GALAASIA 4 - KARÚK-PËRIM KAWALU Nouveau Testament

Ngë katse ci baluek, maa ngë ci babuk

¹ Par má n ja: uwal wi narukanda-bëka wama wi ci napäts, kaats ko un patsëlanul wi ni naluek, ŋal bi na ci bi ajug ngëko bëlieng.

² Maa bawiak ka tsijënul bukun bu kë këmandul, te uwal wi asin tsu wi.

³ Unk n ja buts, uwal wi ngë wam wi upäts, a ngë ro ka luekandar tsi pëfets bëro bañaan umundu;

⁴ maa, a ngëwal kë band, a Nasien-batsi yëli Abukul, nan pënë-ni tsi ŋaats, a na pënë-ni tsi ulua,

⁵ pa pëbueran ba ci biki tsi ulua, pa nja ka tsua pëci babuk Nasien-batsi.

⁶ A undo bi nda ci bi babuk, a Nasien-batsi wëtani Uwejats Abukul di ngëwaas nja, a uu lie koo ja: “Aba, Paapa!”

⁷ Unk, m katse m ci naluek, maa m ci abuk; a bi m ci bink abuk, Nasien-batsi atsuu buts pëci narukanda-bëka.

Pol awejats bañaan Galaasia

⁸ Ucäk, bi nda netse bi ro me Nasien-batsi, nda ro ja nda roon dë leempar ngëwejats ngan cits ngi basien-batsi;

⁹ maa bi nda me bink Nasien-batsi inkri, te aci Nasien-batsi me ind un, um bi nda witsa bun kak di bëro ban daf bi a ba ciind bëra n jal, a nda kaka ŋal pëci baluek bul?

¹⁰ Nda ja nda roon ndu waay ngënu, ni ilí, ni ngëwal, ni ngëwaanu.

¹¹ Man lënkar uleemp wi leemp wi tsi ind përits ka bëkat.

¹² Man ñaan ind, batsaar ni nji, nda ciin pi nji, par nji buts man ci pi ind; kaats ko wi nda rolin wi u waraatsa wi.

¹³ A ind nda me u ci-undo pëmoj nji tsi uliaf, ka wun leents ind Upetsan-uwar bëyaas bëcak;

¹⁴ ŋal bi pëmoj uliaf nji ro bi ci mteenamana pa ind, maa nda pibanatsin nda bërin, nin pëjuatsan; maa nda welanin unk pi uwaanju Nasien-batsi, pi nul Këristu Yeesu bërierul.

¹⁵ Ulílan ind aci tsum-i? Par mán leents ind ne, uci u ro yila bëro, nda bi ka ro kuatës këkës ind nda wëlin.

¹⁶ Ane manduka ci nabër ind, undo man leents ind ucär a?

¹⁷ Bukul, uŋal wi ba ka wi pa ind cits u wara wi; maa bu ŋal pëpënan ind nda lawanin, pa ind puu piban uŋal ind pa bukul.

¹⁸ Awara pëtsij uŋal puu ro uwar sandëndën, cits uwal wi n ci wi ni ind rin.

¹⁹ Upäts nji, ind biki ci biki tsi pëmiirara urear uliaf-kabuk kak, te Këristu tsënkëna ka leempa di ind.

²⁰ Mando ŋal pëci ni ind inkri, ka ñakanaan ind ni pëlon përim pan pats pi; par man taliaar tsi uleka ind.

Saara ni Agaar

²¹ Nda leentsin-e, ind ba ŋal biki pëmob tsi ulua: ane nda teets ko wi ulua ja wi-a?

²² Par apicana ajaka, Abraam aka upäts utëb; nalon aci ni ŋaats naluek, a nacints ci ni ŋaats na faci.

²³ Maa abuk naluek nun abukënaa tsi uliaf, a abuk nafac nun bukënaa tsi uwatsan.

²⁴ Ngëko ngëmënts ngi aci pi ngënaamanaani; par bakaats bamënts biki bë ci iro-pëloole itëb. Kalon apënë-ni untunda Sinai, kul ka buk upäts pa pëluek; kul ci kun Agaar.

²⁵ Agaar, ciun untunda Sinai un ci wi di Araabia, nan ci Jerusalem dëntsari, dul da ci ri tsi pëluek ni upäts dul.

²⁶ Maa Jerusalem dan ci runk di ruets aci ŋaats na facunk, ciun anin inja;

²⁷ par iink picana run: “Ciin tsi ulílan, wi ŋaats nan ditsi ka buk, nan bëkatsi koon këbuk! Júcan ni ulílan kë lië mak, wi nan teetsi koon këte urear uliaf-kabuk. Par upäts ŋaats nan bëree ka pe upäts ŋaats na nimee pëcum.”

²⁸ Maa, ind batsaar ni nji, nda ci upäts uwatsan pi Isaak.

²⁹ Pi nan bukee unk tsi uliaf ro bunk ka noor-nooran nan bukee tsi Uwejats uwal ujon, unk buts ci run inkri.

³⁰ Maa we wi Bëpica n ja wun? Bul aja: “Ruakan naluek nun ni abukul, par, kaats bi abuk naluek kë bof bi tsi përukanda bëka, ni abuk ŋaats na faci.”

³¹ Unk batsaar ni nji, nja ngë cits upäts naluek nun, maa, ngë ci biki ŋaats na faci.