KAKÚRAN-KAWAR YEESU KRISTU BI JOŊ LEENŢ BI KUL AJA 3 - KARÚK-PËRIM KAWALU Nouveau Testament

Yeesu ajukan Nikodemus, uleka kabuka-kawalu

¹ A u ka nalon niints tsi Bafariseu, katimul ka jaka Nikodemus; aci nalon tsi bawiak Bajudeu.

² Atsëp ri Yeesu bërëm, a na jaul: “Rabi, wund ame m ci najukan nan pënë-nii di Nasien-batsi, par ñaan yëlanats përo ngëpibanaani ngi kë ro ngink, uci Nasien-batsi cits ni nul.”

³ A Yeesu yankul aja: “Mán leentsu ucär, ñaan nan bëkaatsee kabuka-kawalu, yëlanats pëwin Pësien Nasien-batsi.”

⁴ A Nikodemus jaul: “Ñaan nan ci natsafal, um bi na yëlan bun pëbuka kak? Ane a yëlan pëniaj pëpës aninul uyaas utëbantsan, në bukee-a?”

⁵ A Yeesu yankul aja: “Mán leentsu ucär, ñaan nan bëkaatsee di mlik ni Uwejats, yëlanats pëniaj Pësien Nasien-batsi.

⁶ Nan bukee ñaan-najin, aci ñaan-najin; a nan bukee Uwejats, aci uwejats.

⁷ cäts pikra bi n jau bank nda ka pëbuka kabuka-kawalu.

⁸ Ufuts ka futs tsëko tsi u ŋal tsi; kë te wul, maa m di kë me tsi u pënë-ni tsi, nin tsi u pënar tsi. Unk ri u ci run pa nan bukee ba këbuka Uwejats.”

⁹ Din, a Nikodemus yankul aja: “Um bi u yëlan bun pëci?”

¹⁰ A Yeesu jaul: “Wi nan ci najukan tsi Israel, a m meets ngëko ngan-a?

¹¹ Mán leentsu ucär: Wund aja wund roon wund kë ja ko wi wund me wi, a wund kë leents ko wi wund win wi; maa, nda ri ka niiran ko wi wund kë ja wi.

¹² Uci n ñakanaan ind ngëko utsia a nda wakats, um bi ndu wak bun, uci n ñakanaan ind ngëko batsi?

¹³ Nin ñaan payaatsa batsi, ucits ba nan pëni unk batsi awelee, nul Abuk ñaan-najin, nan ci di batsi.

¹⁴ Bi Moises riang bunk uko-pëtsats utsak di ulaalats, unk di Abuk ñaan-najin ka run përiangaa,

¹⁵ pa ñaan na waki tsi nul, në ka ubiira un dits wi ka ba.

¹⁶ Par, Nasien-batsi aŋal bañaan umundu mak, a na tsënkëne wël Abukul, naloole baŋ, pa na waki ba këwak tsi nul, di ka niaman, maa në ka ubiira un dits wi ka ba.

¹⁷ Nasien-batsi yëlatsi Abukul tsi umundu pii wat bañaan umundu pëleents, maa pa bañaan umundu pëbueranaana tsi nul.

¹⁸ Na waki tsi nul, di ka wata pëleents; maa na wakatsi, awata ba pëleents, par wakats tsi katim Kambuka koorul baŋ, nul Abuk Nasien-batsi.

¹⁹ A kawat-pëleents kamënts ci kun ki: Ufac abi tsi umundu, a bañaan-bajin ŋal krëm mak apean ufac, par ngi bu kë ro ngi waraatsa.

²⁰ Par ñaan ni kandoi ba këro ngëko-kawaraatsa, ka ñaas ufac; di ka bi tsi ufac, pa ngi nuu ro ngi përits winaa.

²¹ Maa, ñaan ni kandoi ngëko ucär, ka bi tsi ufac pa ngi nuu ro ngi ka winaa, par aroona ngul tsi Nasien-batsi.”

Yeesu, ni Joŋ-namijan

²² A uu ba, a Yeesu tsëp ni bafetsul pëboos Judeeya. A na ci rul ni bukul, a nuu mijan bañaan.

²³ A Joŋ do ka mijan buts bañaan di Enon, di kawok Salim, par mlik arëmb rul mak. A bañaan kë bi, a bu kë mijana.

²⁴ Par nul Joŋ netse ro rica di ukalabus.

²⁵ A bafets Joŋ do ci tsi mantotëlër ni nalon Najudeu, tsi uleka undimaan manjëntsandar.

²⁶ A ba tsëp di Joŋ ee jaul: “Rabi, nan do unk ci ni wi di kalutar bërëk Jordan, ni m leents unk ulekaul, teenan-e, aci tsi pëmijan bañaan; a bañaan bëlieng kë ya ri nul.”

²⁷ A Joŋ yank bukul aja: “Ñaan yëlanats pëyank ko, ucits ba un pëni wi batsi a u wëlaul.

²⁸ Ind bërier ind, nda ci ba maatir biki ko wi n ja wi: Cits nji n ci-un Këristu, maa man ci na yëlee tsi bërunul.

²⁹ Ñaan nan kai nanima, aci nanim; maa bëfetsar nanim, nan ci tsul a nuu cikëndënul, ka lílan mak, undo përim nanim. Unk, ulílan nji umënts wi, aba pëci uwar.

³⁰ Nul aka puu pe këpe pëci ñaan nawiak, nji koo n pe këpe pëci naties.

³¹ Nan pënë-ni unk ruëts, aci ri ruëts bañaan bëlieng; nan ciina unk utsia, aci ni utsia a nuu ñakan ngëko utsia. Nan pënë-ni unk batsi, aci ri ruëts bañaan bëlieng,

³² a nuu leents ko wi na win wi, ni wi na te wi, maa kaats ñaan na niirani ko wi na leents wi.

³³ Ñaan na niirani ko wi na leents wi, apiban Nasien-batsi ci nacär.

³⁴ Par, ni Nasien-batsi yëli unk, ka leents irim Nasien-batsi, par Nasien-batsi ka wëlul Uwejats te di ka niib.

³⁵ Asin aŋal Abuk, a na wël ngëko bëlieng tsi kañanul.

³⁶ Na waki tsi Abuk, aka ubiira un dits wi ka ba; maa na wakatsi tsi Abuk, di ka win ubiira, maa uriab Nasien-batsi ka ci tsi nul pa sandëndën.”