GALAASIA 6 - KARÚK-PËRIM KAWALU Nouveau Testament

Mantsënkëlar tsi pëyunts

¹ Batsaar ni nji, uci ñaan mobaa tsi përo ulon ko un cika wi, ind ban ci biki bañaan Uwejats Nasien-batsi, nda ka pëcikësul ni uwaas ujuab. Rukan ibats, pa wi përits teen-teenana buts.

² Nda tsënkëlëri ni myunts tsi nda ci tsi, unk ndë ro ko wi ulua Këristu ja wi.

³ Par, uci ñaan wejats pëja ne aci ulon ko, nul nan citsi ko, aci tsi pëfäl beenul.

⁴ Maa kara ñaan në teen ko wi na ro wi, a nuu ba, në rëmbandëraan tsi nul rin, te na rits teen wi acints.

⁵ Par kara ñaan ka yuntsl pëyuntsul bërierul.

⁶ Unk, ñaan nan ci tsi pëjukanaa përim, aka na roon në faar ngëko ngëwar ngi na ka ngi bëlieng, ni nan ci tsi pëjukanul.

⁷ Ind tsë fäl iyeen ind: Nasien-batsi di ka riataa. Par ko wi ñaan wayan wi, wul wi nuu cët wun.

⁸ Na wayani tsi uŋal uliaful, tsi uŋal uliaf tsi nu cëtëna tsun kacok; maa na wayani tsi Uwejats Nasien-batsi, tsi Uwejats Nasien-batsi tsi nu cëtëna tsun ubiira un dits wi ka ba.

⁹ Nja tsë noor puu ro uwar, par uband uwal, ja ka cët mbuk, uci ngë rafanats uyëlan.

¹⁰ Wul ka wun, u yëla nja bëro, ngë ro bañaan bëlieng ngëwar; maa, pëpeena biki ngë bëka biki tsi uwak.

Katseend-ibats katuamë-ni, ni kawël-mboos

¹¹ Nda teenan-e urëmbar ngëpic ngi n picandëri ind ngi, ni kañan nji bërierin!

¹² Bañaan bëlieng ban ŋal biki pëpiban ba wara tsi ngëliaf, bukul ci bukun tsi pëforsaar ind pëwelana kambac, pa ind përits noor-noorana tsi undo kruus Këristu rin.

¹³ Par ŋal ba welana biki kambac, bu mobats tsi ko wi ulua ja wi; maa bu ŋal ind pëwelana kambac, pa tsi ngëliaf ind, bu kë rëmbandar.

¹⁴ Maa mdëmbandar ma lawanin, ucits ba tsi kruus Yeesu Këristu Ajugnjarin, kul kan ka ki umundu rieŋa di kruus pa iji, a n dieŋa di kruus pa umundu.

¹⁵ Par, nin kawela-kambac, nin kawelaatsa-kambac cits ulon ko; maa un ka wi bëkat, aci pëci ñaan nawalu.

¹⁶ Bañaan bëlieng biki ka yandaar biki tsi utsua umënts wi, pëfac pa ciin ni kayëk-ipës tsi bukul, ni tsi Israel Nasien-batsi.

¹⁷ Pa pëtuamës, ñaan tsë cokin uwaas; par man tsij ngëlu Yeesu tsi uliaf nji.

¹⁸ Batsaar ni nji, bëtseend Yeesu Këristu Ajug ija, ba ciin ni uwejats ind. Ameen!