KOLOS 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Pol, Napostolu Këristu Yeesu tsi uŋal Nasien-batsi, ni Timoteu nul nan tsaari ni nja

² pa bayëman ban ciina biki Kolos, batsaar ni wund, ban mob biki tsi Këristu. Bëtseend ba wëlaan ind ni pëfac, pëpën-ni tsi Nasien-batsi, Asin nja.

Uwak ni bëŋal bañaan Kolos

³ tsi ngëwal bëlieng, aja wund kë ñaandar ind, wund kë baran Nasien-batsi, nul Asin Ajug nja Yeesu Këristu.

⁴ Par wund ate uleka uwak ind tsi Këristu Yeesu, ni bëŋal bi nda ŋal bi bayëman bëlieng.

⁵ Uwak umënts wun, ni bëŋal bëmënts bun apënë-ni tsi uwats un gaanga wi pa ind di batsi. Nda te ba uleka uwats umënts wun tsi përim ucär; pul ci pun Upetsan-uwar

⁶ un baandi wi tsi ind. A bi u buk bunk a uu ya këya bërun tsi umundu bëlieng, unk di u ci run tsi përo tsi pëncuaf ind, ki unu wi nda te wunk uleka bëtseend Nasien-batsi a nda me bul tsi ucär.

⁷ Wul aci ko wi Epafëras jukan ind wi, nul níic wund na ŋalee a na bof uleemp ni wund, a na ci na mobi tsi pëleempar Këristu pa ind.

⁸ Nul leents wund un uleka bëŋal ind tsi Uwejats Nasien-batsi.

Bëñaan bi Pol ñaandar bi Ngëriisia

⁹ Wul ka wun, wund buts, ki unu wi wund te wi ko wan, wund wëtaants pëñaandar ind, ni pëyep nda roon ndë cum ni ume uŋalul tsi kameko kan ci ki ba këci, ni tsi bëlipal, ngul ngi Uwejats Nasien-batsi kë wël ngi.

¹⁰ Unk, nduu yandaar tsi ko u mab wi tsi Ajug, tsi puu ro ko u lílul wi ba këlíl; nduu ka bëkat tsi ko wi nduu ro wi ba këro, u wara wi, nduu ya këya bërun tsi ume Nasien-batsi.

¹¹ A ni pëyëlan pan ci pi-ba këci, ndë watsësaa pëyëlan-ko; din u ci ko u mab wi ni uyëlan përëmbul, pa tsi ko un ci wi-ba këci ndë yëlan pëliincandër ni pëmiira.

¹² Nda barani Asin ni ulílan, nul nan tsui indi a nda tsënkan pëbofara bërukanda bayëman, tsi ufac.

¹³ Apënan nja tsi uyëlan krëm, a na butan nja di pësien Abuk ni na ŋal unk;

¹⁴ tsi nul ngë lukaraa pëbuer a ngëjuban nja jampësaa.

Yën ci-un Këristu?

¹⁵ Nul ci-un bënaam Nasien-batsi nan ditsi ka wina; ci-un bajan tsi ko u leempa wi ba këleempa.

¹⁶ Par ngëko bëlieng aleempaa tsi nul, di batsi ni tsi utsia, ngi ka wina ngi, ni ngan dits ngi ka wina; uci ank itsoari-msien, oo ngan kaana ngi ko, oo ngan tsijëna ngi pëyëlan, oo ngan ka ngi uyëlan. Ngëko bëlieng aleempëna tsi nul; a nga ci pa nul.

¹⁷ Ngëko bëlieng aruka ka ci, a na ci ba; ngëko bëlieng ajabëni tsi nul.

¹⁸ A nul ci-un been uliaf, un ci wi Ngëriisia. Nul ci-un ujuundi, bajan tsi pëpëni tsi bacäts, pa në ci nacak tsi ko un ci wi-ba këci.

¹⁹ Par, aci ko u líl wi Nasien-batsi bi na tsu bunk bëciul bëlieng a ba ciina di Abukul,

²⁰ a na tsu ngëko bëlieng nga teelaraan ni nul tsi Abuk, uci ank ngan ci ngi tsi utsia oo ngan ci ngi di batsi; bi na tsu bi pëfac a pa ci, undo pëñaakul pi kruusul.

²¹ A ind, tsi ngëwal ngan par ngi, nda ro lawan Nasien-batsi, a nda ci babër tsi ngëwejats ind, undo ngëko-kawaraatsa ngi nda ro ngi ka ro.

²² Maa inkri, atsu ind a nda teelar tsi uliaf Këristu wi uyamats; aparanaan tsi pëcäts, pa pëtsu ind ndë ci bayëman tsi bërunul, bakaats ujink, bakaats ulaci.

²³ Maa nda ka nda roon ndë liincandar tsi uwak, ndë ci tsi ujuundi ndë liincand; pa përits pënanaa tsi uwats Upetsan-uwar wi nda te wi, wul u leentsaa wi ajëk bañaan umundu bëlieng tsi utsia batsi, a wul wi n duka wun n ci naleempar, nji Pol.

Uleemp Pol, ni ngëkam ngi na kamandar ngi Ngëriisia

²⁴ Inkri, man lílan tsi ngënoor ngi par-na ngi tsi undo ind. A ngan duka ngi tsi ngënoor Këristu, mán tuam ngul tsi uyamats nji, undo uliaful, un ci wi Ngëriisia.

²⁵ Man duka n ci naleempar Ngëriisia, undo uleemp wi Nasien-batsi wëlin wi përo, pa pëleents ind përim Nasien-batsi, pul bëlieng.

²⁶ Aci-un doots wunk mea a u bekaa aro ngëwal ni ngëraan, maa inkri, a u pibanaa bayiicul bayëman.

²⁷ Bukul biki Nasien-batsi ŋal bukun ba me bëka ban ci bi ba këci, bi un doots wink mea, ni përëmb wul, tsi pëncuaf ban cits biki Bajudeu, un ci wi: Këristu tsi ind, ci-un uwats përëmb.

²⁸ Nul Këristu, nul ni wund ci-un tsi pëleents bañaan; uja kara ñaan në car ka leentsa, kara ñaan nuu jukana tsi kameko bëlieng, pa kara ñaan wund ka bandanul na ba pëjëŋ tsi Këristu.

²⁹ Wul ka wun n ci tsi uleemp uñatsal, a ndu n kamanaan uyëlan Këristu, wi ka leemp wi ni pëyëlan tsi nji.