KAKÚRAN-KAWAR YEESU KRISTU BI JOŊ LEENŢ BI KUL AJA 8 - KARÚK-PËRIM KAWALU Nouveau Testament

Ŋaats na mobee tsi mampiintsandar

¹ Unk, a Yeesu tsëp untunda Mëoliwa.

² Ufa unu, na witsee kato-kayëman. A bañaan bëlieng kë bi tsi nul, na tsoar, a na ci tsi pëjukan bukul.

³ A bapican-ulua, ni Bafariseu, tsiji ŋaats na mobee tsi karo-mjubi, a ba natsanul tsi pëncuaf,

⁴ a ba ja Yeesu: “Najukan! Ŋaatsi, amoba tsi karo-mjubi.

⁵ Bakaats pi bamënts biki, tsi ulua, Moises atsu wund pëtapëna bukul ilaak a bu ka cäts. A wi, wee m ja wun?”

⁶ Bë jaul ko wan, pa pëteen-teenan nul, bu ka ka tsi bu kë mobunul tsi. Maa, a Yeesu ŋëp, a nuu pican ni pëkuanj tsi utsia.

⁷ Bi ba wama bi mob tsi pëyeparul, na kata, a na ja bukul: “Uci ñaan ci tsi ind nan kaatsi ujuban, na ciin nacak ni kan tapënuli pëlaak.”

⁸ A na kaka ŋëp, a nuu pican tsi utsia.

⁹ Bi ba te bi ko wan, a bu kë pënëna naloole-naloole, pëkurëna tsi ban pe biki pëtsaf; a Yeesu ruka koorul, ni ŋaats, tsi pëncuaf.

¹⁰ A Yeesu kata, a na ja ŋaats: “Ŋaats, bë ci tsum-i? Kaats ñaan na lacanui-a?”

¹¹ A ŋaats yankul aja: “Ajug! Nin ñaan.” A Yeesu jaul: “Nji buts, in di ka n lacanu; tsëpan, maa inkri, cats kaka juban.”

Yeesu ci-un ufac umundu

¹² A Yeesu kaka ñakanaan bukul aja: “Nji n ci-un ufac umundu; ñaan nan ci tsi pëfetsin, di ka yandaar tsi krëm, yaas; maa ka ka ufac ubiira.”

¹³ Din, a Bafariseu jaul: “Wi, m ci tsi pëleents ulekau bërieru; ko wi kë leents wi, cits ucär.”

¹⁴ A Yeesu yank bukul, aja: “Ŋal bi n ci bank tsi pëleents uleka nji bërierin, ko wi n du n leents wi aci ucär, par man me tsi n pënë-ni tsi, ni tsi n du n ya tsi. Maa ind, nda meets nin tsi n pënë-ni tsi, nin tsi n du n ya tsi.

¹⁵ Ind, nda ja nda roon ndu wat ñaan pëleents pi bëro bañaan-bajin. Nji, in di ka n wat ñaan pëleents.

¹⁶ A uci n du n wat pëleents, kawat-pëleents ki n du n wat ki aci kacar, par cits nji rin ka wat un pëleents, maa aci nji ni Asin nji na yëliini.

¹⁷ Te, tsi ulua ind, ko wi picana wun: ‘Ko uloole wi bañaan batëb leents wi, aci ucär.’

¹⁸ Nji, ma nja n doon ka leents uleka nji bërierin, a Asin nji na yëliini kë leents buts uleka nji.”

¹⁹ Din, a ba jaul: “Asinu, aci tsum?” A Yeesu yank bukul aja: “Nda meetsin, nin nda meets Asin nji. Uci nda ro mein, nda bi ka ro me buts Asin nji.”

²⁰ Yeesu ajaana irim yan di tsëko tsëgaangëni-bëka, bi na ci bi tsi bëjukan di kato-kayëman. A ñaan mobatsul, par uwalul netse band.

Yeesu ci-un yën?

²¹ A Yeesu kaka ja bukul: “Nji, mán tsëp; nduu tsasin, maa ndu cätsand ujuban ind. tsi ndu n ya tsi, ind nda ri ka yëlan pëya rul.”

²² A Bajudeu kë yepëlar koo ja: “Ane aŋal pëfiŋar-a? Bi na ja bank: ‘tsi ndu n ya tsi, nda ri ka yëlan pëya rul!’”

²³ A Yeesu yank bukul aja: “Ind nda ci biki utsia; maa nji, man ci ni ruets. Nda ci biki umundu wi, maa nji, nji cits ni umundu wi.

²⁴ Wul ka wun nja ind, ndu cätsand ngëjuban ind. Par uci nda wakats nji MAN CI, ndë cätsand ngëjuban ind.”

²⁵ A ba jaul: “Wi, m ci yën?” A Yeesu ja bukul: “Ko wnja ind wunk ki ujuundi.

²⁶ Man ka ngëcumal, ngi ndu nja ngi tsi uleka ind, ni pëwat ind pëleents; maa na yëliini aci nacär, wul ka wun, ngi n te ngi di nul, ngul ngi ndu n leents ngun umundu.”

²⁷ Maa bukul, bë meets u ci uleka Asin, wi na ro wun ci tsi pëñakanaan bukul.

