KAKÚRAN-KAWAR YEESU KRISTU BI JOŊ LEENŢ BI KUL AJA 16 - KARÚK-PËRIM KAWALU Nouveau Testament

¹ Man ja ind ngëmënts ngan, pa ind përits wëtan uwak.

² Bu ka pënan ind di ito-ijúki. Maa uwal ka bi, uja ñaan fiŋ ind, në ja ne aci tsi pëleempar Nasien-batsi.

³ Bu ka ro ngëmënts ngan, par bu meets Asin, nin bu meetsin.

⁴ Man ja ind ngëmënts ngan, pa ubaandi uwal umënts, ndë les n ja ind ngul. Ki ujuundi, nji n doots n ja ind ngul, par man do n ci ni ind.

Uleemp Uwejats-ujënts

⁵ Maa inkri, mán tsëp di na yëliini; a nalon tsi ind di ka yeparin koon na ja: ‘tsum tsi kë tsëp tsun-i?’

⁶ Maa, bi n ja ind bank ngëmënts ngan, a ngëwaas ind juatsan.

⁷ Maa mán leents ind ucär: Ko un pe wi pëkat pa ind, aci nji pëtsëp; par uci n tsëpats, natsënk di ka bi tsi ind. Maa uci n tsëp, kee wëtani ind nul.

⁸ Ubaandiul, në piban bañaan umundu ba niam tsi uleka ujuban, ni tsi uleka bëmabal, ni tsi uleka kawat-pëleents;

⁹ tsi uleka ujuban, par bë wakats tsi nji;

¹⁰ tsi uleka bëmabal, par mán tsëp di Asin, a nda katse ka winin;

¹¹ tsi uleka kawat-pëleents, par kantsijëna umundu wi awata ba pëleents.

¹² Man wama n ka ngëcumal pa pëleents ind, maa nda yëlaants ngul inkri.

¹³ Maa, uwal wi Uwejats ucär baandi wi, u tsëpand ind tsi ucär un ci wi-ba këci. Par, di ka ñakandar uleka wul bërier wul, maa ka ñakan ngi u te ngi, u leents ind ngi kan bi ngi.

¹⁴ Wul, ka rëmbanin, par ka jej tsi umiñ, u leents ind wul.

¹⁵ Ko wi Asin nji ka wi ba këka, aci umiñ; wul ka wun n ja ind, wul ka jej tsi umiñ, u leents ind wul.

Unjuatsia u witsa wi ci ulílan

¹⁶ tsini ko uties, nda katse ka winin; a tsini ko uties kak, ndë kaka winin.”

¹⁷ Din, a balon tsi bafetsul kë jaalar tsi ba ci tsi: “We ci wun wi na ja nja wank? ‘tsini ko uties, nda katse ka winin; a tsini ko uties kak, ndë kaka winin;’ a na jaand: ‘Mán tsëp di Asin nji.’”

¹⁸ A bu kë ja: “tsini ko uties a! Përim pan, wee pa pac wun? Ngë meets ko wi pa pac wi.”

¹⁹ A Yeesu me ba ŋal pëyeparul, a na ja bukul: “Uleka bi n ja ind bank: tsini ko uties, nda katse ka winin; a tsini ko uties kak, ndë kaka winin, wul wi nda ci wun tsi pëyepëlar-a?

²⁰ Mán leents ind ucär: Nduu rug, nduu kaan, bañaan umundu ka lílan. Nduu juatsan, maa unjuatsia ind ka witsa u ci ulílan.

²¹ Uwal wi ŋaats kë buk wi, ka te urear-uliaf, par ulerul aband; maa, uwal wi na buk wi napäts, katse ka les unoor wi na par-na wi, undo alílan bi na buk bi ñaan-najin tsi umundu.

²² Unk buts di nda juatsandun inkri. Maa, mee n winin ind kak, ngëwaas ind ka ci tsi ulílan; a ulílan ind, ñaan di ka yëlan pëpënan wul tsi ind.

²³ tsi unu umënts wan, nda ri ka yeparin ko. Mán leents ind ucär: Ko wi nda yep wi ba këyep Asin nji tsi katim nji, në wël ind wul.

²⁴ Te inkri, nda netse yep ko tsi katim nji. Nda yepan, ndë yank, pa ulílan ind pëci-un kës wi.

Yeesu agaañaar umundu ukam

²⁵ Ma n jaan ind ngëko ngan, tsi irim inaamanaani. Uwal ka baandi, wi n katse wi kee ñakanaan ind tsi irim inaamanaani, maa mán ñakanaan ind uleka Asin, tsi ko un jënts wi.

²⁶ tsi unu umënts wan, nduu yepëna tsi katim nji. Nji njaats ind mán ñaan Asin pa ind.

²⁷ Par, Asin bërierul aŋal ind, undo nda ŋalin a nda fiaar n pënë-ni di Nasien-batsi.

²⁸ Man pënë-ni di Asin, a n bi tsi umundu; mán pën tsi umundu, ka tsëp di Asin.”

²⁹ A bafetsul jaul: “Teenan-e, wi ka ñakan ink inkri a kë jëntsan uñakan; m katse m ja irim inaamanaani.

³⁰ Inkri, wund ame m me ngëko bëlieng, a m fierats ñaan pëyeparu ko. Wul ka wun wund fiaar m pënë-ni di Nasien-batsi.”

³¹ A Yeesu yank bukul aja: “Nda wak inkri-a?

³² Nda teenan-e! Uler ka bi, abaandi ba, wi ndu garësaa wi, kara ñaan në tsëp pa ngiicul, ndë rukin koorin. Maa nji n cits koorin, par Asin nji aci ni nji.

³³ Man ja ind ngëmënts ngan, pa nda ka pëfac tsi nji. Nduu ka unoor tsi umundu; maa nda kaan katsëb, man gaañaar umundu ukam.”