŋal wun ni wund, wi Yeesu, Kanpënë-ni-nasaret? M bi pa pëniaman wund-a? Wi, man me ni m ci; wi ci-un nayëman, nan pënë-nii tsi Nasien-batsi.”

³⁵ Yeesu leentsar wul, aja: “Yëŋandari, kë pën tsi nul!” Tsi pëncuaf bañaan, ucaay wat ni u niaj unk; awatul tsi utsia, a u pën tsi nul, maa rootsul ko.

³⁶ Bañaan bëlieng pikra, bu kë jaalar tsi ba ci tsi: “Pëom përim ci pun pëmënts pi koon? Par, aja na ja ngëcaay ngëjuatsal përim ni uyëlan ni pëyëlan, din ngë pën.”

³⁷ Katim Yeesu kë ñakanaana tsi ngëjara bëlieng ngan fay ngunk tsul.

Yeesu ayësan anin aar Per

³⁸ A Yeesu kë pën di kato-kajúki, na tsëp ee niaj kato Simon. Anin aar Simon amaak, uliaful ayëkan mak; ba buara Yeesu na tsënkul.

³⁹ A në jíntsanul, na leentsar pëmaak, a pa pën tsi nul; na natsa uyëk umënts wun, na mob pëkëmand bëkul.

⁴⁰ Uyër pëcaal, bañaan bëlieng, ban ka biki bamoj ba maak biki mmaak mcumal, rëŋan bëkul di Yeesu. Yeesu kë paf bëkul iñan naloole-naloole; na yësan bëkul.

⁴¹ Ngëcaay pën bëts tsi bañaan bacumal, a nguu lie, koo ja: “Wi ci-un Abuk Nasien-batsi!” Maa, Yeesu leentsar ngul, na laaŋ ngul pëja ko. Par ngul, ame nul ci-un Këristu.

Yeesu yaana Judeeya, a nuu leents Upetsan-uwar di ito-ijúki

⁴² Unu kë fa, Yeesu pën atsëp ulaalats. Bañaan bacumal mak kë tsasul; bi ba band bi tsi nul, ba ŋal pëlaaŋaraul, pa na rits pën tsi bëkul.

⁴³ Maa, na ja bëkul: “Man ka bëts pëleents Upetsan-uwar tsi uleka pësien Nasien-batsi, di ilon iraasa. Par, wul ka wun n yëlee.”

⁴⁴ A na yaana Judeeya, a nuu leents Upetsan-uwar di ito-ijúki.