LÚKAS 10 - KARÚK-PËRIM KAWALU Nouveau Testament

Yeesu yël bafetsul, ngëntaaja paaj ni ulon [ni batëb.]

¹ A uu ba, Ajug rat balon; bë ci ngëntaaja paaj ni ulon [ni batëb.] Na yëlëna bukul batëb-batëb, bu ka yërul bërun pëya kara përaasa, ni kara tsëko tsi na ka tsi pëya bërierul.

² A na ja bukul: “Kacët arëmb, maa baleemp cumats. Bi u ci bank, nda ñaanan Ajug kacët, pa na wëtan baleemp, ba yaarul kacët.

³ Nda tsëpan. Nji n yël ind ink pi ngëbuk-ngënkaanel, tsi pëncuaf ngënjurtu.

⁴ Ind tsë tsëpand nin pëkalëpa, nin kamaañ, nin iraala; te ind tsë nats maleendar di bëga.

⁵ Kato ki ndu niaj ki, nda jaan bërun: ‘Pëfac, pa ciin tsi kato ki.’

⁶ A uci abuk pëfac ci, din pëfac ind ka ci tsi nul. Ucits ank ba, pë kak tsi ind.

⁷ Nda ciin tsi kato kamënts; ko wi ba ka wi, nduu re, nduu raan. Par, naleemp aka pëyank bëlukul. Ind tsë ja nda ci tsi kato, ndë pën ka but kacints.

⁸ Uwal wi nda niaj wi përaasa a ba welan ind, nda rean ko un tsua wi ba këtsua tsi bërun ind.

⁹ Nda yësani bamoj ban ci biki rul; nda jaan bukul: ‘Pësien Nasien-batsi awokani ind.’

¹⁰ Maa, uwal wi nda niaj wi përaasa a nda welanaatsa, nda yaan di ngëmbeera, ndë ja:

¹¹ ‘Ŋal kandëpe përaasa ind, kan tsopan wund ki itsiim, wund ka raafari ind kul. Maa, nda mean ko wi: Pësien Nasien-batsi awokani.’

¹² Man ja ind: Tsi unu kawat-pëleents, Sodooma ka pe përaasa pëmënts pëtiesëtsana pëjuatsan.

Ilon iraasa bañaan ba yaarats biki ibats

¹³ Cay wi Korasin! Cay wi Betësaida! Par, ngëko bawitsa ngandoa ngi tsi pëncuaf ind do roa tsi Tiiru ni tsi Sidon, i ro jon ba ki i yaar ki ibats, i tiema ngësaaku, i tsoar tsi ufab.

¹⁴ Unk, tsi unu kawat-pëleents, Tiiru ni Sidon ka pe ind pëtiesëtsana pëjuatsan.

¹⁵ A wi, Kafarnaum, kë riangar te di batsi-a? Nin-a! Kë wela te di mcats!

¹⁶ Ñaan nan cikëndënindi, acikëndënin. A ñaan nan bër indi, abërin; a nan bërini, abër na yëliini.”

Bafets Yeesu, ngëntaaja paaj ni ulon [ni batëb] bu witsee

¹⁷ Bafets Yeesu, ngëntaaja paaj ngun ni ulon [ni batëb,] bu witsee ni ulílan uwiak, a ba ja: “Ajug! Ŋal ngëcaay aro ko wi wund ja wi ngul tsi katimu.”

¹⁸ Din, Yeesu ja bukul: “Man win Useetaani, uyëri wul di batsi, pi kalikajan.

¹⁹ Nda teenan-e! Man wël ind pëyëlan pëpoos-poosan ngëko-pëtsats ni ngëtiifar; nabër, ndë peul uyëlan; te ko di ka ro ind.

²⁰ Ind tsë lílan undo bi ngëcaay ro bi ko wi nda ja wi ngul. Maa, nda lílani undo bi itim ind picanaa bi di batsi.”

Ulílan Yeesu

²¹ Tsi uyëk umënts wun, Yeesu piban na lílan mak tsi Uwejats ujënts, na ja: “Man bëndanu, Paapa, Ajug batsi ni utsia. Par, m bek ngëko ngëmënts ngi, m lawan ngul bameko ni balipal, a m piban ngul upäts uties. Eey-e, Paapa. Par, ank di m ŋal run wul pëci.

