GALAASIA 5 - KARÚK-PËRIM KAWALU Nouveau Testament

Pëmob tsi ulua oo pëmob tsi Këristu

¹ Këristu afacan nja pa n ja pëci bafacal. Nda ciin baliincal, ind tsë kaka niaj tsi pëluek.

² Nda cikëndëni-e, nji Pol ma n ja ind, uci nda niiran pëwelana kambac, Këristu di ka kaar ind bëkat.

³ Man ja ind kak, ñaan na niirani-ba këniiran pëwelana kambac, aka na roon në mob tsi përo ngëko ngi ulua tsu ngi bëlieng.

⁴ Ind ba nja biki nda roon ndu tsas pëpiban nda ci bamabal tsi ngëko ulua, a nda patsësa Këristu; nda pënana di bëtseend Nasien-batsi.

⁵ Par wund, tsi Uwejats Nasien-batsi, undo uwak, wund aci tsi pëlip uwats bëmabal.

⁶ Par tsi Këristu Yeesu, nin kawela-kambac, nin kawelaatsa-kambac kaats bëlon bëkat; maa un ka wi bëkat, aci uwak wi ka leemp wi bi bëŋal.

⁷ Ind nda ro ka túk uwar; yën bi laaŋ ind pëmob tsi ucär nda liincan?

⁸ Kafäl kamënts ki pënënatsi di nandui ind unk.

⁹ Ko uties bëko-bëlëntsëntsaani, ka lëntsëntsan bun bundots bëlieng.

¹⁰ Nji man fiaar ind tsi Ajug, a me nda ri ka tsij nin ulon uwejats; maa ñaan nan ci tsi pëcok ind ngëwaas, al në rúra ci yën, në lacanaa.

¹¹ Maa, batsaar ni nji, uci wama ka leents përim uleka kambac, we ka wun a wama ka noor-noorana? Bi u ci bank, i di ka ja ko uleka kruus, pa përits ci ko wi kan tsui ñaan na yër.

¹² Ban ci bukunk tsi pëcok ind ngëwaas, awara ba roon bu ka kasar.

¹³ Par ind, batsaar ni nji, nda ruree pëfacana; maa, ind tsë laabaraan pëfacana, a ndë niaj tsi karí-ko uliaf; maa, kara ñaan na ciin naleempar acintsul, tsi bëŋal.

¹⁴ Par ulua un ci wi ba këci, abandanaana tsi përim pëloole rin, un ci wi: “Kë ŋal acintsu bi m ŋal bi beenu.”

¹⁵ Maa, uci nduu rumëlar a nduu yoorëlar tsi nda ci tsi, nda rukan ibats pa nda rits baalar.

Ngi uliaf kë ro ngi, ni ko wi Uwejats Nasien-batsi këbuk wi

¹⁶ Maa, ma nja: Nda yandaari ni Uwejats Nasien-batsi, unk nda katse koo fets ngëko ngi uliaf ind kërí ngi.

¹⁷ Par, uliaf ka kaman Uwejats Nasien-batsi, a Uwejats Nasien-batsi këkaman uliaf; ngëtëb ngëmënts ngi, aja un ci wi uu kaman ucints wul; unk, nda rits uu ro ko wi nda ŋal wi.

¹⁸ Maa uci Uwejats Nasien-batsi tsijëna ind wun, nda mobats tsi ulua.

¹⁹ Par, ngi uliaf kë ro ngi awinaa, ci ngun ngi: katúk-ufuts, ni mtsopi, ni pëbaar tsi mampiintsandar,

²⁰ ni kajintëla icap, ni pëkaalam, ni mañaasëlër, ni katamb-ulats, ni pëyëkandar ko pëci wiicu, ni uriab, ni ukam, ni pëŋom, ni mankicësar,

²¹ ni mankocar, ni ukuj, ni buwaamal. A ngëko pi ngëmënts ngi, ma n ja ind, bi do bi car aleents ind, ban mob biki tsi përo ngul, bu ri ka rukanda pësien Nasien-batsi.

²² Maa ko wi Uwejats Nasien-batsi kë buk wi aci: bëŋal, ni ulílan, ni pëfac, ni umiira, ni karo uwar, ni kawara-uwaas, ni kamob-tsi-uwak,

²³ ni kajuab-uwaas, ni kayëlan-uliaf; kaats ulua un pok wi ngëmënts ngi.

²⁴ Bañaan ban ci biki biki Këristu Yeesu, bu rieŋ ngëliaf bukul di kruus ni uŋal ngul, ni ngi u rí ngi.

²⁵ Bi ngë kaana bink ubiira tsi Uwejats Nasien-batsi, nda ju ngë yandaar buts tsi Uwejats Nasien-batsi.

²⁶ Nja tsuuts rëmbandar, pa puu tsu bañaan ba riabatsar bacints bukul, ni pëja bañaan, bu ka koc bacints bukul.