JÚDAS 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Júdas, naluek Yeesu Këristu, a na ci buts nan tsaari ni Jakob; pa bandua biki, biki Nasien-batsi Asin ŋal biki, a ba waaya tsi Yeesu Këristu.

² Kayëk-ipës, ka watsësaan ind ni pëfac, ni bëŋal.

Bajukan-ulua, batsup

³ Ind ba ŋala biki, man cësara mak pëpicari ind tsi uleka pëbuer nja pi ngë bofara pi. Man win ka pëpicari ind, pëliinc-liincan ind ngëwaas pa ind pëkamandër uwak wi bayëma wël a wi uyaas uloole, pa sandëndën.

⁴ Par balon bañaan, biki ulaci bukul jon wi ki u pica ki, bu yuembi ee niaj tsi pëncuaf ind. Bukul bë ci bameets-nasien-batsi, a ba witsës bëtseend Nasien-batsi nja pa puu ro ngëko katuk-ufuts. A ba bër Yeesu Këristu, nul Najukan nja naloole baŋ, a na ci Ajug.

⁵ Ŋal bi nda ba bi pëme ko wan uwar, maa, ma ŋal pëlesan ind bi Ajug buerani bi bañaanul di pëboos Ejipët a nuu ba, na ba ni bañaan ba uwakats biki.

⁶ A ngëwaanju ngan tsuunkarats ngi ko wi nga ci wi, maa nga bër tsi nga ro tsi ciina, Nasien-batsi agaang ngul di bametsu karëm, a nga ricara sandëndën, pa Unu uwiak, wi kawat-pëleents.

⁷ Nda lesan buts përaasa Sodooma ni Gomoora, ni iraasa in fay yi yul, unk buts di i baar run tsi katuk-ufuts ni mampiintsandar man dits mi ka rolaa. A ba tsuaa pëci-unaamanaani pa unoor bërua ban dits bi ka ba.

⁸ Aci unk buts di bañaan bamënts bukun niam dun tsi buwinal bukul, a ba tsopan ngëliaf bukul; a bu kë be bajug pëboos, bu kë kar ngi Batsi.

⁹ Ŋal Mikayel, un ci wi uwiak ngëwaanju, yeentsats pëkar Ujabël, uwal wi nguu totëlar wi irim tsi uleka puum Moises; maa u ja wul: “Ajug na leentsariu.”

¹⁰ Maa bañaan bamënts biki, bu ka kar ko wi ba meets wi uwar. A ko wi ba me wi tsi bëci bukul bi kameets-ko pi ngënjär ngan dits ngi ka wejats, ko umënts wun ka cok wun bukul.

¹¹ Cay bukul! Par bu fets bëga Kain. Tsi undo bëluk, a ba yër tsi pëniam Balaam; ba niam tsi katamb-ulats Koore!

¹² Bañaan bamënts biki bë ci mtsopi tsi ufesta ind wi butsaar. Bu kaats urispiitu uwal wi ba ci wi tsi bariala ni ind. Bu ci bayafan biki ka yafan biki iyeen bukul; a ba ci pi isa in kaats yi mlik, yi ufuts kë tsëpand yi. Bu ci pi mko man bëkats mi tsi uwal mul, a man dëtaa, man cäts ngëyaas ngëtëb.

¹³ Bu ci pi ngëmaroŋ bërëk ngëjuatsal, ngi ka lëtsan ngi uñutsandar ngul bërier ngul. Bu ci pi ngëpesaj ngan meets ngi tsi nguu ya tsi; karëm síic ayecisa pa ngul, pa sandëndën.

¹⁴ A Enoki nan ci napaajantsan ni nalon pëkur-ni di Adam, aleents buts u meaatsa wi tsi uleka bukul aja: “Nda teenan-e! Ajug ka bi ink tsi pëncuaf ngëmiil ngan yëlanaatsa ngi pëpina, ngi bayëmanul,

¹⁵ pa pëwat bañaan bëlieng pëleents. Në lacan ba uwakats biki bëlieng tsi nul, tsi uleka ngëko ngi ba roona ngi bëlieng tsi kameets-nasien-batsi, ni ni irim ijuatsal yi bu kë jaarul yi bëlieng, bukul bajuban bameets-nasien-batsi.”

¹⁶ Bamënts biki ci bakuetar, barika-lílan tsi ngëbiira bukul, bu kë yandaar tsi ngi ngëliaf bukul kë rí ngi, itum bukul kë ja irim upíc; pa bëkat bukul bu kë bëndan bañaan.

¹⁷ Maa ind ba ŋala biki, nda lesan irim yi bapostolu Yeesu Këristu Ajug nja ro yi car aleents.

¹⁸ Iink ri ba ja ind run: “Tsi uwal utuami, ka ka bariat bañaan biki ka yandaar biki tsi kari-ngëko bukul ki kameets-nasien-batsi.”

¹⁹ Aci bamënts biki ka tsu bukun manpatsësar tsi bañaan, bë ci biki umundu, bu kaats Uwejats Nasien-batsi.

Katseend-ibats

²⁰ Maa ind ba ŋala biki, nda liinc-liincandari mak tsi uwak ind uyëman, nduu ñaan tsi Uwejats-ujënts.

²¹ Nda tambandari pëci tsi bëŋal Nasien-batsi, ndë ci tsi pëlip kayëk-ipës Yeesu Këristu, Ajug nja pa ubiira un dits wi ka ba.

²² A ban tsij biki ngëwejats ngëtëb, nda yëkari bukul ipës;

²³ nda waji bukul di bërua, ndë bueran bukul. Nda yëkari bacints bukun ipës tsi puu lënk Nasien-batsi; maa, nda ñutsaan ŋal iŋi yi ngëliaf bukul tsopan yi.

Bëñaan pa pëbëndan Nasien-batsi

²⁴ Nasien-batsi ka un pëyëlan përandan ind pëyër pan ci pi-ba këci, ni pëtsu ind pëci ban kaats biki ulaci tsi bërun përëmbul, ni ulílan.

²⁵ Nul Nasien-batsi koorul, Nabueran nja tsi Yeesu Këristu Ajug nja na wëlaan përëmb, ni pëyëlan, ni uyëlan, ni pëtsijëna ngëko bëlieng ki ngëwal bëlieng netse ki ro juund, inkri pa sandëndën. Ameen!