²² Asin nji awëlin ngëko bëlieng. Ñaan meets ni Abuk ci, ucits ba Asin. A ñaan meets ni Asin ci, ucits ba Abuk, ni biki Abuk ŋal biki pëpiban bukul nul.”

²³ Bi Yeesu ja bi ko wan a nu ba, a na witsësa amab bafets, na patsan bukul përim pi, aja: “Anaak, këkës kan ci ki tsi pëwin ko wi nda ci wink tsi pëwin!

²⁴ Par, ma n ja ind: Bayëlia bacumal, ni basien bacumal, bë ro ŋal pëwin ngi nda ci ngink tsi pëwin, maa bë winats, ni pëte ko wi nda ci wink tsi pëte, maa bë teets.”

Ñaan Samaaria na waree uwaas

²⁵ A nalon najukan-ulua natsa pëteen-teenan Yeesu, a na ja: “Najukan! We wi n ka wun përo, pa pëka ubiira un dits wi ka ba?”

²⁶ Yeesu jaul: “We picana wun tsi ulua? M ja m layir wul kë me we tsul?”

²⁷ Najukan-ulua yankul, aja: “Kë ŋal Ajug, Nasien-batsiu, tsi uwaasu bëlieng, ni tsi uyëlanu bëlieng, ni tsi uwejatsu bëlieng; kë ŋaland acintsu, pi m ŋal pi beenu.”

²⁸ Din, Yeesu jaul: “M leents ucär. Doon ank, kë ka ubiira.”

²⁹ Maa, najukan-ulua ŋal pëja aci na mabi, a na ja Yeesu: “A yën ci-un acints nji?”

³⁰ A Yeesu jaul: “Aka nalon ñaan nan pënii di Jerusalem, na juŋa pëtsëp Jeriko, a nee yër tsi iñan ngëwayu, ba caul ngëkoul, ba tucanul a nuu tsas pëcäts, ba bërul, ba tsëp.

³¹ A ujëkanda nalon najakan juŋa buts bëga bëmënts bën pëtsëp. Nu winul, na par bi kajara kacints kun.

³² Nalon bëts baandi tsul, nan bofi tsi pëbuka Lewi; nu winul, na par bi kajara kacints kun.

³³ Maa ñaan Samaaria, nan pënari bëyaas baandi tsi kawokul; nu winul, na jampësaul.

³⁴ A na okul, na tularul mkër ni pëwat tsi mlupi, na tan. Na rijanul tsi uncaam, wiicul bërierul, na yaandul kato-pëtsooŋ, a na këmandul.

³⁵ Tsi unu u neki wi, na toti këtakan këtëb Dinaariu, a na wël wul ajug kato-pëtsooŋ, na jaul: ‘Këmandiul. Uci m bi m lak tsul ko, kee luku, uwitsee nji.’”

³⁶ A Yeesu ja najukan-ulua: “Tsi bawaants bakan, uci wi kë ja, naom ci-un acints na yër unk tsi iñan ngëwayu?”

³⁷ A najukan-ulua yankul aja: “Aci na yëkarul unk ipës.” Din, Yeesu jaul: “tsëpan, kë ro unk bëts.”

Maarta ni Maaria

³⁸ Bi Yeesu ni bafetsul repa bi bëga pëtsëp, na niaj ulon untab. A ŋaats ni ka n jakee Maarta welanul di katoul.

³⁹ Nan tsaari ni nul, ni ka n jakee Maaria, tsoar tsi itsiim Ajug, a nuu cikëndën përimul.

⁴⁰ Maa, ngëleemp cum Maarta ibats a mobunats uloole. Din na pëni, a na ja: “Ajug! Nan tsaar ink ni nji, bi na bërarin bink ngëleemp koorin, ko wan dootsu ko-a? Jaanul na ela tsënkin.”

⁴¹ Ajug yankul aja: “Maarta, Maarta! M yëkanaand ngëko ngëcumal a nga cumu been,

⁴² maa uloole rin fiera wun; Maaria arat kafa kan pe ki pëwara, kan dits ki ka yankënaul.”