²⁸ Din, a Yeesu ja bukul: “Uwal wi ndu riang wi Abuk ñaan-najin, ndë me, nji MAN CI, a kaats ko wi n du n do wi, wi n tsuur wi përo wul; maa ko wi Asin nji jukanin wi, wul wi n du n ja wun.

²⁹ Na yëliini aci ni nji; a wëtatsin n pats koorin; par ma nja n doon ka ro ko u lílul wi.”

³⁰ Bi Yeesu ja bi ngëmënts ngan, a bañaan bacumal wak tsi nul.

Baluek, ni bafacal

³¹ A Yeesu ja Bajudeu ba uwak biki tsi nul: “Uci nda mob tsi përim nji, ndë baaraan pëci bafetsin,

³² ndë me ucär, ucär ka facan ind.”

³³ A ba yank Yeesu aja: “Wund aci kajër Abraam, nin wund cits baluek ñaan; um bi kë ja bun: ‘Nduu ruka ci bafacal.’”

³⁴ A Yeesu yank bukul aja: “Mán leents ind ucär: Nandoi ba këro ujuban, aci naluek ujuban.

³⁵ Naluëk di ka ciina kato, ngënu bëlieng; maa abuk kato, nul aciina kul ngënu bëlieng.

³⁶ Bi u ci bank, uci abuk kato facan ind, ndë baaraan pëci bafacal.

³⁷ Ma me nda ci kajër Abraam; maa ndu tsas pëfiŋin, par përim nji niajats ind.

³⁸ Nji, mán ñakan ngi n win ngi tsi bërun Asin. Ind buts, nda roan ngi nda te ngi tsi Asin.”

³⁹ A ba yankul aja: “Abraam ci-un asin wund.” A Yeesu ja bukul: “Uci nda ci upäts Abraam, nda roan ngi Abraam kë ro ngi.

⁴⁰ Maa ind ka tsas bikink pëfiŋin, nji na leents indi ucär wi n te wi tsi Nasien-batsi. Umënts wun, Abraam doots wul;

⁴¹ maa ind, nda ja nda roon nduu ro ngi asin ind kë ro ngi.” A ba ja Yeesu: “Wund bukënaatsa tsi katúk-ufuts; wund aka Asin wund, naloole, nul Nasien-batsi.”

⁴² A Yeesu ja bukul: “Uci Nasien-batsi ro ci Asin ind, ndë ro ŋalin. Par nji, di Nasien-batsi di n pënë-ni run, a n bi. Nji n tsuularats pëbi, maa nul yëliin un.

⁴³ We ka wun a nda teets uñakan nji? Par, nda yëlanats pëcikëndën përim nji.

⁴⁴ Ind, Ujabël ci wun asin ind, a nda ŋal përo ngi asin ind ŋal ngi. Wul, aci ufiŋ bañaan ki ujuundi. Aja u roon di ka baar tsi ucär, par ucär cits tsi wul. Aja uu tsup, u leents ko un ci wi wíic wul, par wul aci utsup, a u ciind usín bëtsup.

⁴⁵ Maa nji, ma nja n doon ka leents ucär, wul ka wun nda wakats tsi nji.

⁴⁶ Naom tsi ind ka pibanin un ujuban ci tsi nji?

⁴⁷ Nan ci ñaan Nasien-batsi, ka cikëndën irim Nasien-batsi. Maa ind nda ri ka cikëndën, par nda cits biki Nasien-batsi.”

⁴⁸ A Bajudeu yankul aja: “Bi wund jau bi m ci ñaan Samaaria a m niaja ucaay, wund faŋats iink-a?”

⁴⁹ A Yeesu yank bukul aja: “Nji, in niajaatsa ucaay, ma nja doon ka rispitaar Asin nji, maa ind, nda ja nda roon nda ri ka tsuin ko.

⁵⁰ Nji n tsasats përëmb pa nji bërierin; aka nan ci tsi pëtsas pul, a nu wat pëleents.

⁵¹ Mán leents ind ucär: Uci ñaan mob tsi përim nji, di ka win pëcäts pa sandëndën.”

⁵² A Bajudeu jaul: “Inkri, wund ame m niaja ucaay. Abraam a cäts, ŋal bayëlia buts; a wi, m ja: ‘Uci ñaan mob tsi irim nji, di ka teenaman pëcäts, pa sandëndën.’

⁵³ M pe Abraam asin wund-a? Nul nan cätsi, a ŋal bayëlia buts bë cäts. Yën ni m tsuar un pëci?”

⁵⁴ A Yeesu yank bukul aja: “Uci n do ka n dëmbandar bërierin, përëmb nji kaats bëkat. Ni kan dëmbanini aci Asin nji, ni nda jai nda roon ndu ja aci Nasien-batsi ind.

⁵⁵ Ind nda meetsul, maa nji, man meul. Ucnja nji n meetsul, ka ci natsup pi ind. Maa nji, man meul, a n mob tsi përimul.

⁵⁶ Abraam, nul asin ind, ajuc ni ulílan pa pëwin unu nji, a na win wul, na lílan.”

⁵⁷ A Bajudeu jaul: “M netse m ka ngëwaanu ngëntaaja kañan, a m win Abraam?”

⁵⁸ A Yeesu ja bukul: “Mán leents ind ucär: Abraam aruka ka ci, nji MA N CI.”

⁵⁹ Din, a ba coonts ilaak ba tapënul pa pëfiŋul; maa a nul Yeesu cëra, a na pën tsi kato-kayëman.